Showing posts with label प्रमुख समाचार. Show all posts
Showing posts with label प्रमुख समाचार. Show all posts

Saturday, January 18, 2020

बहुदरमाई नपामा पौने तीन वर्षमा सातजना प्रमुख प्रशासकीय अधिकृत फेरिए

बहुदरमाई नपामा पौने तीन वर्षमा सातजना प्रमुख प्रशासकीय अधिकृत फेरिए

प्रस, पंचगावाँ, ४ माघ/
    बहुदरमाई नगरपालिकामा पौने तीन वर्षको अवधिमा सातजना प्रमुख प्रशासकीय अधिकृतको सरुवा भएको छ । स्थानीय तह गठन भएको ३२ महीनाको अवधिमा पर्सा जिल्लामा प्रमुख प्रशासकीय अधिकृत फेरिएको यो नगरपालिका पहिलो हो ।
    पटकपटक विभिन्न कारणले  प्रमुख प्रशासकीय अधिकृतको फेरबदल हुँदा विकासको काममा बाधा अवरोध भएको स्थानीयको गुनासो छ ।
    बहुदरमाई नपामा सुजित साह, भानुभक्त आचार्य, विष्णु अधिकारी, रामकुमार कार्की, कृष्ण चापागाईं, सालिकराम ढकाल, प्रकाश महर्जनलगायतका प्रशासकीय अधिकृतहरू परिवर्तन भइसकेका छन् । महर्जन हाल कार्यरत प्रमुख प्रशासकीय अधिकृत हुन् र उनको पनि सरुवा भएको स्रोतले जनाएको छ ।
    महर्जनको ठाउँमा बहुदरमाई नगरपालिकाको प्रमुख प्रशासकीय अधिकृतमा  तीर्थराज पौडेल आउने स्रोतले बताएको छ । महर्जनको उपस्थिति बहुदरमाईमा दोस्रोपटक हो । उनको यसभन्दा पहिले पनि सरुवा भएको थियो ।
    लगातारको सरुवाले नगरपालिकाको विकास काम प्रभावित भएको नगरप्रमुख नितेन्द्र साह बताउँछन् । उनले सङ्घ सरकारले पटकपटक प्रमुख प्रशासकीय अधिकृतको सरूवा गर्दा समस्या हुने गरेको बताए ।
    नगरप्रमुख साहले आप्mनो नगरपालिकाले समयमा नगरसभा गरेको र जनप्रतिनिधिहरूको सहयोगमा विकासका कामलाई अगाडि बढाउन खोज्दा प्रमुख प्रशासकीय अधिकृतकै कारण समस्या झेल्नुपरेको बताए । उनले प्रमुख प्रशासकीय अधिकृतको कारण समयमा भुक्तानी नभएकोले उपभोक्ता समिति, टेन्डर आदिबाट हुने विकास निर्माणका काम प्रभावित भएको बताए ।

