Showing posts with label प्रमुख समाचार. Show all posts
Showing posts with label प्रमुख समाचार. Show all posts

Saturday, March 6, 2021

आपसी सहमतिमा न्यायोचित मुआवजा दिए –नगरप्रमुख साह

आपसी सहमतिमा न्यायोचित मुआवजा दिए –नगरप्रमुख साह

प्रस, रौतहट, २२ फागुन/
गत वर्षकै निरन्तरता स्वरूप मौलापुर नगरपालिकाले यस वर्ष पनि स्थानीयको उत्साहवद्र्धक सहयोग, सद्भाव एवं सक्रिया सहभागितामा मधानी महायज्ञ विशेष समारोह–२०७७ को आयोजना गर्न लागेको नगरप्रमुख रिना साहले बताएकी छन्।
मौलापुरको महादेवस्थानमा आयोजित पत्रकार सम्मेलनमा शनिवार उनले महायज्ञ तयारीको क्रममा आवश्यक पर्ने जग्गा नगरपालिकाले स्थानीयसँग सहमति गरेर न्यायोचित मुआवजा दिएको बताइन्। किसानहरूलाई मुआवजा दिए तापनि आफूले मिहिनेत गरी लगाएको हरियो बाली आफ्नै आँखाअगाडि काटिदा उनीहरूको मनोभावलाई छुनु स्वाभाविक भएको उनले बताइन्।
विगत लामो समयदेखि ओझेलमा परेको महत्वपूर्ण सम्पदालाई सङ्घ तथा प्रदेश सरकारले विशेष प्राथमिकताका साथ अगाडि बढाउनुपर्नेमा नबढाइरहेको भन्दै उनले गुनासो व्यक्त गरिन्। नगरपालिकाको अगुवाइ तथा स्थानीय जनसमुदायको उत्साहवद्र्धक एकता र सक्रिय सहभागितामा अगाडि बढेको नगरप्रमुख साहको दाबी थियो। मौलिक धार्मिक अनुष्ठान मधानी (कवरथुवा) निरन्तर एक हप्तासम्म सञ्चालन हुने र त्यसमा भारत वृन्दावनको रासलीला, शिवलीला, नेपाल तथा भारतका चर्चित कलाकारहरूद्वारा सांस्कृतिक प्रस्तुति, विभिन्न खेलतमासा, नेपाल र भारतका प्रतिष्ठित पहलवानहरूको कुश्ती खेल, देशका विशिष्ठ राजनीतिक नेतृत्व एवं व्यक्तित्वहरूको सहभागितासहितको समारोह आयोजना गर्न लागिएको नगरप्रमुख साहले जानकारी गराइन्।
आर्थिक समुन्नति एवं विकासमा विशेष टेवा पुग्ने गरी मौलापुरको गरिमा, गौरव, मानसम्मान एवं प्रतिष्ठामा निरन्तर बढोत्तरी गर्ने उद्देश्यले उपप्रधानमन्त्री इश्वर पोखरेलको प्रमुख आतिथ्य तथा प्रदेश प्रमुख डा राजेश झासहितका अतिथिहरूको सहभागितामा मधानी महायज्ञ समारोह–२०७७ आयोजनाको तयारी अन्तिम चरणमा रहेको नगरप्रमुख साहले बताइन।
तराई–मधेस ऐतिहासिक, धार्मिक तथा सांस्कृतिक पर्यटनको उद्गमस्थल भएको बताउँदै उनले मौलापुर नगरपालिकाको पतौरा टोलमा महादेव मन्दिर महत्वपूर्ण सम्पदा भएको र सरकारको पर्यटकीय गन्तव्यमध्येको एक महत्वपूर्ण गन्तव्य रहेको बताइन्। उनले विगतका कमीकमजोरीलाई आत्मसात् गरी सुधार गर्दै जाने आश्वासन दिइन्। सो अवसरमा उपप्रमुख गौरीशङ्कर जयसवाल, प्रमुख प्रशासकीय अधिकृत रामबाबूप्रसाद साहलगायतको सहभागिता थियो।

Friday, March 5, 2021

भेडाहा र सिंघाही खोला उत्खननको स्वीकृति

भेडाहा र सिंघाही खोला उत्खननको स्वीकृति

प्रस, पर्सागढी, २१ फागुन/
वीरगंज महानगरपालिका–३१ स्थित भेडाहा खोला र पर्सागढी नगरपालिकाको सिंघाही खोलामा नदीजन्य पदार्थको उत्खनन पुनः शुरू भएको छ।
ठेक्का लागेर खोला उत्खनन हुँदै आएकोमा ठेक्का सकार गर्दा प्रारम्भिक वातावरणीय परीक्षण रिपोर्टको मापदण्डविपरीत कार्य भएको भन्दै जिल्ला अनुगमन समितिले माघ २० गते दुवै खोलामा उत्खनन अर्को निर्णय नहुन्जेलसम्म रोक्का राखेको थियो।

जिल्ला अनुगमन समिति, पर्साका संयोजक जिल्ला समन्वय समितिका सभापति नेक महम्मद अन्सारीले कार्यविधि बनाएर खोलाको उत्खनन मापदण्ड अनुसार गर्न निर्देशन दिंदै शुरू भएको बताए।
वीरगंज महानगर–३१ भेडाहा खोलामा एक साताअगाडिदेखि उत्खनन भइरहेको छ भने पर्सागढी नगरपालिका अन्तर्गत सिंघाही खोलामा दुई दिनअघिदेखि उत्खनन शुरू भएको अनुगमन समितिका संयोजक अन्सारीले बताए। उनले कार्यविधि बनाइएको र सो पालना भए नभएको बारेमा नियमित अनुगमनको जिम्मेवारी स्थानीय तहलाई दिइएको तथा सोविपरीत गर्नेलाई कसूर अनुसार कारबाई गर्ने कार्यविधिमा उल्लेख रहेको बताए।

Thursday, March 4, 2021

ठगी मुद्दाको आरोपमा जाटिया पक्राउ

ठगी मुद्दाको आरोपमा जाटिया पक्राउ

 प्रस, वीरगंज, २० फागुन/
वीरगंज, छपकैयाको रेलवे सडकको छेउमा रहेको श्रीराम कोलोनीका तत्कालीन जग्गाधनी प्रेम जाटियालाई ठगी गरेको आरोपमा जिल्ला प्रहरी कार्यालय, पर्साले पक्राउ गरेको छ।
श्रीराम कोलोनीको जग्गा खरीद गरी १७ वटा कित्तामा बिक्री गरेपछि मोहीवालाले हकदाबी गरेपछि प्रहरीले जाटियालगायत पाँचजनामाथि सङ्गठित ठगी मुद्दा दर्ता गरेको छ। श्रीराम कोलोनीको जग्गा १७ कित्तामा बिक्री गर्दा तत्कालीन अवस्थामा मोही नदेखिएको र पछि मोहीवालाले मुद्दा गरेपछि आफूहरू ठगिएको भन्दै कृष्ण सर्राफलगायत अन्य पीडितले जिल्ला प्रहरी कार्यालय, पर्सामा उजूरी दर्ता गराएका थिए। पीडित सर्राफका अनुसार २०६० सालमा सो जग्गाको बिक्री शुरू भएको र आफूहरू २०६५ सालदेखि घर बनाएर बसिरहेको अवस्थामा अहिले आएर एक्कासि मोहीवालाले भूमिसुधारमा मुद्दा गरेपछि न्यायको लागि पीडितहरू जिल्ला प्रहरी कार्यालय पुगेका थिए।

