Showing posts with label स्थानीय समाचार. Show all posts
Showing posts with label स्थानीय समाचार. Show all posts

Monday, October 19, 2020

 प्रहरीले समातेको सुन राजस्वमा बुझाइयो

प्रहरीले समातेको सुन राजस्वमा बुझाइयो



प्रस, परवानीपुर, ३ कात्तिक/
    पर्सा प्रहरीले दुई दिनअघि वीरगंजबाट बरामद गरेको करीब २३ किलो सुन र चाँदीका गहनाहरू आवश्यक कारबाईको लागि राजस्व अनुसन्धान कार्यालय, पथलैयामा बुझाएको छ।
    सोमवार दिउँसो पर्सा प्रहरीको टोली पथलैया पुगेर कागजी प्रक्रिया पूरा गरेर अनुसन्धान कार्यालयलाई सुन बुझाएको प्रहरी उपरीक्ष्Fक गङ्गा पन्तले जानकारी गराइन्। शुक्रवार मध्याह्न १२ देखि २ बजेसम्म चलेको छापामारीमा वीरगंज–५ रेशमकोठीस्थित गणेश अपार्टमेन्टको ३०३ नं फ्लाटबाट करीब २३ किलो सुन र २.२६२ किलोग्राम चाँदीका गहना, भाँडाकँुडा बरामद भएको थियो। पूर्वसूचनाको आधारमा प्रहरीले छापा मारी वीरगंजबाट ठूलो परिमाणमा सुन बरामद गरेको थियो।
    लकडाउनको बेला सीमानाका बन्द रहेको र तेस्रो मुलुकबाट अवैधरूपमा सुन आयात गरी भारततर्फ तस्करी गर्ने उद्देश्यले उक्त सुन वीरगंजको उक्त फ्लाटमा लुकाइराखेको अवस्थामा फेला परेको थियो।
    बरामद सुनमा १ किलो दरका १३ वटा बिस्कुट, सुनको बिस्कुट मझौला फाइभ टिएइएलएस ९९९९ सुन ४६ थान (८ किलो ५७६ ग्राम), सय ग्रामको सानो सुनको बिस्कुट १० थान (१ किलो), सुनका विभिन्न गरगहना (६८१ ग्राम) गरी २३ किलो २५७ ग्राम सुन बरामद भएको थियो।
    वीरगंज–५ रेशमकोठीस्थित गणेश अपार्टमेन्टको ३०३ नं फ्लाट भारत, बिहार, रक्सौलका अशोक सिन्हाको भएको प्रहरीले जनाएको छ।

 कोलकातामा भारु भुक्तानी गर्दा नेपाली व्यवसायीलाई सास्ती

कोलकातामा भारु भुक्तानी गर्दा नेपाली व्यवसायीलाई सास्ती


प्रस, परवानीपुर, ३ कात्तिक/
    भारत तथा तेस्रो मुलुकबाट रेलमार्ग तथा सडकमार्गबाट आयातित मालसामानको कोलकातास्थित बन्दरगाह र विभिन्न सिपिङ कम्पनीलाई ढुवानी खर्च र विलम्ब शुल्क भारुमा भुक्तानी गर्दा नेपाली व्यवसायीले सास्ती खेप्नुपरेको छ।
    भारु भुक्तानीको लागि बैंकिङ प्रक्रिया पूरा गर्न दुई–तीन दिन समय लाग्ने गरेकाले मालसामान आयात तथा पैठारीमा ढिलाइ हुने गरेको र नेपाली व्यवसायीले बैंकको चक्कर लगाउनुपरेको बताइएको छ। वीरगंज उद्योग वाणिज्य सङ्घका अध्यक्ष गोपाल केडियाका अनुसार लगभग सबै सिपिङ लाइनको कार्यालय कोलकातामा भएको र उनीहरूले त्यहींको कार्यालयबाट मालसामान ढुवानी गरेपछि भुक्तानी भारुमा लिने गरेका छन्।
    यसो गर्दा नेपाली व्यवसायीलाई झन्झट हुने गरेको छ। नेपाल सरकारले विदेशी निर्यातकर्ता, सिपिङ लाइन कम्पनीहरूलाई नेरु भुक्तानी गर्ने सुविधा दिएको खण्डमा चाँडोभन्दा चाँडो भुक्तानी दिन सहज हुन्थ्यो र मालसामान भन्सार बिन्दुबाट छुटाउन पनि सजिलो हुने व्यवसायीहरूले बताए छन्।
    यस विषयमा नेपाल सरकारको अर्थ तथा परराष्ट्र मन्त्रालयले भारतीय सरकार र बन्दरगाह प्रशासन, सिपिङ लाइन प्रतिनिधिहरूसँग छलफल गरेर समस्या हल गर्नुपर्ने माग व्यवसायीहरूले गरेका छन्। अहिलेको परिप्रेक्ष्यमा नेरु खातामा हालेर भारु खरीद गरेर नेपाली व्यवसायीहरूले कोलकातास्थित विभिन्न सिपिङ लाइन कम्पनी तथा भारतीय निर्यातकर्ताहरूलाई भुक्तानी दिंदै आएका छन्।