Friday, January 17, 2020

माघे झरीले गहुँबालीसमेत प्रभावित

माघे झरीले गहुँबालीसमेत प्रभावित

ओमप्रकाश चौधरी, सेढवा, ३ माघ/
    मङ्सिर र पुसमा परेको पानीले आकाशे सिंचाइमा निर्भर किसानहरू खुशी भएपनि त्यसपछिको समयमा पनि लगातार पानी पर्न थालेपछि किसानहरू बालीनाली नष्ट हुने कुराले चिन्तित हुन थालेका छन् ।
    गहुँखेतीलाई मङ्सिर र पुसमा परेको पानीले फाइदा पुगेको थियो । त्यसैगरी, पहिलो चरणमा परेको पानीले रबीबाली पनि सप्रिएको थियो तर अहिले पानीको आवश्यकता नभएको समयमा आकाशे पानी नरोकिएपछि किसानहरू बाली नष्ट हुने चिन्तामा छन् ।
    पछिल्लो पानीले गहुँखेतीलाई समेत प्रभावित पारेको छ । अहिले परेको पानीले आलुखेतीलाई मर्का परेको छ । आलुको बोट सुक्न नपाएरै कुहिन थालेको छ । जगरनाथपुर गाउँपालिका–३ गढैयाका किसान मोहन साहले आलु फल्न नसकेर बोटहरू सुकेका र धेरै फलेका आलु पनि पानीको कारण कुहिन थालेको बताए । उनले बलौटे माटोमा लगाइएको गहुँबालीलाई मात्र पानीले हानि पु¥याउन नसकेको र अन्य सबै प्रभावित भएको बताए ।
    जीराभवानी गापा–२ का किसान सञ्जय चौधरीले निरन्तर पानीले गहुँ पहेंलो हुन थालेको बताए । पानी निरन्तर परेकोले खुर्सानी, लसुन, प्याज, काउली, भन्टाखेती पनि प्रभावित भएको उनले बताए ।
    ठोरी गापा–४ विजयबस्तीका रामबहादुर श्रेष्ठले निरन्तर परेको पानी तथा घाम नलागेको कारण कटानी गरेको तोरी पनि खेतमैं कुहिन थालेको बताए ।
इँटाभट्टा पनि प्रभावित
    निरन्तर परेको पानीको कारण इँटा व्यवसायीहरू पनि प्रभावित भएका छन् । जगरनाथपुर गापास्थित आयुष इँटाका सञ्चालक सन्तोषकुमार कुशवाहाले मङ्सिरदेखि माघसम्म बेलाबेलामा परेको पानीको कारण लाखौं इँटा गलेर क्षति भएको बताए । उनले आप्mनो इँटा उद्योगमा मात्र ७ लाख इँटा पानीले गलेको र त्यसबाट करीब रु ८ लाख घाटा भएको बताए । कुशवाहाले साँचाबाट इँटा निकालेर राख्नेबित्तिकै रु १.२० मजदूरी दिनुपर्ने र त्यसरी राखिएका ७ लाख इँटा पानीको कारण नष्ट भएकोले लाखौं घाटा बेहोर्नुपरेको बताए ।