पीडित सर्राफका अनुसार जग्गाधनी रुद्रदेवी उपाध्यायबाट गोपाल अग्रवाल र अग्रवालबाट प्रेम जाटिया र त्यसपछि १७ जनाले सो जग्गा खरीद गरेका थिए।
६० नं कित्ताबाट २०६० सालमा जाटियाले ७ कट्ठा जग्गा खरीद गर्दा गोपाल अग्रवालको लालपुर्जामा मोही देखिएको तर जाटियाको लालपुर्जामा मोही महल खाली रहेकोले आफूहरूले स्वच्छ जग्गा खरीद गरेको सर्राफले
बताए।
पीडितहरूले जाटिया, उनकी पत्नी, गोपाल अग्रवाल, मोहीवालालगायत पाँचजनामाथि मुद्दा दर्ता गरी अनुसन्धान शुरू गरेको छ।
१० वर्षसम्म मोहीवाला चुप लागेर बसेको र आफ्नो हकभोगको जग्गा अहिलेसम्म किन नलिएको भन्दै प्रहरीले पाँचजनामाथि मुद्दा लगाएको प्रहरी उपरीक्षक बेलबहादुर पाण्डेले बताए। उनका अनुसार १५ वटा प्रश्नसहित सो जग्गासम्बन्धी अन्य सक्कल कागजातसहित उपस्थित हुन भूमिसुधार कार्यालयलाई पत्राचार गरेको बताए। प्रहरी स्रोतका अनुसार जाटिया दुई दिनदेखि प्रहरीको नियन्त्रणमा छन्।

Wednesday, March 3, 2021

मुलुकलाई असहज अवस्थाबाट निकास दिन नेका तयार –देउवा

मुलुकलाई असहज अवस्थाबाट निकास दिन नेका तयार –देउवा

प्रस, गरुडा, १९ फागुन/
नेपाली काङ्ग्रेसका सभापति एवं पूर्वप्रधानमन्त्री शेरबहादुर देउवाले मुलुकलाई वर्तमान असहज अवस्थाबाट आवश्यक परे निकास दिन नेपाली काङ्ग्रेस तयार रहेको बताएका छन्।
रौतहटको गढीमाई नगरपालिका–६ धर्मपुर–सिङ्गारवन गाउँमा बुधवार विष्णु महायज्ञको उद्घाटन गर्दै देउवाले नेकपाको आन्तरिक विवादका कारण दुई तिहाइको सरकार अप्ठ्यारोमा परेको र मुलुक असहज अवस्थामा पुगिसकेको बताए। यसै असहज अवस्थामा देश रहिरहन नसक्ने हुँदा असजताको निकासको लागि नेपाली काङ्ग्रेस आवश्यकता अनुसारको भूमिका निर्वाह गर्न तयार रहेको बताए।

सत्ता सञ्चालन कसरी गर्ने भन्ने विषयमा नेकपाभित्र गुटगत आन्तरिक स्वार्थले काम गरेको र सोही विवादको कारण सिङ्गो मुलुक नै अनिर्णयको बन्दी बन्न पुगेको बताउँदै देउवाले देश राजनीतिक अस्थिरतातर्फ धकेलिएको बताए। सभापति देउवाले सङ्घीय गणतन्त्रलाई जोगाउन आवश्यकता परेको खण्डमा सबै कुरामाथि विचार गरेर नेपाली काङ्ग्रेसले सकारात्मक भूमिका निर्वाह गर्ने स्पष्ट पारे।
धार्मिक कार्यक्रममा पुगेका देउवाले सनातन हिन्दू धर्मसहित अन्य धर्म मान्ने समुदायको रक्षार्थ नेपाली काङ्ग्रेस लागिपरेको हुँदा नेपाललाई शान्ति एवं अहिंसाको मुलुक बनाउनेतर्फ आफ्नो भूमिका सधैं सकारात्मक रहने पनि स्पष्ट पारे।
कार्यक्रममा पूर्व गृह राज्यमन्त्री तथा नेपाली काङ्ग्रेस मकवानपुरका अध्यक्ष इन्द्र बानियाँले धरमपुरबाट धर्मको यात्रा शुरू भएको, सनातन हिन्दू धर्मसहित अन्य धर्म मान्नेहरूको धार्मिक स्वतन्त्रताको पक्षमा उचित सम्मान गर्दै नेपाली काङ्ग्रेस नेपाली जनताको पक्षमा मुलुकलाई निकास दिन तयार रहेको बताए।
कार्यक्रममा नेपाली काङ्ग्रेसका विभिन्न तहका नेताहरूले पनि मन्तव्य राखेका थिए। ठूलो जनसहभागिता रहेको कार्यक्रममा नेपाली काङग्रेसबाट निर्वाचित जनप्रतिनिधिहरूको पनि सहभागिता थियो। कार्यक्रममा गढीमाई नगरपालिकाको तर्फबाट नगरका निमित्त प्रमुख प्रशासकीय अधिकृत नागेन्द्र यादवले १०५ किलोको माला लगाएर देउवालाई स्वागत गरेका थिए।
महायज्ञ फागुन २९ गतेसम्म सञ्चालन हुने आयोजकले जनाएको छ। महायज्ञस्थलमा विभिन्न खेलतमासा, रासलीला, रामलीलासहितका विभिन्न झाँकीहरू प्रदर्शन गर्न भारतबाट कलाकारहरू आएको बताइएको छ।

Tuesday, March 2, 2021

मेलाको नाउँमा गहुँखेतीमा डोजर चल्यो, किसान आक्रोशित

मेलाको नाउँमा गहुँखेतीमा डोजर चल्यो, किसान आक्रोशित

प्रस, रौतहट, १८ फागुन/
    मौलापुर नगरपालिकामा यही फागुन २७ गते महाशिवरात्रिमा लाग्ने मेलाको लागि किसानले लगाएको तीन बिघा गहँुखेतीमा डोजर चलाइएको छ।
    किसानहरूले शिवरात्रि मेलाको लागि आफूहरूले लगाएको बाली नष्ट गरिनु चरम ज्यादती भएको प्रतिक्रिया दिएका छन्।
    मौलापुर नगरपालिकाकी प्रमुख रिनादेवी साह हुन्। उनका पति प्रभु साह शहरी विकासमन्त्री हुन्। दुवैजना शक्तिशाली पदमा भएको कारण उनीहरूको आग्रहमा महाशिवरात्रि मेलाको उद्घाटन गर्न राष्ट्रपति विद्यादेवी भण्डारी आउँदैछिन्। धार्मिक कार्यक्रमको आयोजना हुन लागेकोमा स्थानीयहरू खुशी छन्। सो परियोजनको लागि किसानहरूले लगाएको गहुँबालीमा डोजर लगाएकोमा अहिले मौलापुरका किसान मात्र हैन अन्य व्यक्ति पनि आक्रोशित भएका छन्। स्थानीय किसानहरूले मन्त्री र नगरप्रमुखको कारण आफ्नो गहुँखेती नष्ट भएको प्रतिक्रिया दिएका छन्।