 चाडपर्व शुरू भएपछि वन फँडानी बढ्यो

चाडपर्व शुरू भएपछि वन फँडानी बढ्यो


बलिराम शुक्ला, बिरुवागुठी, ३ कात्तिक/
    चाडपर्व शुरू भएसँगै पर्साको राष्ट्रिय वनबाट काठ चोरी–तस्करीमा वृद्धि भएको छ। डिभिजन वन कार्यालय, पर्साका प्रमुख जगरनाथप्रसाद जायसवाल आएपछि वन चोरी–तस्करीमा केही कमी आए तापनि अहिले पुनः चाड पर्व शुरू भएपछि काठ तस्करहरू सक्रिय भएका छन्।
    रातिको समयमा काठ तस्करहरू राष्ट्रिय वनमा प्रवेश गरी सालको काठ कटान गरी गोलिया बनाइ साइकलमा राखेर समिल तथा फर्निचर उद्योगहरूमा बिक्री गर्ने गर्छन्। पर्साको ग्रामीण भेगमा दर्जनौं समिल तथा फर्निचर उद्योग छन्, त्यसमध्ये अधिकांश अवैध छन्।
    डिभिजन वन कार्यालय, पर्सा मातहत रहेको सबडिभिजन वन कार्यालयहरूले नयाँ वन अधिकृतलाई देखाउने गरी काम गरेको र अहिले पुनः निष्क्रियता देखाउन थालेका छन्। जसले गर्दा वन फँडानी, चोरी, तस्करी बढेको छ। रातिको समयमा पर्साको सोलखपुर, मिलनचोक, सबैया, पारस पटेलचोक, पकडिया, बागवाना, मनवा, गुलरिया, सखुनिया, रङ्गपुरलगायतका स्थानबाट काठ तस्करी हुने गर्छ।
    पर्साको राष्ट्रिय वन सिमानामा सबैया साझेदारी वन, विन्ध्यवासिनी कोइलाभार साझेदारी वन, सबडिभिजन वन कार्यालय सोलखपुर, सबैया, बडनिहार, सशस्त्र बेस क्याम्प सोलखपुर, मिलनचोक, बिरुवागुठी, मनवा र रङ्गपुर प्रहरी चौकीलगायतका सुरक्षा निकाय रहे तापनि काठ तस्करी नियन्त्रणमा कुनै कमी आएको छैन।

