प्रस, वीरगंज, २० फागुन/
वाणिज्य आपूर्ति तथा उपभोक्ता संरक्षण कार्यालय पर्साले बिहीवार हरिवनको सर्लाही बजारको अनुगमन गर्ने क्रममा चारवटा पसललाई १ लाख ७० हजार रुपैयाँ जरिवाना तिराएको छ।
निमित्त कार्यालय प्रमुख जीतबहादुर भण्डारीको नेतृत्वमा इलाका प्रहरी कार्यालय हरिवन, इलाका प्रशासन कार्यालय हरिवन, हरिवन नगरपालिका, नगर उद्योग वाणिज्य सङ्घका पदाधिकारीहरू सहभागी भएको टोलीले मूल्यसूची नराख्ने चारवटा पसललाई जरिवाना गरेको हो।
प्रस, पर्सागढी, १९ फागुन/
पर्सागढी नगरपालिका–४ बर्वाटाँडीका भीमबहादुर खड्काले मन्दिरलाई एक कट्ठा (करीब ३५ लाख मूल्यबराबरको) जग्गा दान गरेका छन्।
प्रस, सेढवा, १९ फागुन/
जगरनाथपुर गाउँपालिका–१ पिपडाढीस्थित ओरिया खोलामा भारतीय पक्षबाट हुने अवैध उत्खनन रोकिएको छ।
गत माघ ३० गते भारतीय पक्षले अवैध उत्खनन गर्दा स्थानीय र सशस्त्र प्रहरीले रोक्न खोज्दा दुईजना सशस्त्र प्रहरी घाइते भएपछि स्थानीय प्रशासनले भारतीय पक्षसँग सहकार्य गरेर उत्खनन रोक्न सफल भएको हो।
जिल्ला प्रशासन कार्यालय, पर्साका प्रमुख जिल्ला अधिकारी आसमान तामाड्ढो पहलमा भारतीय पक्षबाट पूर्वी चम्पारणका एसडिएम साइला हर र एसएसबीका अधिकारीहरूसँग बैठक गरी ओरिया खोलामा भारतीय पक्षबाट भइरहेको अवैध उत्खनन रोकिएको हो।
दुईजना सीमा अधिकारीबीचको बैठकले नेपाली भूमिमा अवैध उत्खनन गर्ने र सिमाना कायमका लागि दुई देशका नापी विभागसँग पहल गर्ने प्रस्ताव राखिएको र सोमा सहमति भएको प्रजिअ तामाङले बताए। प्रजिअ तामाङले सो कार्य सम्पन्न नहुन्जेल तत्काल भारतीय पक्षबाट भइरहेको उत्खनन रोक्न भारतीय एसडिएमले सहमति जनाएको कारण अहिले रोकिएको बताए। ओरिया नदीमा रहेको सीमास्तम्भ निर्माणका लागि नापी विभागका अधिकारीहरूले स्थलगत निरीक्ष्Fण गर्ने र सीमा निर्धारण गरेपछि आआफ्नो सीमामा वैध तरीकाबाट उत्खनन हुन दिने सहमति भएको छ।
प्रस, पर्सागढी, १९ फागुन/
पर्सागढी नगरपालिका–३ पकडियामा अवैध तरीकाबाट फर्निचर उद्योग सञ्चालन भएको र उनीहरूसँग वनकर्मीको मिलेमतो भएको घटना सार्वजनिक भएको छ।
फागुन १८ गते मङ्गलवार एउटा फर्निचर उद्योगमा सबडिभिजन वन कार्यालय मधुवन मथवल, बढनिहारले छापामारी गर्दा वनकर्मीको संलग्नता पुष्टि भएको हो। स्थानीय वनकर्मीको संलग्नतामा फर्निचर उद्योगमा तस्करहरूले काठ पु–याउने गरेको र उनीहरूबाट वनकर्मीले पटके रकम लिने गरेको प्रमाण फेला परेको छ। प्रतिटिप रु ३ हजार स्थानीय वनकर्मीले लिने गरेको प्रमाण फेला परेको हो। वनकर्मीले फर्निचर उद्योगबाट पटकेरूपमा रु ३ हजार लिने गरेको अडियो अहिले सार्वजनिक भएको छ।