    वैकल्पिक बाटो नरोजी पाक्न लागेको गहुँखेतीमा डोजर चलाएर कार्यक्रम आयोजना गर्नु चरम तानाशाहको नमूना भएको आरोप लगाए। किसानहरूले तीन बिघा गहुँखेतीको क्षतिपूर्ति माग गरेका छन्। राष्ट्रपतिको कार्यक्रम जनहितका लागि हुनुपर्नेमा सोविपरीत गरिनु र ाष्ट्रपति सहभागी हुनु शोभादायक नहुने किसानहरूले बताएका छन्। आफूहरूले गहुँखेतीबाट जीविकोपार्जन गर्ने र सोमा डोजर चलाउने र त्यसको उद्घाटन राष्ट्रपतिले गर्ने हो भने जनविश्वास गुम्ने किसानहरूको प्रतिक्रिया छ। तीन बिघा गहुँखेती मौलापुरका चार–पाँच किसानको हो।
    मौलापुर नगरपालिकाकी प्रमुख साहले भने क्षतिपूर्ति दिने शर्तमा गहुँबालीमा डोजर चलाएको बताएकी छिन्। उनले ‘क्षतिपूर्ति दिने भनेका छौं र दिन्छौं’ भनी प्रतिक्रिया दिएकी छन्। तर किसानहरूले कार्यक्रमअगावै क्षतिपूर्ति दिनुपर्ने माग गरेका छन्। उनीहरूले कार्यक्रमपछि क्षतिपूर्ति दिने कुरामा विश्वस्त हुन नसकिने बताए।

 कृषिजन्य अनुदान उपकरणमा किसानको चासो भएन

कृषिजन्य अनुदान उपकरणमा किसानको चासो भएन




प्रस, परवानीपुर, १७ फागुन/
    आधुनिक युगमा खेती किसानी गर्न दैनिक ज्यालादारीमा कामदारहरू सहजै पाउने अवस्था छैन, जसको कारण कृषिमा यान्त्रीकरणको विशेष महत्वपूर्ण योगदान छ। तैपनि पर्सा जिल्लाका किसानहरू अनुदानको सुविधा उपभोग नगरी आफ्नै लगानीमा कृषिजन्य यन्त्र खरीद गर्छन्।
    कृषि ज्ञान केन्द्र पर्साका अनुसार विगत एक महीनादेखि विभिन्न शीर्षकमा अनुदान सुविधाको लागि १२/१३ वटा सूचना प्रकाशित गर्दा पनि किसानहरूको आकर्षण देखिएको छैन। केन्द्रका निमित्त प्रमुख मुनीलाल प्रसादका अनुसार चालू आवमा कृषि यान्त्रीकरण शीर्षकमा विकासको क्षेत्रमा रु ४ करोड ४० लाख बजेट भए तापनि किसानहरूको न्यून सहभागिताले गर्दा ठूलो रकमको बजेट फ्रिज हुने अवस्थामा पुगेको छ। उनका अनुसार किसानहरूले अनुदानको सुविधा उपभोग गर्न श्रमदानको रकम दिने डरले निवेदन नदिने गरेको र निवेदन नदिंदा छनोट प्रक्रियाबाट वञ्चित हुँदै अनुदान सुविधा खेर जाने अवस्था सृजना भएको छ।
    उनले भने, “सरकारले किसानका लागि ट्याक्टरमा जोडेर प्रयोग गर्ने थुप्रै यन्त्रहरू जस्तै हैरो, कल्टिभेटर, फार, लेभलर, थ्रेसर, स्वचालित रिपर, बोरिङ (स्यालो ट्युबवेल)लगायतका लागि सूचना प्रकाशित गरेको छ। तर फाटफुट किसानले मात्र निवेदन दिएका छन्।”
    श्रमदानको रकम दिने डरले निवेदन नदिंदा बजेट नै फ्रिज हुने अवस्था आएकोले सम्पूर्ण किसानलाई समयमैं निवेदन दिन उनले अपील गरे। उनका अनुसार किसानले श्रमदान रकमको डरले निवेदन दिंदैनन् तर त्योभन्दा महँगो मूल्यमा निजी पसलबाट यन्त्र खरीद गर्ने रवैया दुःखदायी भएको जानकारी गराए। यस्तै, प्राविधिक तथा पूर्वप्रमुख डा यादवको उदासीनताका कारण करीब रु १४ करोडको बजेट पोहोर साल पनि फ्रिज भएको कृषि ज्ञान केन्द्र पर्साका कर्मचारी बताउँछन्।
    निवेदन दिंदा करीब १ बिघा जग्गाको लालपुर्जा, नागरिकताको प्रतिलिपि र ट्याक्टरमा लाग्ने उपकरणको हकमा ट्याक्टरधनीको ब्लुबूक आवश्यक पर्छ तर यी सबै कुराका बारेमा सर्वसाधारण किसानलाई ग्रामीण भेगमा सही समयमा सही सूचना नपुग्दा उनीहरू निवेदन दिनट हिचकिचाउने गरेको बताइन्छ।  
    श्रमदानको रकम पचास प्रतिशतदेखि पचहत्तर प्रतिशतसम्म रहने गर्दा रीतपूर्वक निवेदन दिएर सेवा उपभोग गर्न आउने किसानहरूले कम्तीमा आधा मूल्यबराबर अनुदान सहयोग पाउने भए तापनि उनीहरू यो सेवाबारे गम्भीर नभएको केन्द्रका निमित्त प्रमुख मुनीलाल प्रसादको भनाइ छ।
    केन्द्रले बोरिङ (स्यालो ट्युबवेल), कृषि यान्त्रीकरण, फलफूल तथा तरकारी बजारीकरण, बीउबिजन, हाटबजार शुद्धीकरण, पर्यावरण, ग्रेडिङ–प्याकेजिङ, गोदाम व्यवस्थापन तथा किसानलाई उपयुक्त तालीम र मरम्मत सम्भार जस्ता शीर्षकमा बजेट रहेको बताएको छ।


केन्द्रको गाडी पूर्वप्रमुखले लगे
    कृषि ज्ञान केन्द्र पर्साको प्रमुख चढ्ने गाडी तत्कालीन प्रमुख डा रामचन्द्र यादवले लिएर गएका छन्। करीब ६ महीनाअघि सरुवा भएर कृषि ज्ञान केन्द्र महोत्तरीमा जाँदा उनले प्रपञ्च रचेर आफूसँगै उक्त गाडी लिएर गएको कृषि ज्ञान केन्द्र पर्साले गुनासो गरेको छ।
    प्रदेश सरकार मातहत भूमि व्यवस्था, कृषि तथा सहकारीमन्त्री शैलेन्द्र साह र सो मन्त्रालयका सचिवको मिलेमतोमा प्रमुख चढ्ने पिकअप भ्यान उनले महोत्तरी लगेका हुन्। मन्त्रालयका सचिवलाई मिलाएर मन्त्रीको निर्देशनमा उक्त गाडी सरुवा भएर जाँदा हस्तान्तरण गराएको केन्द्र पर्साका निमित्त प्रमुख मुनीलाल प्रसादले आरोप लगाए। उनले भने, “हाकिम साहबको तानाशाही प्रवृत्तिका कारण कृषि ज्ञान केन्द्र पर्साको सम्पत्ति भए तापनि उनले निजी स्वार्थको लागि गाडी महोत्तरी लगेका हुन्। यसमा प्रदेश सरकारको ध्यान जान जरुरी छ र गाडी जसरी पनि फिर्ता गर्नुपर्छ।”
    अहिले कार्यालयमा गाडी नहुँदा पुरानो गाडी मरम्मत गरेर उपयोग गर्नुपरेको र यात्रा गर्न र फिल्डमा जान समस्या भएको उनले बताए।