Thursday, January 16, 2020

१३६ स्थानीय तहमा छोरी बीमा सप्ताह शुरू, पहिलो दिन ७८४ जना छीेरी शिशुको बीमा

१३६ स्थानीय तहमा छोरी बीमा सप्ताह शुरू, पहिलो दिन ७८४ जना छीेरी शिशुको बीमा

प्रस, परवानीपुर, २ माघ/
    प्रदेश २ सरकारले ‘बेटी पढाऊ, बेटी बचाऊ’ अभियान अन्तर्गत शुरू गरेको छोरी शिक्षा बीमा शिविर सप्ताह आजदेखि औपचारिकरूपमा शुरू भएको छ ।
    गत वर्ष फागुन ९ गते राष्ट्रपति विद्यादेवी भण्डारीले यो अभियानको  उद्घाटन गरेकी थिइन् । वीरगंजको त्रिजुद्ध माध्यमिक विद्यालयमा बिहीवार आयोजित बीमा सप्ताह कार्यक्रमको औपचारिक उद्घाटन आज भएको हो । आज प्रदेश २ का आठ जिल्लाको १३६ वटा स्थानीय तहमा एकै साथ छोरी शिक्षा बीमा गर्ने काम शुरू भएको हो ।
    शिविरको पहिलो दिन पर्सामा ६५, बारामा १४०, रौतहटमा ६५, सर्लाहीमा २४६, महोत्तरीमा ७४, धनुषामा ५२, सिरहामा ४० र सप्तरीमा १०७ गरी बिहीवार कुल ७८४ जना छोरी शिशुको बीमा भएको जनाइएको छ । प्रदेशको आठ जिल्लामा महानगरमा ४ दिन, उपमहानगरमा ३ दिन, नगरपालिकामा २ दिन र गाउँपालिकामा १ दिन बीमा शिविर सञ्चालन गर्ने कार्यक्रम छ ।
    शिविर चलेको स्थानमा २०७५ माघ १ पछि जन्मेका छोरीको जन्मदर्ता प्रतिलिपि, अभिभावकको नागरिकता लगातय शिविर स्थलमैं फोटो खिचेर २० वर्षको लागि १ लाख बिमाङ्क रकमको बीमा खोल्ने काम शुरू भएको छ । प्रदेश सरकारसँग प्रभु बैंकले बीमाको लागि गरेको सम्झौता अनुसार एक पटकमा एउटी छोरीको लागि १३ हजार ६ सय ४६ रुपैयाँ जम्मा गरिदिने हो । सो रकम २० वर्ष पछि एक लाख रुपैयाँ सम्बन्धित छोरीको खाताबाट निकाल्न सकिनेछ ।
    प्रदेश २ का मुख्यमन्त्री लालाबाबू राउतले बीमा शिविर सप्ताहको उद्घाटन गर्दै भने, “प्रदेश २ को आठ जिल्लामा जनचेतना जगाउन एक साता अवधि भरको लागि यो शिविर चलाइएको हो ।” प्रारम्भिक विवरण अनुसार प्रदेश २ को आठ जिल्लामा वर्षमा २५ हजार छोरीहरूको जन्म हुन्छ । जसमध्ये गत वर्ष मात्र ९ हजारको हाराहारीमा बीमा भएको छ । मुख्यमन्त्रीको बीमा अभियानले बालविवाहलाई रोक्ने र छोरीको उच्च शिक्षाका लागि सहयोग पुग्ने विश्वास व्यक्त गरे ।
     कार्यक्रमका बोल्दै पर्सा क्षेत्र नं १ का प्रतिनिधिसभा सदस्य प्रदीप यादवले आगामी दिनमा प्रदेश सरकारले बीमाको रकम बढाइ ५ लाखदेखि ७ लाखसम्म पु¥याउन आग्रह गरे । उनले २० वर्षमा बीमाको रकम अति न्यून हुने भएकोले बालिकाको शिक्षामा कमी नहोस् भन्ने उद्देश्यले बिमाङ्क रकम वृद्धि गर्न प्रदेश सरकारलाई सुझाव दिए ।
    कार्यक्रममा प्रदेश सांसदहरू जन्नत अन्सारी, सिंहासन साह कलवार, भीमा यादव, वीरगंज महानगरकी उपप्रमुख शान्ति कार्की, प्रभु बैंकका प्रादेशिक प्रबन्धक मन्त्रीलाल गुप्ता, समाजवादी पार्टीका जिल्ला सचिव तबरेज अहमदलगायतको सहभागिता रहेको मुख्यमन्त्रीका स्वकीय सचिव दीपक यादवले जानकारी गराए ।