 अधूरो भ्यू टावर र पार्क निर्माण शुरू

अधूरो भ्यू टावर र पार्क निर्माण शुरू


ओमप्रकाश चौधरी, सेढवा, ३ कात्तिक/
    आन्तरिक तथा बाह्य पर्यटक भिœयाउन पर्यटन कार्यालय, पर्साले अधूरो निर्माण गरेको भ्यू टावरलाई ठोरी गाउँपालिकाले निर्माण कार्य थालेको छ।
    सङ्घीयता लागू हुनुअघि साबिक गाविस ठोरीको गोलेडाँडामा पर्यटन कार्यालय, पर्साले रु २० लाखको लगानीमा सो टावर अधूरो निर्माण गरेको थियो। स्थानीय सरकार गठनपछि सो टावरको पुनः निर्माण कार्य शुरू भएको हो। आव २०७५/०७६ मा ठोरी गापाले रु ५ लगानी गरी टावरको निर्माण शुरू गरेको गाउँपालिका अध्यक्ष पद्मलाल श्रेष्ठले बताए।
    उनले चालू आवमा सो टावरको छाना, रेलिङ तथा सौन्दर्यीकरण गरिने अध्यक्ष श्रेष्ठले बताए। यसका साथै मनमोहन पार्क निर्माण गरी स्व  मनमोहन अधिकारीको सालिक निर्माण यसै वर्ष गरिने अध्यक्ष श्रेष्ठले बताए। ठोरी महोत्सवको समयमा टावरसम्म पुग्ने बाटो निर्माण गरिएको तथा यस वर्ष सो पार्कमा प्रतीक्षालय निर्माण गरी आन्तरिक तथा भारतीय पर्यटकहरूलाई भिœयाउने योजना रहेको बताए।
    गोलेडाँडामा निर्माण भइरहेको सो टावरबाट पूरै ठोरीको प्राकृतिक दृश्य हेर्न सकिन्छ। यसका साथै भारतमा रहेका भिखनाठोरीलगायत अन्य ठाउँ हेर्न सकिने ठोरी गापा–२ का अध्यक्ष किशोर तामाङले बताए। कोरोनाको महामारी, लकडाउन तथा निषेधाज्ञा हुनुअघि दैनिक आठ सयदेखि एक हजार भारतीय विद्यार्थी तथा पर्यटक यहाँ आउने गरेका वडाध्यक्ष तामाङले बताए।
    उनले लकडाउन खुकुलो भएसँगै पर्यटकको सङ्ख्यामा केही वृद्धि भएको बताए। गोलेडाँडाको भ्यू टावरमा जान ठोरी गाउँपालिका–२ को कार्यालयको दक्षिणपट्टिबाट करीब आधा घण्टाको पैदल डाँडा काट्नुपर्छ। सो टावरबाट ठोरीबजार, चोक, सरस्वती चोक, चौतारा, इच्छानगरको रमणीय दृश्य हेर्न सकिन्छ।

 औद्योगिक क्षेत्रको प्रहरी युनिटले उठाउन थाल्यो दशैं खर्च

औद्योगिक क्षेत्रको प्रहरी युनिटले उठाउन थाल्यो दशैं खर्च

प्रस, परवानीपुर, ३ कात्तिक/
    वीरगंज–पथलैया औद्योगिक कोरिडोरस्थित जनताको सेवाको लागि खटाइएको प्रहरी युनिटले प्रहरी आचरणविपरीत कार्य गर्दैछ।
    विगत सात महीनादेखि कोरोना महामारी र लकडाउनले थिलथिलो बनेको पर्सा–बारा औद्योगिक कोरिडोरमा अहिले प्रहरीको आतङ्क बढेको छ। त्यहाँस्थित प्रहरी चौकीहरू पर्सा, बाराका विभिन्न औद्योगिक प्रतिष्ठानबाट दशैं खर्चको नाममा नजराना बुझ्ने कार्यमा अहिले व्यस्त भएको व्यवसायीहरूले बताए।
    एकजना व्यवसायीका अनुसार प्रहरीले मोटरसाइकल, जीप, भ्यानबाट आफ्नो सुरक्षाकर्मी पठाएर उद्योगमा दशैं खर्चको लागि दबाब दिने गरेको छ। वडा प्रहरी कार्यालय, प्रहरी चौकी परवानीपुर, इलाका प्रहरी कार्यालय जीतपुर, इप्रका सिमरालगायतका टोलीले पर्सा, बाराका विभिन्न उद्योगबाट दशैं खर्च असुलिरहेको वीरगंजका उद्योगी– व्यवसायीमा चर्चा छ।
    विभिन्न उद्योगबाट दशैंको उपलक्ष्यमा मदिरा र कोसेलीस्वरूप खामबन्दी रकमको लागि प्रहरीले दबाब दिइरहेको उद्योगीहरूले बताएका छन्।
    यसबारेमा जिल्ला प्रहरी कार्यालय, पर्साले प्रहरी आचरणविपरीत काम गरेका सुरक्षाकर्मीको जानकारी वा उजूरी आएको खण्डमा कानूनबमोजिम कारबाई गर्ने बताएको छ।  

फरक समाचार

Find us