Sunday, February 28, 2021

पोखरिया अस्पतालमा चिकित्सकहरूको आलोपालो, बिरामी मर्कामा

पोखरिया अस्पतालमा चिकित्सकहरूको आलोपालो, बिरामी मर्कामा

 धर्मेन्द्र चौरसिया, पोखरिया, १६ फागुन/
पर्सा जिल्लाको केन्द्रबिन्दुमा रहेको पोखरिया नगरपालिकास्थित पोखरिया अस्पतालको व्यवस्थापन पक्ष कमजोर हुँदा सो भेगका हजारौं सेवाग्राहीले प्रभावकारी सेवा पाइरहेका छैनन्।
अस्पताल विकास समितिले एकातिर अस्पताल व्यवस्थापनमा चासो दिएको छैन भने अर्कोतिर अस्पतालका मेडिकल सुपरिटेन्डेन्ट डा अनिल यादवको लापरवाहीका कारण अस्पताल अहिले स्वास्थ्य चौकीजस्तै सञ्चालन भइरहेको छ। आवश्यक दक्ष जनशक्ति हुँदा पनि बिरामीहरूले अस्पतालबाट गुणस्तरीय र प्रभावकारी सेवा नपाएका छैनन्। अस्पतालमा ६ जना चिकित्सक छन्, उनीहरूले दैनिक सेवा दिनुपर्नेमा ६ दिनको लागि आलोपालो ड्युटी मिलाएका छन्।

पोखरिया अस्पतालमा मेसु डा अनिल यादवलगायत डा विनयकुमार यादव, डा सञ्जय गुप्ता, डा दीपेन्द्र मण्डल, डा मृगेन्द्रसिंह यादव, डा सुरेन्द्र यादव गरी ६ जना चिकित्सक नियुक्त छन् भने दुईजना स्टाफ नर्स, सरकारबाट दुईजना अहेब र अस्पताल विकास समितिबाट पाँचजना अहेब, सरकारीबाट दुईजना अनमी र अस्पताल विकास समितिबाट पाँचजना अनमी गरी कार्यालय सहयोगीको दरबन्दी छ। आवश्यक चिकित्सक तथा स्वास्थ्यकर्मी हुँदा पनि एक दिनमा एकजना चिकित्सकले मात्र चेकजाँच गर्दा बिरामीहरू घण्टौंसम्म पालो पर्खनुपर्ने तथा अनुभवी चिकित्सक नआएको दिन नयाँ चिकित्सकबाट राम्रो उपचार नपाउने गरेको बिरामीहरूको गुनासो छ।
पोखरिया अस्पतालमा दैनिक सयदेखि डेढ सयजना बिरामी आउने गरेका छन्। अस्पतालको सेवा खस्किंदै गएपछि अहिले दैनिक करीब पचासजना बिरामी आउने गरेका छन्। ती पचासजना बिरामीलाई एकजना चिकित्सकले चेकजाँच गर्दा दिन बित्छ। पोखरियावासीले अस्पतालको सेवा यस्तै रहने हो भने अस्पताल बन्द गर्न पोखरिया नगरपालिकासँग आग्रह गरेका छन्।
यस विषयमा अस्पताल विकास समितिका अध्यक्ष एवं पोखरिया वडा नं ४ का अध्यक्ष लक्ष्मणसाह कानूले भोलि सोमवार अस्पतालका मेसु डा यादवलाई बोलाएको र उनीसँग अस्पतालसम्बन्धी गुनासाबारे सोधपूछ गर्ने बताए। चिकित्सकको लापरवाही देखिए उनीहरूलाई कारबाई गर्ने चेतावनी उनले दिए। यता, अस्पतालका मेसु डा यादवले दैनिक बिरामीको सङ्ख्या घटेकाले केही चिकित्सक अनुपस्थित रहने गरेको प्रतिक्रिया दिएका छन्।

Saturday, February 27, 2021

आयुर्वेदबाट मुुलुक समृद्ध बन्न सक्छ –राज्यमन्त्री यादव

आयुर्वेदबाट मुुलुक समृद्ध बन्न सक्छ –राज्यमन्त्री यादव

प्रस, वीरगंज, १५ फागुन/
नेपाल आयुर्वेद औषधि व्यवसायी सङ्घ, प्रदेश नं २ अन्तगर्त पर्सा, बारा, रौतहत जिल्लाको प्रथम संयुक्त जिल्ला भेला तथा तथा प्रथम जिल्ला अधिवेशन शनिवार वीरगंजमा सम्पन्न भयो। कार्यक्रमको उद्घाटन प्रदेश २ सरकारका भूमि व्यवस्था कृषि तथा सहकारी राज्यमन्त्री योगेन्द्रराय यादवले गरेका थिए।
कार्यक्रमका मुख्य अतिथि राज्यमन्त्री  यादवले जडीबुटी तथा आयुर्वेदको माध्यमबाट मुुलुक समृद्ध बन्न सक्ने बताए। आयुर्वेद हाम्रो मुलुकको प्राचीन चिकित्सकीय पद्धति रहेको र वर्तमान विश्वमा आयुर्वेदको महत्व दिन प्रतिदिन बढिरहेको अवस्थामा मुलुकको सरकारले यसतर्फ पहलकदमी गर्न नसकेको बताए। मानव शरीरको लागि आयुर्वेद नै सबैभन्दा महत्वपूर्ण उपचार पद्धति भएको तथ्य विज्ञानले प्रमाणित गरिसकेको र हामीबाट अन्य मुलुकले सिकेर आधुनिक अङ्ग्रेजी औषधिको विकास गरेको चर्चा गर्दै उनले मुलुकमा प्राकृतिकरूपमा जडीबुटी उपलब्ध हुने र कतिपय जडीबुटीको व्यावसायिक खेती पनि हुने भएकोले यसतर्फ ध्यान दिन सके निरोगिताका साथै स्वरोजगारको प्रशस्तै सम्भावना रहेको भन्दै प्रदेश २ सरकारले यसको अध्ययन, पहिचान, उत्पादन, व्यवसाय प्रवर्धनतर्फ अधिकतम प्रयास गर्ने प्रतिबद्धता जाहेर गरे।

नेपाल आयुर्वेद औषधि व्यवसायी सङ्घ प्रदेश २ का अध्यक्ष श्यामसुन्दरको अध्यक्ष्Fतामा भएको कार्यक्रममा प्रदेशका विभिन्न जिल्लास्थित आयुर्वेद औषधिका व्यवसायी, आयुर्वेदसँग सम्बन्धित सङ्घ/संस्थाका पदाधिकारी, आयुर्वेद चिकित्सक, वैद्यलगायतको सहभागिता थियो।
सङ्घको बन्दसत्रमा पर्सा, बारा, रौतहटको छुट्टाछुट्टै जिल्ला कार्यसमिति गठन गर्ने कार्यक्रम रहेकोमा बारा र रौतहतको कार्यसमिति सौहार्दपूर्णरूपमा गठन भएपनि पर्सामा भने विवाद भएको छ।
पर्सा जिल्ला सङ्घको अध्यक्षमा राजेशकुमार गुप्ता र गणेश साह प्रतिस्पर्धामा रहेकोमा सहमति हुन नसकेपछि वादविवाद भएको थियो। प्रतिस्पर्धी समूहबाट गालीगलौजका साथै बलमिचाइँको अवस्था ल्याउन खोजिएको भन्दै गुप्तालगायत उनको प्यानलले कार्यक्रम बहिष्कार गरेर बाहिरिएको थियो। एकतर्फीरूपमा जिल्ला कार्यसमिति घोषणा गरिए मान्य नहुने र आफू अदालत जान बाध्य हुने अध्यक्ष पदका उम्मेदवार गुप्ताले चेतावनी दिएका छन्।