प्रस, रक्सौल, १९ फागुन/
रक्सौल बाइपास सडक र आइसिपी वरपरको क्षेत्रमा पेट्रोलियम पदार्थको चोरी बढेको छ। भारतका विभिन्न स्थानबाट लामो दूरी तय गरी नेपाल आउने मालवाहक भारतीय ट्रकहरूबाट अहिले डिजेल चोरी बढेको छ।
बाइपास र आइसिपी क्षेत्रमा हुने डिजेलको चोरीविरुद्ध चालकहरूले रक्सौलमा प्रदर्शन गरेका छन्। उनीहरूले भारतका विभिन्न क्षेत्रबाट लामो दूरी तय गरेर आउँदा कहींकतै ट्रकबाट डिजेलको चोरी नहुने तर रक्सौलमा आएपछि डिजेलको चोरी बढेको भन्दै प्रशासनविरुद्ध प्रदर्शन गरेका हुन्। उनीहरूले चोरीमा संलग्नहरूलाई पक्राउ गरी कारबाईको माग पनि गरे।
प्रस, पोखरिया, १९ फागुन/
पर्सा जिल्लामा गहुँखेती गरेका किसानहरू अहिले लाही कीराका कारण समस्यामा परेका छन्।
खासगरी गहुँबाली हुर्केर बाला लाग्ने बेलामा लाही कीरा लाग्न शुरू भएको हो। पर्सा जिल्लाभरिका गहुँखेतमा अहिले लाहीको आतङ्क छ। लाही कीरा गहुँबालीका साथै तरकारीखेतीमा पनि देखा परेको छ। कालिकामाई गाउँपालिका–१ मुर्लीका किसान सुदीप चौरसियाले गहुँबालीका साथै काउलीखेतीमा पनि लाही कीराले समस्यामा पारेको बताए। उनले हाल कटान हुन बाँकी केही तोरीखेतीमा पनि लाही कीराले दुःख दिएको बताए।
प्रस, वीरगंज, १९ फागुन/
भारतीय दूतावासको विकास साझेदारी तथा पुनर्निर्माण प्रभागका प्रमुख र राष्ट्रिय पुनर्निर्माण प्राधिकरणको केन्द्रीय परियोजना कार्यान्वयन एकाइका परियोजना निर्देशकले बुधवार थप तीनवटा सम्पदाको पुनस्र्थापना तथा पुनर्निर्माणको लागि सम्झौतापत्र र ठेक्का सम्झौतामा हस्ताक्षर गरेका छन्।
प्रस, गरुडा, १९ फागुन/
नेपाली र भारतीय भूमिमा लघुकथा सशक्तरूपमा स्थापित भइसकेको आख्यान साहित्यको उपविधा भएको प्राडा कपिल लामिछानेले बताएका छन्। रौतहटको गरुडामा साहित्यकारसितको भेटघाटमा प्राडा लामिछानेले लघुकथालाई बादल लागेको आकाशमा गड्याङ्गुडुङ गर्ने बेलाको बिजुलीको झिल्कासित तुलना गरेका थिए। विराटनगरमा आयोजित लघुकथासम्बन्धी दुर्ई दिने कार्यक्रममा सहभागी भएर भैरहवातिर फर्कने क्रममा प्राडा लामिछानेले रौतहटका मुस्लिम समुदायमा प्रचलित संस्कार गीतको अध्ययनसम्बन्धी कामको सिलसिलामा गरुडा आएका थिए। सोही क्रममा प्राडा लामिछानेलाई मध्यरौतहटका लेखक तथा साहित्यकारहरूले स्वागत सम्मान गर्दै लघुकथाको विषयमा विशेष जानकारी प्राप्त गरेका थिए।