Wednesday, January 15, 2020

थारू नयाँ वर्षको अवसरमा वीरगंजमा माघी महोत्सव सम्पन्न

थारू नयाँ वर्षको अवसरमा वीरगंजमा माघी महोत्सव सम्पन्न

प्रस, वीरगंज, १ माघ/
    थारू समुदायको नयाँ वर्ष तथा माघीको अवसरमा बुधवार वीरगंज आदर्शनगरस्थित स्विमिङ पुल परिसरमा खिंचडी एवं माघी महोत्सव सम्पन्न भएको छ । 
    पर्साका थारू समुदायको सङ्गठन थारू(खिंचडी) माघी मूल समारोह समितिले विविध कार्यक्रम गरी महोत्सव मनाएको हो । बिहान साढे ११ बजे घण्टाघरबाट झाँकीसहित थारू भेषभूषा तथा पहिरनमा सजिएका सहभागीहरू प्रभातफेरी गर्दैै स्विमिङ पुल पुगेका थिए ।  बालबालिका, युवा, महिला, पुरुष तथा वृद्धवृद्धाहरूको उल्लेख्य सहभागिता थियो ।
    माघी महोत्सव मूल समारोह समितिकी संयोजक तथा थारू कल्याणकारी समिति, महिलासभा पर्साकी अध्यक्ष विजया ओभैmयाको सभापतित्वमा भएको महोत्सव शुभकामना कार्यक्रममा बारा, कोल्हवीका समाजसेवी तथा अनुप दीप्नि मावि कोल्हवीका जग्गादाता विपिन चौधरी प्रमुख अतिथि थिए । विशिष्ट अतिथिमा जनकपुर उच्च अदालत अस्थायी इजलास वीरगंजका न्यायाधीश सत्यमोहन जोशी थारू, प्रदेश नं २ का प्रदेश सांसद शङ्कर चौधरी, अतिथिहरू थारू कल्याणकारी समितिका केन्द्रीय पार्षदहरू राजेन्द्र महतो थारू, नन्दकिशोर पञ्जियारयार, गण्डक अस्पतालका सञ्चालक तथा नेकपा वीरगंजका अध्यक्ष रहबर अन्सारी, एलएस न्यूरो अस्पतालका न्यूरो सर्जन डा श्यामबाबू पटेल, आदर्श थारू छात्रावास वीरगंजका जग्गादाता जुगेश्वर चौधरी, नेपाल पत्रकार महासङ्घ पर्साका अध्यक्ष श्याम बन्जारा, प्रेस सङ्गठन पर्साका अध्यक्ष नीरज पीठाकोठेलगायतले शुभकामना मन्तव्य व्यक्त गरेका थिए ।
    कार्यक्रमको बारेमा अमयदास थारूले प्रकाश पारेका थिए । महोत्सवमा वीरगंजका विभिन्न निजी विद्यालयका छात्रछात्राहरूले सांस्कृतिक कार्यक्रम  प्रस्तुत गरेका थिए । थारू महिलाहरूले थारू लोक नृत्य घाँटो प्रस्तुत गरेका थिए । वक्ताहरूले थारू समुदायको माघी महोत्सव र महोत्सवमा समाजका सबै पक्ष्F तथा समुदायको सक्रिय सहभागिताले सकारात्मक सन्देश दिएको बताए । थारू महोत्सव समाजलाई जोड्ने पुलको रूपमा विकास हुँदै गएको वक्ताहरूको भनाइ थियो ।