Friday, February 26, 2021

सर्वोच्चको फैसलाले देशमा अस्थिरता थपियो –मन्त्री प्रभु साह

सर्वोच्चको फैसलाले देशमा अस्थिरता थपियो –मन्त्री प्रभु साह

प्रस, वीरगंज, १४ फागुन/
    शहरी विकासमन्त्री प्रभु साहले पछिल्लोपटक सर्वोच्च अदालतको संसद् विघटनको सम्बन्धमा गरेको फैसलाले देशमा अस्थिरता निम्त्याएको बताएका छन्।
    पर्साको छिपहरमाई गाउँपालिकाको टिहुकी सेढाको चौरमा आयोजित अगुवा कार्यकर्ता भेला तथा पार्टी प्रवेश कार्यक्रममा सम्बोधन गर्दै उनले बहुमतको सरकारको प्रधानमन्त्रीले विघटन गरेको संसद्लाई सर्वोच्चले फैसला गर्दै जीवित पारेकोप्रति असन्तुष्टि जनाउँदै उनले सर्वोच्चको फैसलाले देश सङ्कट तथा अस्थिरतातर्फ गएको टिप्पणी गरे।
    कार्यक्रममा मन्त्री साहले भने, “करीब दुई तिहाइ बराबरको सरकारका प्रधानमन्त्रीलाई नेकपाकै केही नेताको स्वार्थमा हटाउन षड्यन्त्र भएपछि प्रधानमन्त्रीले बाध्य भएर संसद् विघटन गर्ने निर्णयमा पुग्नुभयो, त्यसपछि देश चुनावमा गइरहेको बेला अचानक सर्वोच्चको फैसलाले देशलाई सङ्कटमा धकेलेको छ।”

    उनले प्रदेश सरकार भ्रष्टाचारमा लिप्त भएको चर्चा गर्दै माता जानकी जनकपुरधाम अहिले कमिशनको लेनदेन गर्ने अखाडा बनेको पनि उनले बताए। उनले प्रदेश सरकारले तीन वर्षमा प्रदेश २ का जनताको हित हुने कुनै पनि उदाहरणीय विकासको काम नगरेको पनि आरोप लगाए। प्रदेश सरकारको अहिलको मुख्य एजेन्डा प्रदेश विकसित र समृद्ध पार्नुपर्नेमा खाली बजेटमा कमिशन खोज्ने मात्र भएको पनि मन्त्री साहको आरोप थियो।
    छिपहरमाई गाउँपालिका समितिका अध्यक्ष प्रह्लाद गुप्ताको अध्यक्षतामा भएको कार्यक्रममा नेकपा पर्साका जिल्ला अध्यक्ष प्रभु हजरा, संविधानसभा सदस्य राजकुमार गुप्ता, जयप्रकाश थारू, प्रदेश कमिटी सदस्य बलिराम साह, गापा अध्यक्ष मनोज गुप्ता, सुवास साहलगायतले मन्तव्य व्यक्त गरेका थिए। सो अवसरमा विभिन्न पार्टी परित्याग गरी नेकपामा प्रवेश गरेकाहरूलाई स्वागत गरिएको थियो।

Thursday, February 25, 2021

सामुदायिक विद्यालयमा दिवाखाजा कार्यक्रम चलेन

सामुदायिक विद्यालयमा दिवाखाजा कार्यक्रम चलेन

राधेश्याम पटेल, परवानीपुर, १३ फागुन/
कोरोना महामारीको त्रासका कारण ठप्प रहेका पर्साका सबै सामुदायिक विद्यालय सञ्चालनमा आइसकेका छन्। पर्साका १४ वटा पालिकामा रहेका करीब ३ सय विद्यालय सञ्चालनमा आइसकेका भएपनि उक्त विद्यFलयहरूमा दिवाखाजा कार्यक्रम भने अनिश्चित भएको छ।
करीब दुई महीनादेखि विद्यालयहरू सञ्चालनमा रहे तापनि सम्बन्धित पालिकाले दिवाखाजा कार्यक्रम शुरू गराउन सकेका छैनन्।
पर्साका पटेर्वासुगौली गाउँपालिका र पोखरिया नगरपालिकाबाहेक अन्य पालिकामा दिवाखाजा कार्यक्रम पुनः शुरू हुन नसकेको अभिभावकहरूले गुनासो गरेका छन्।
गत पुस दोस्रो सातादेखि सरकारको निर्देशनविनै अभिभावकहरूको मन्जुरीमा सुरक्षा मापदण्ड पूरा गरी सामुदायिक विद्यालयहरू खुलेका थिए।

विद्यार्थीहरूको भविष्य अन्योलमा नपरोस् भन्ने उद्देश्यका साथ पठनपाठन शुरू गर्ने विद्यालय प्रशासन, विद्यालय व्यवस्थापन समिति, अभिभावक तथा सम्बन्धित पालिकाले छलफल गरी विद्यालय सञ्चालनमा ल्याएका थिए। तर करीब दुर्ई महीनादेखि विद्यालय नियमित सञ्चालन भइरहँदा पनि प्राथमिक तहको लागि उपलब्ध गराइने दिवाखाजा कार्यक्रमको बजेट पालिकाले विद्यालयलाई निकासा नगरेको प्रधानाध्यापकहरूले बताएका छन्।
वीरगंज–१८ भवानीपुरस्थित एक विद्यालयका प्रधानाध्यापकले भने, “विद्यालय सञ्चालन भइसकेपछि विद्यार्थीहरूले टिफिनको समयमा खाजा खोजिरहेका छन्, तर हामीले महानगरमा पटक–पटक भन्दा पनि खाजाको लागि रकम पठाइएको छैन।” उनले बजेट माग्न जाँदा शिक्षा प्रशासन महाशाखाका अधिकारीहरूले सरकारले विद्यालय खोल्न नभनेको तर तपाईंहरूले मनलाग्दीरूपमा विद्यालय खोलेको भन्दै खाजाको रकम नपाइने बताएको गुनासो गरे। यता, नेपाल शिक्षक महासङ्घ वीरगंज नगर समितिका अध्यक्ष विनोद मेहताले खाजाको रकम वितरण गर्ने विषयमा तत्काल छलफल गरी समस्या समाधान गराउने आश्वासन दिए।
नेपाल शिक्षक महासङ्घ पर्सा जिल्ला अध्यक्ष तीर्थराज यादवका अनुसार केही पालिकामा आंशिकरूपमा खाजा कार्यक्रम शुरू भएको र केहीमा अझै बाँकी रहेको बताए। उनले सम्बन्धित पालिकाका जनप्रतिनिधिहरूको उदासीनताको कारण खाजा कार्यक्रम पुनः शुरू हुन नसकेको बताए। उनले यस विषयमा सबै पालिकाका प्रमुख तथा वडाध्यक्षहरूको पनि ध्यान जानुपर्ने धारणा राखे।