चार दर्जनभन्दा बढी मौलिक र करीब डेढ दर्जन सम्पादित कृति प्रकाशन भइसकेका प्राडा लामिछाने मोसफलमा रहेर साहित्य साधना गर्दै देशमा विशिष्ट पहिचान बनाउने निकै कम साहित्यसर्जकमा गनिन्छन्।
प्रस, वीरगंज, १८ फागुन/
युके एड र स्ट्रीट चाइल्ड नेपालको आर्थिक सहयोगमा आसमान नेपाल र जवात संस्थाले पर्सा, बारामा स्वच्छता तथा महीनावारी स्वच्छता सामग्रीसहित राहत वितरण गरेको आसमान नेपालका इमर्जेन्सी रेस्पोन्स अफिसर धर्मेन्द्र चौरसियाले बताए।
पर्सा, बारा, रौतहट र सर्लाही गरी प्रदेश २ का चार जिल्लामा तत्वा, मुसहर, डोम समुदायका मानिसहरूलाई लकडाउनपछि सो सामग्री उपलब्ध गराउने नीतिअनुरूप पर्सा र बारामा सामग्री वितरण गरिएको हो। रौतहट र सर्लाहीमा कार्यक्रम जारी रहेको अफिसर चौरसियाले बताए।
प्रस, सेढवा, १८ फागुन/
पर्साको ग्रामीण क्षेत्रबाट पेट्रोलियम पदार्थको तस्करी जारी छ।
भारतमा पेट्रोलियम पदार्थ नेपालको तुलनामा महँगो भएकोले केही महीनादेखि पेट्रोलियम पदार्थको तस्करी बढेको हो।
प्रस, वीरगंज, १८ फागुन/
चालू आर्थिक वर्षमा वाणिज्य, आपूर्ति तथा उपभोक्ता संरक्षण कार्यालय वीरगंजले आफ्नो क्षेत्रमा कानूनविपरीत सञ्चालित एक सयवटाभन्दा बढी फर्मलाई कारबाई गरेको छ। यसरी कारबाई गर्दा ३० लाख रुपैयाँभन्दा बढी दण्ड जरिवाना असुल भएको सो कार्यालयले जनाएको छ।
बढी मूल्य राखेर सामान बिक्री गर्ने, अरूको ब्रान्ड चोरी गर्ने, पसलमा मूल्य सूची नराख्ने, खरीद बिल नदेखाउने, इजाजत नलिई पसल सञ्चालन गर्ने तथा अनुगमन कार्यमा सहयोग नगर्नेलगायतका १०५ वटा व्यापारिक प्रतिष्ठानलाई कारबाई गरी रु ३० लाख २३ हजार जरिवाना गरेको हो।
प्रस, पोखरिया, १८ फागुन/
इलाका प्रहरी कार्यालय, पोखरियाले १ लाख ७६ हजार नगदसहित तीनजना जुवाडेलाई पक्राउ गरेको छ। बहुदरमाई नगरपालिका–१ विश्रामपुरमा जुवा खेलिरहेका तीनजना जुवाडेलाई पक्राउ गरेको इलाका प्रहरी कार्यालय पोखरियाका प्रहरी निरीक्षक दीपक थापाले बताए।
प्रस, वीरगंज, १८ फागुन/
वीरगंजका पत्रकार लालबाबू शेख प्रेस काउन्सिल नेपालको सदस्यमा मनोनीत भएका छन्।
मन्त्रिपरिषद्को मङ्गलवार बसेको बैठकले शेखलाई प्रेस काउन्सिलको सदस्यमा चार वर्षको लागि मनोनीत गरेको सूचना तथा सञ्चार प्रविधि मन्त्रालयका सहसचिव डिल्लीराम शर्माले बताए।