Tuesday, January 14, 2020

बालविवाह नगराउने धर्मगुरुहरूको प्रतिबद्धता

बालविवाह नगराउने धर्मगुरुहरूको प्रतिबद्धता

विमला गुप्ता, वीरगंज, २९ पुस/
    पर्सा जिल्लाका विभिन्न धर्मका गुरु, पण्डित, पुरोहित, पास्टर (पादरी), मौलानालगायतले बालविवाह नगराउने प्रहरीसमक्ष सामूहिक प्रतिबद्धता व्यक्त गरेका छन् । सामुदाय–प्रहरी साझेदारी कार्यक्रम अन्तर्गत पहल संस्थाको संयोजनमा भएको बालविवाह न्यूनीकरण तथा रोकथामसम्बन्धी जनचेतनामूलक कार्यक्रममा हिन्दू, मुस्लिम, सिख, इसाई धर्मका गुरुहरूले यस्तो प्रतिबद्धता जनाएका हुन् ।
    जिल्ला प्रहरी कार्यालय पर्साको आयोजनामा भएको सो कार्यक्रमका संयोजक पर्साका प्रहरी उपरीक्षक सोमेन्द्र सिंह राठौरले बढ्दो बालविवाह न्यूनीकरणका लागि यस प्रकारको जनचेतनामूलक सन्देश विभिन्न धर्मगुरुहरूको माध्यमबाट सङ्कल्पको रूपमा प्रचारप्रसार हँुदा विभिन्न समुदायमा यसको सकारात्मक प्रभाव पर्ने बताए । साथै कम उमेरमा विवाह नगराउन तथा यस्ता घटनाको जानकारी पाउनेबित्तिकै स्थानीय प्रहरीलाई खबर गरिदिन सबै सहभागीलाई प्रउ राठौरले आग्रह गरेका थिए ।
    कार्यक्रममा पर्साका प्रहरी नायब उपरीक्षक गौतम थापाले बालबालिकाको सम्बन्धमा बनेको कानून तथा बालविवाहको अवस्थाका बारेमा वार्षिक तथ्याङ्क प्रस्तुत गरेका थिए । नेपालको सन्दर्भमा मुलुकी अपराध संहिता २०७४ मा विवाहको लागि उपयुक्त उमेर २० वर्ष भनी तोकिएको छ । नेपालको कानूनले केटाकेटी दुवैको उमेर २० वर्ष नपुगी गरेको विवाहलाई बालविवाह भनी पुष्टि गरेकोले यदि कसैले पनि कम उमेरमा विवाह गरे गराएमा कानूनीरूपमा अपराध ठहरिनेछ र कानून अनुसार दण्ड जरिवाना हुने प्रनाउ थापाले जानकारी गराए । विगतका दिनहरूमा पनि बालविवाहसम्बन्धी सचेतनामूलक कार्यक्रम गर्दै आएको जिल्ला प्रहरी कार्यालय पर्साले यस वर्ष पनि ग्रामीण भेगमा अभिभावकमुखी कार्यक्रम तथा प्रत्येक पालिकाको समन्वयमा प्रत्येक विद्यालयमा सचेतनामूलक कार्यक्रमको आयोजना गरिने जानकारी प्रनाउ थापाले गराए ।
    आव २०७५/७६ मा महिला तथा बालबालिका खोजतलाशका १३४ वटा निवेदन दर्ता भएकोमा १०२ जना फेला परेका प्रनाउ थापाले बताए । बढी हराउनेमा बालबालिका तथा महिला रहेका उनले जानकारी गराए । बालबालिकाको अधिकार हनन गरे ५० हजारदेखि ५ लाख रुपैयाँसम्म जरिवाना रहेको छ भने ३ महीनादेखि १५ वर्षसम्म जेलसजाय हुने कानूनी प्रावधान रहेको उनले जानकारी गराए ।
    बालविवाह गराएको खण्डमा सो विवाह स्वतः रद्द हुने तथा मन्जुरीविना विवाह तथा बालविवाह गराए दुई वर्षको कैदसजाय र २० हजार रुपैयाँसम्म जरिवाना हुने प्रनाउ थापाले जानकारी गराए ।
    विश्व हिन्दू परिषद् नेपालका पुरुषोत्तम दुबेले सरकारले चालेको कदम सराहनीय रहेको बताउँदै बालविवाह
रोक्न हिन्दू समाज पनि लागिपरेको जानकारी गराए । तर नेपाल सरकारले राखेको २० वर्षको उमेर बढी भएकोले विवाह उमेर १८ वर्ष राख्दा समय अनुसार अभिभावकहरूलाई सहज हुने बताए ।
    दलित समुदायमा बालविवाह बढी हुने भएकाले सो समुदायमा जनचेतनामूलक कार्यक्रम गर्नुपर्ने क्रिस्चियन समाजका राम प्रसादले अवगत गराए ।
    धर्मग्रन्थहरूमा कानून अनुसार उचित उमेरमा विवाह गर्नुपर्ने खुलस्त भएपनि शिक्षाको अभावमा अभिभावकहरूमा चेतनाको कमीले छोराछोरीहरूको २० वर्षभन्दा कम उमेरमैं विवाह गरिदिने समस्या यथावत् रहेको धर्मगुरुहरूले जानकारी गराए । हरेक धर्मका गुरुहरूले प्रवचन तथा धार्मिक समारोहमा सर्वसाधारणहरूलाई कम उमेरमा विवाह गर्दाको बेफाइदाका बारेमा जानकारी गराए प्रभावकारी हुने मदर्सा समाजका नुरुलहोदा आलमको भनाइ थियो ।
    पहल संस्थाका दिलीपराज कार्कीले सहजीकरण गरेको सो कार्यक्रममा मदर्सा बोर्ड प्रदेश २ का शशिकपूर मियाँँ, क्रिस्चियन समाजका नारायणप्रसाद आचार्य, सिख धर्मगुरु अमरजित सिंह, इन्सेक पर्साका अध्यक्ष केसी लामिछानेलगायत धर्मगुरुहरूको सहभागिता थियो ।

Find us