Wednesday, February 24, 2021

नेकपा र जसपा सर्वोच्चको निर्णयप्रति खुशियाली मनाउँदै

नेकपा र जसपा सर्वोच्चको निर्णयप्रति खुशियाली मनाउँदै

प्रस, वीरगंज, १२ फागुन/
प्रधानमन्त्री केपीशर्मा ओलीले फागुन ५ गते संसद् विघटन गरेपछि प्रतिगमनविरुद्ध आन्दोलनरत जनता समाजवादी पार्टी, नेकपा प्रचण्ड–नेपाल समूहले आज छुट्टाछुट्टै विजय जुलूस निकालेका छन्।
घण्टाघरबाट निकालेको विजय जुलूस नगर परिक्रमापछि पुनः घण्टाघरमा आमसभामा परिणत भएको थियो।
विजय जुलूसमा बोल्दै जसपाका कार्यकारी सदस्य लक्ष्मणलाल कर्णले अदालतको फैसलाले नेपालको संविधान जोगाएको बताए। उनले ओलीले चालेको कदमविरुद्ध अदालतको फैसला आउनेबित्तिकै नैतिकताको आधारमा ओलीले राजीनामा दिनुपर्ने बताए। उनले प्रधानमन्त्री ओलीको संसद्मा अविश्वास प्रस्तावको सामना गर्ने भनाइ निन्दनीय तथा नैतिकताहीन रहेको बताए।
नेपालमा ओलीले तानाशाही लाद्न खोजेको उनको आरोप थियो। सर्वोच्चले गरेको फैसलाले देशको समस्या समाधान नहुने तर सही बाटोमा मुलुक हिंडेको बताए। देशको अवस्था अहिले पनि गम्भीर रहेको र एक्लो सरकार बनाउने हैसियत कसैको नरहेको उनले बताए। प्रम ओलीलगायत उनका सहयोगीहरूको कारण देश सङ्कटतर्फ उन्मुख भएको उनको तर्क थियो। संविधानको रक्षा, लोकतन्त्र बचाउने जिम्मा राष्ट्रपतिको रहेको र राष्ट्रपति पनि प्रम ओलीको मतियार बनेको बताए।

कार्यक्रममा बोल्दै निर्वाचन क्षेत्र नं. १ का सांसद प्रदीप यादवले आजको दिन ऐतिहासिक भएको बताए। ओलीले चालेको कदमविरुद्ध आन्दोलन गर्दा बाटोमा जिस्काउनेहरू आज हामीसँग विजय जुलूसमा सहभागी हुनु सुखद भएको यादवले बताए। सर्वोच्चले गरेको फैसलाले लोकतन्त्र तथा संविधानको रक्षा भएको र अब प्रतिगमनविरुद्ध लडाइँ संसद्बाट शुरू हुने बताए।
जिल्ला अध्यक्ष रामनरेश यादवको सभापतित्वमा भएको कार्यक्रममा प्रदेश सांसद करीमा बेगम,  केन्द्रीय सदस्य शिव पटेल, जगदीश पटेल, वीरगंज महानगरका प्रमुख विजय सरावगी, पोखरिया नगरपालिकाका उपप्रमुख सलमा खातुन, सखुवापरसौनी गापाका अध्यक्ष प्रदीप जैसवाललगायतले मन्तव्य व्यक्त गरेका थिए।
त्यसैगरी नेकपा प्रचण्ड–माधव समूहले आयोजना गरेको विजय जुलुसमा बोल्दै संविधानसभा सदस्य विचारी यादवले ओलीलाई संसद्बाट घोक्राएर निकाल्ने बताए। वीरगंजमा रहेका उनका सहयोगीहरू कुन दुलोमा लुकेका छन् बाहिर आएर जनतालाई आफ्नो अनुहार देखाऊन् भने। कार्यक्रममा संविधानसभा सदस्य रामचन्द्र साहले ओलीको १५ दिन मात्र बालुवाटारमा बस्ने र त्यसपछि बालकोट फर्कने निश्चित भएको बताए। आफ्नै कर्तुतले मर्यादा खस्केको उनको भनाइ थियो। विगत सात वर्ष अघि उचाइमा पुगेका ओली एकाएक आफ्नो हठको कारण शून्यमा झरेको र पतनोन्मुख भएको उनको आरोप थियो।
जिल्ला सचिव विजय महतोको सभापतित्वमा किशोरी कुशवाहा, जालीम मियाँ, मनोज चौधरी, रामबाबू बैठा, बाबूराम कौशिकलगायतले मन्तव्य व्यक्त गरेका थिए।
कार्यक्रममा नेकपा र जसपाका नेता कार्यकर्ताहरूले परस्पर मीठाइ वितारण गरेका थिए।

Tuesday, February 23, 2021

किसानका लागि स्थानीय पालिकाले बजेट खुम्च्याउँदै छन्

किसानका लागि स्थानीय पालिकाले बजेट खुम्च्याउँदै छन्

 सुषमा शर्मा, वीरगंज, ११ फागुन/
“न हामीलाई सशर्तबाट कति बजेट आयो थाहा छ, न त स्थानीयले कति छुट्यायो थाहा छ। हामीलाई ऋण लिनु छ, खेती गर्नुपर्छ, पहिले किसानको लागि केही गरेको हुन्थ्यो भने चुनावपछि पहिले जति पनि केही भएको छैन, त्यसैले हामीलाई मतलब हुँदैन,” बहुदरमाई नगरपालिकाको गम्हरियाका किसान विनोद कुशवाहा भन्छन्।
हामीलाई सेवा सुविधा दिए लिन्छौं, हैन भने त्यसको पछि लाग्न समय हँुदैन। खेतीपातीमा लाग्ने कि सेवा सुविधामा। सेवा सुविधामा लागेको खण्डमा खेतीपाती बिग्रने उनको भनाइ छ। उनले यी सबै काम नेताहरूले सृजना गरेका नक्कली किसानहरूको लागि भएको बताए। किसान लक्षित काम गर्ने हो भने वास्तविक किसानको पहिचान वडास्तरबाट गर्न नसकिने कुरा होइन। तर चाहना नभएको र जुन काममा पनि अनियमितता, कमिशनखोरी हावी भएकोले कृषि क्षेत्र पनि त्यसैबाट प्रभावित भएको किसान कुशवाहाको आरोप छ। सङ्घ, प्रदेश र स्थाीनय तहले किसानको लागि सशर्त बजेट विनियोजन गर्दै आएका छन्। स्थानीय तहले बजेट विनियोजन नगरे पनि सङ्घ र प्रदेश सरकारले किसान लक्षित सशर्त बजेट पठाएका छन्। पर्सा जिल्लामा रहेका १४ वटा पालिकामध्ये सखुवाप्रसौनीले ४० लाख, पकाहामैनपुरले ३० लाख, पटेर्वासुगौलीले ३४ लाख, धोबिनीले ५ लाख, बहुदरमाईले ३ लाख, वीरगंज महानगरले साढे ४८ लाख, छिपहरमाईले २ लाख रुपैयाँ किसानका लागि बजेट विनियोजन गरेका छन्। यसबाहेक सङ्घीय सरकारले छुट्टै सशर्त अनुदान सहयोग उपलब्ध गराएको छ। कतिपय पालिकाले किसानलक्षित कार्यक्रम पहिलो वर्ष ठूलो बजेटमा गरे पनि अहिले कटौती गरेका छन्। छिपहरमाईले पहिलो वर्ष रु ९६ लाख विनियोजन गरेकोमा त्यसपछि रु ५ लाख र अहिले आएर रु २ लाख मात्र बजेट विनियोजन गरेको छ।