प्रेस काउन्सिलको सदस्यमा मनोनीत भएका शेखलाई आजै सिंहदरबारस्थित मन्त्रालयमा मनोनयनपत्र हस्तान्तरण गरिएको छ।
प्रस, परवानीपुर, १८ फागुन/
गोल्छा समूहको पर्सा जिल्लाको विन्ध्यवासिनी गाउँपालिका–२ बहुअर्वाभाटास्थित निर्माणाधीन हुलास स्टील एन्ड इन्डस्ट्रिज प्रालिको भवनमा गएराति बम विष्फोट भएको थियो।
विष्फोटबाट उद्योग भवनको एउटा कोठाको झ्यालका सीसाहरू फुटेका छन् भने पर्खालमा क्षति पुगेको प्रहरीले जनाएको छ। पर्सा प्रहरी प्रवक्ता एवं प्रहरी नायब उपरीक्षक ओमप्रकाश खनालले सोमवार राति १० बजे निर्माणाधीन उद्योगबाट विष्फोटको आवाज आएपछि प्रहरी त्यहाँ पुगेको बताए।
प्रस, जनकपुरधाम, १७ फागुन/
घरबारविहीन १२४ परिवारलाई सोमवार धनुषामा पक्की घर हस्तान्तरण गरिएको छ। जनता आवास कार्यक्रम अन्तर्गत दुर्ई कोठाको पक्की घर निर्माण गरेर हस्तान्तरण गरिएको हो।
सङ्घीय सरकारको आर्थिक लगानीमा प्रदेश नंं २ सरकारले घर निर्माण गरी प्रदेश नंं २ का भौतिक पूर्वाधार तथा विकासमन्त्री जीतेन्द्र सोनलले हस्तान्तरण गरिएको हो।
वर्षौंदेखि समस्यामा परेका जनकपुरधाम उपमहानगरपालिका वडा नंं २३ लादोवेला, विन्धी, बसहियाका अति दलित मुसहर जातिलाई घर हस्तान्तरण गरिएको हो। तयारी घर पाएपछि अति दलित समुदायले खुशी प्रकट गरे।
प्रदेश नंं २ का डोम, हलखोर, मुसहर तथा मेस्तरका ४ हजार घर निर्माण गरेर हस्तान्तरण गरिसकेको मन्त्री सोनलले बताए।
आर्थिक वर्ष २०७५/७६ र २०७६/७७ दुर्ई आर्थिक वर्षमा धनुषा जिल्लामा ७ सय २४ जनासँग सम्झौता भएकोमा अहिलेसम्म २ सय ८१ वटा घरको निर्माण भएको र ४ सयवटा घर निर्माण जारी रहेको सो कार्यक्रममा जनता आवास कार्यक्रम धनुषाका संयोजक तथा प्रदेशसभा सदस्य परमेश्वर साहले जानकारी दिए।
धनुषाको बसहियामा निर्माणको क्रममा ३४ वटा घरमा अदालतमा मुद्दा परेकाले रोकिएको डिभिजन इन्जिनियर विनोद यादवले जानकारी दिए। आफूहरूको वर्र्षाैदेखिको पक्की घरमा बस्ने चाहना पूरा भएकोमा अत्यन्तै
खुशी भएको लादोवेलाका छटुट साले बताए।
सङ्घीय सरकारको कार्ययोजनामा परिमार्जन गरेर प्रदेश नंं २ सरकारले छानामा भएको बाँसको ठाउँमा फलामको पाइन, भुइँमा माटोको साटो इँटाको सोलिङ्ग गर्ने गरेको मन्त्री सोनलले जानकारी दिए।
प्रस, रौतहट, १७ फागुन/
गढीमाई नगरपालिकाले शिक्षकहरूलाई आगामी असार महीनासम्मको अग्रिम तलब दिएको छ।