कृषि ज्ञान केन्द्र पर्साको आफ्नै दुःखेसो छ। सो केन्द्रले किसानलक्षित कार्यक्रममा किसान नै नआउने गरेको कारण यो क्ष्Fेत्रमा सुधार हुन नसकेको बताए। कुनैमा किसान आउँदैन भने कुनैमा माथिल्लो तप्काका मानिसहरू आउँदैनन्, जसले गर्दा कृषि क्षेत्रमा सुधार हुन नसकेको केन्द्रको गुनासो छ।
पोखरियाका रमतुल्लाह खाँ (नाम परिवर्तन)ले किसानको लागि प्रधानमन्त्री कार्यक्रमबाहेक कृषि लक्षित कार्यक्रम नभएको बताए। उनले किसानहरूलाई आवश्यक भएको बेलामा बीउ, मल उपलब्ध नहुने, सिंचाइको पर्याप्त व्यवस्था नगरिएको जस्ता कुरामा स्थानीय पालिकाले ध्यान नदिएको आरोप लगाए। पोखरिया नगरपालिकाले के कति रकम विनियोजन ग–यो, कुन किसानलाई दियो भन्नेबारे आफूलाई जानकारी नभएको बताए।
बहुदरमाई नगरपालिकाका अर्का किसान रामरिजनले किसानलाई आवश्यक बीउ, मल अहिले पनि सीमापारिबाट ल्याउनुपर्ने अवस्था रहेको बताए। उनले स्थानीय पालिकाले किसानलाई सेवा सुविधा नदिएको गुनासो गरे। स्थानीय पालिका कमिशनमा मात्र लिप्त भएको र कमिशनको कामलाई मात्र प्राथमिकता दिंदै आएको उनको आरोप छ। किसानबाट कमिशन नपाउने हुँदा किसानलक्षित कार्यक्रम न्यून हुने गरेको उनले बताए। यो नगरपालिकामा रु २५ लाख सशर्त बजेट किसानको लागि विनियोजित छ तर किसानलक्षित कार्यक्रम शून्य छ। भएपनि पार्टी, कार्यकर्ताहरूलाई किसान बनाएर कार्यक्रम गरिएको देखिन्छ।
जीराभवानी, पकाहामैनपुर, छिपहरमाई गाउँपालिकामा किसानबारे तथ्याङ्क छैन। कति बजेट विनियोजन भयो, कति खर्च भयो भन्नेबारेमा तथ्याङ्क नभएको सो पालिकाका कृषि शाखाले जनाएको छ। यद्यपि सो शाखाले कृषिलक्षित कार्यक्रमहरू वडापालिकास्तरबाट गरिएको दाबी गरेको छ तर के काम ग–यो भन्नेबारे कुनै कागजी प्रमाण छैन।
पकाहामैनपुर गापाका कृषि शाखा प्रमुख हरिनारायण चौरसियाले विवरण खोजी गरेकोमा खुशी व्यक्त गरे। उनले किसानहरूको विवरण स्थानीय पालिकाबाट खोजी गरिएको खण्डमा मात्र किसानलक्षित कार्यक्रमले प्राथमिकता पाउने बताए।
अहिलेसम्म किसानहरूलाई के कति सुविधा उपलब्ध गराइयो, कति किसान लाभान्वित भए र त्यसको प्रतिफल के कति भयो भन्ने विषयमा कुनै पनि संस्थाले खोजीनीति नगर्दा पर्सा जिल्लामा किसानहरू सेवा सुविधाबाट वञ्चित भएका हुन्। अहिले पालिकाहरूले किसानहरूलाई भन्दा पनि नक्कली किसान खडा गरेर भएको बजेट सिध्याउने काम गर्दै आइरहेको पाइएको छ, जसले गर्दा पालिकाहरूमा सही तथ्याङ्क उपलब्ध छैन।

Monday, February 22, 2021

ड्राइपोर्टको मुआवजा वितरणमा ढिलाइ

ड्राइपोर्टको मुआवजा वितरणमा ढिलाइ

प्रस, वीरगंज, १० फागुन/
वीरगंज–२५ श्रीसियाको ६२ बिघा जग्गा अधिग्रहण गर्ने क्रममा मुआवजा वितरणमा चरम ढिलाइ भइरहेको छ।
ड्राइपोर्ट भन्सार र आइसिपी भन्सारबीचको ६२ बिघा जग्गामा दुईवटा सरकारी कार्यालयबीच तालमेल नमिल्दा ढिलाइ भइरहेको स्थानीयवासीले बताएका छन्। मुआवजा वितरणमा श्रीसिया सुक्खा बन्दरगाहले हस्तक्षेप गरी आवेदन सङ्कलन गर्ने र सोअनुरूप कार्यसम्पादन नगरेको कारण मुआवजा वितरणमा ढिलाइ भइरहेको बुझिएको छ।
गत माघ ७ गते जिल्ला प्रशासन कार्यालय, पर्साले सूचना प्रकाशित गर्दै अधिग्रहणमा परेका ९ सय ९९ जनालाई ३० दिनभित्र आवेदन दिन सूचना प्रकाशित गरेको थियो। तर मुआवजा तथा क्षतिपूर्ति निर्धारण समितिकहाँ निवेदन दिनुपर्नेमा श्रीसिया सुक्खा बन्दरगाह भन्सारका प्रमुख डा लालबहादुर खत्रीले हस्तक्षेप गरी उक्त मुआवजाका निवेदनहरू ड्राइपोर्ट भन्सारमा सङ्कलन गरी मालपोत कार्यालयमा फाइल पठाएपछि ड्राइपोर्ट भन्सारको नाममा पुर्जा बनेपछि मात्र जिल्ला प्रशासन कार्यालयलाई भुक्तानीको लागि पत्राचार गर्ने शर्तमा काम शुरू गरिएको थियो। तर ड्राइपोर्ट भन्सारका प्रमुख खत्रीको उदासीनताको कारण फाइल पठाउन ढिलाइ भएको छ भने अर्कोतर्फ मोठ भिडाइ पुर्जा बनाएर पठाइएका फाइलहरूको भुक्तानीका लागि सिफारिश गर्न पनि मालपोत कार्यालय, पर्साले ढिलाइ गरेको देखिन्छ।