नगरपालिकातर्फबाट स्वास्थ्य सेवा, पशु सेवा र आयुर्वेद सेवामा कार्यरत स्थायी कर्मचारीलाई फागुन मसान्तसम्मको र शिक्षकहरूलाई २०७८ असार महीनासम्मको एकमुस्ट तलब खातामैं राखिएको लेखापाल कामेश्वर सहनीले जानकारी दिए। उनले शिक्षकहरूको मनोबल बढाउन चार महीनाको तलब अग्रिम भुक्तानी गरिएको बताए। प्रत्येक महीना तलब दिनुपर्ने भएपनि नगरपालिकाले आफ्ना शिक्षकहरूलाई आगामी असार महीनासम्मको रकम अहिले नै खातामा पठाएको लेखापाल सहनीले बताए। स्थानीय सरकारको अभ्यास प्रारम्भ भएको बेला कर्मचारी र शिक्षकहरूलाई सरकारको अनुभूति गराउन यस्तो गरिएको उनले बताए।
रौतहटमा निर्वाचित जनप्रतिनिधिहरूबीचको आन्तरिक विवादका कारण अधिकांश स्थानीय तहका कर्मचारीहरूले तलबभत्ता समयमैं पाउँदैनन्। गुजरा, फतुवाविजयपुर, राजदेवी नगरपालिकामा तलब लिन कर्मचारीहरूले आन्दोलन गर्नुपर्ने अवस्था सृजना भएको थियो। काम गर्ने तर तलब समयमैं नपाउने अवस्थाले कर्मचारीहरूको मनोबल खस्किंदै गएको छ। यस्तो झन्झटबाट छुटकारा पाउन गढीमाई नगरपालिकाले अघिल्लो चार महीनाको शिक्षकहरूको तलब खातामा पठाएको लेखापाल सहनीले जानकारी गराए।
प्रस, वीरगंज, १७ फागुन/
नेकपा ओली पक्षीय प्रेस सङ्गठन पर्साको संयोजकमा श्याम बन्जाराले जिम्मेवारी पाएका छन्। महासङ्घ पर्साका अध्यक्ष र प्रेस चौतारी पर्साका पूर्वअध्यक्षसमेत रहेका बन्जारालाई प्रेस सङ्गठन प्रदेश २ ले जिल्लाको जिम्मेवारी सुम्पिएको हो।
सङ्गठन प्रदेश २ का इन्चार्ज लालबाबू शेख र प्रदेश संयोजक फणि महतले सोमवार हस्ताक्षर गरेको पत्रमा सङ्गठनको पर्सा शाखा संयोजकको जिम्मेवारी बन्जारालाई दिएको उल्लेख छ। नेकपा विभाजनसँगै सो पार्टीनिकट सञ्चारकर्मीहरूको सङ्गठन प्रेस सङ्गठनमा पनि विभाजन शुरू भएको हो। तत्कालीन एमालेनिकट प्रेस चौतारी र नेकपा माओवादी केन्द्रनिकट क्रान्तिकारी पत्रकार सङ्घ मिलेर प्रेस सङ्गठन गठन भएको थियो। सङ्गठन पर्साको संयोजकमा नीरज पीठाकोटे मगरले जिम्मेवारी पाएकोमा हाल पार्टी विभाजनपछि पीठाकोटे प्रचण्ड–माधव समूहमा लागेको र आइतवार जनकपुरमा छुट्टै कार्यक्रमसमेत गरेपछि ओली पक्षले उनलाई सङ्गठनको संयोजकबाट हटाएको हो। सङ्गठन एकीकृत हुँदाको अवस्थामा प्रदेश २ इन्चार्ज रहेका शेख र प्रदेश संयोजक महत भने ओली पक्षमा क्रियाशील छन्।
एक/दुई दिनभित्रै सङ्गठनको पर्सा जिल्ला कमिटी विस्तार गरिनुका साथै प्रदेशको रिक्त स्थानमा पनि पूर्ति गरिने पर्सा संयोजक बन्जाराले बताए।