मालपोत कार्यालय, पर्साको अनुसार जनशक्ति अभावले एक महीना बितिसक्दा पनि सोचेअनुरूप पुर्जा बन्न नसकेको जनाएको छ। ६२ बिघामध्येमा खेत र सरेहको करीब १५ बिघा जतिको मोठ भिडाएर कित्ता मिलान गरी ड्राइपोर्ट भन्सारको नाममा पुर्जा बनाइदिन सिफारिश भइसकेको र बाँकी काम सकाउन कम्तीमा दुई महीना जति समय लाग्ने मालपोत पर्साका कर्मचारीहरूको भनाइ छ।
यता, जिल्ला प्रशासन कार्यालय, पर्साले मुआवजाको दररेट निर्धारण गर्ने तथा सूचना प्रकाशित गरे तापनि बीचमैं ड्राइपोर्ट भन्सारले हस्तक्षेप गरेपछि मुआवजा वितरणमा थप ढिलाइ भएको बताएको छ। पर्साका प्रमुख जिल्ला अधिकारी आसमान तामाङले भने– “जिप्रका पर्साले मूल्याङ्कन निर्धारण गरी सूचना प्रकाशन ग–यो तर ड्राइपोर्टका हाकिम साहबले आफैंले अन्य प्रक्रियाको लागि सहजीकरण गर्ने भनी जिम्मा लिनुभएको छ। त्यो काम जिप्रकामा भएको भए सजिलो हुन्थ्यो।”
ड्राइपोर्ट भन्सारका सूचना अधिकारी चुडामणिशर्मा पौडेलले ड्राइपोर्टमा परेका करीब दुई सय निवेदनमाथिको प्राविधिक काम पूरा गर्न मालपोत कार्यालय पर्सामा पठाइएको बताए। उनले मालपोतले पुर्जा बनाएर दिएको खण्डमा भुक्तानीको लागि जिल्ला प्रशासन कार्यालयमा पत्राचार गर्ने जानकारी दिए। पाँच वर्षदेखि जग्गा अधिग्रहणको नाममा स्थानीयहरूको जग्गा सरकारले रोक्का गर्दा र मुआवजा वितरणमा ढिलाइ गर्दा श्रीसियावासी पीडित बनेका छन्। उनीहरूले मुआवजा समयमा नपाउँदा अन्य ठाउँमा बसाइँसराइ गर्न, घरव्यवहार गर्न र बैंकिङ कारोबार गर्न समस्या भइरहेको गुनासो गरेका छन्।
तत्कालीन पर्साका सहायक प्रमुख जिल्ला अधिकारी दुर्गादत्त पौडेलको संयोजकत्वमा गठित मुआवजा तथा क्षतिपूर्ति निर्धारण उपसमितिले २०७६ सालमा १३ प्रकारका जग्गाको वर्गीकरण गर्दै कट्ठाको रु ४० लाखदेखि ६७ लाखसम्म मुआवजा निर्धारण गरे तापनि पर्याप्त बजेटको अभावमा मुआवजा वितरण भएको थिएन। अहिले सरकारले डेढ अर्ब रकम जिप्रका पर्साको खातामा पठाए तापनि त्यो अपुग छ। जिल्ला प्रशासन स्रोत अनुसार समयमा मुआवजा वितरण नभए उक्त रकम पनि फ्रिज हुने बताइएको छ। ६२ बिघाको लागि कम्तीमा रु ६/७ अर्ब आवश्यकता पर्ने बताइएको छ।

Sunday, February 21, 2021

मातृभाषा आमाको दूधजस्तै हुन्छ –मुख्यमन्त्री गद्दी

मातृभाषा आमाको दूधजस्तै हुन्छ –मुख्यमन्त्री गद्दी

प्रस, वीरगंज, ९ फागुन/
प्रदेश नं २ का मुख्यमन्त्री लालबाबूराउत गद्दी र वीरगंज महानगरका प्रमुख विजयकुमार सरावगीले आइतवार भोजपुरी प्रतिष्ठान भवनको शिलान्यास गरेका छन्।
भवन शिलान्यास गर्दै मुख्यमन्त्री गद्दीले भोजपुरी भाषालाई कामकाजको भाषा बनाउनुपर्नेमा जोड दिए। भोजपुरीभाषीहरूले आफ्नै भाषाको रक्षा गर्न नसकेकोमा उनले दुःख व्यक्त गरे। मातृभाषा आमाको दूध जस्तै भएको बताउँदै अन्य भाषा डेरीको दूध जस्तो हुने बताए। वीरगंज महानगरले भोजपुरी प्रतिष्ठान बनाएर भोजपुरी भाषालाई बचाउने कार्य गरेकोमा उनले धन्यवाद दिए।
अन्तर्राष्ट्रिय मातृभाषा दिवसको अवसरमा भवन शिलान्यासपछि आयोजित बहुभाषिक कवि सम्मेलनमा बोल्दै उनले आफ्नो भाषा, संस्कृति, कला, भेषभूषाको संरक्षणमा सोही समुदाय अग्रसर हुनुपर्ने बताए। भोजपुरी भाषामा रहेको शब्दको भण्डार अन्य भाषामा नरहेको बताउँदै उनले आफ्नै व्याकरण, साहित्य रहेकोले पुरानो भाषाको रूपमा रहेको बताए। उनले कुनै समुदायको इतिहास मेटाउनु छ भने भाषा, संस्कृति र कलालाई लोप बनाए मात्र पुग्ने उनले जिकिर गरे। उनले राज्यले अहिलेसम्म भोजपुरी भाषालाई ओझेलमा पारेको बताए। उनले वीरगंजमा भोजपुरी साहित्यका भीष्म पितामहको रूपमा परिचित पण्डित दीपनारायण मिश्रको सालिक बनाउन सहयोग गर्ने प्रतिबद्धता जनाए।

भौतिक पूर्वाधारमन्त्री जीतेन्द्र सोनलले आफ्नो भाषामा कृति लेखेर प्रसिद्ध साहित्यकारहरू विश्वमञ्चमा परिचित भएको बताए। उनले हीनताबोधबाट माथि उठेर राष्ट्रिय, अन्तराष्ट्रिय मञ्चमा भोजपुरी भाषामा आफ्नोे एजेन्डा राख्नुपर्नेमा जोड दिए।
वीरगंज महानगरका प्रमुख सरावगीले आजदेखि महानगरको कार्य भोजपुरी भाषामा शुरू भएको बताए। उनले महानगरमा भोजपुरी भाषामा निवेदन दर्ता गराउन सकिने बताउँदै बिस्तारै सबै कार्य भोजपुरीमा हुने आश्वासन दिए। भवन निर्माणका लागि अहिले सिड मनीको रूपमा सो रकम दिएको र आवश्यकता अनुसार सहयोग गर्ने बताए। उनले भोजपुरी साहित्यकार पण्डित मिश्रको स्मृतिमा १ लाख नगदसहित तीनवटा पुरस्कार प्रदान गरिने घोषणा गरे।
प्रतिष्ठानका अध्यक्ष उमाशङ्कर द्विवेदीको अध्यक्षतामा भएको कार्यक्रममा जसपाका नेता लक्ष्मणलाल कर्ण, प्रदीप यादवलगायतले मन्तव्य राखेका थिए।
प्रतिष्ठान निर्माणका लागि चालू आवमा रु ५० लाख वीरगंज महानगरपालिकाले विनियोजन गरेको छ।  प्रतिष्ठानको तीन तले भवन बनाइने र भुइँतला व्यावसायिक प्रयोजनका लागि भाडामा लगाउने, पहिलो तलामा प्रतिष्ठानका पदाधिकारी कक्ष, विभिन्न विभाग र बैठक हल, दोस्रो तलामा हल र तेस्रो तलामा नाट्य, सङ्गीत, कला सम्बन्धित संरचना रहने गरी डिपिआर तयार भइरहेको प्रतिष्ठानका सदस्य रितेश त्रिपाठीले जानकारी दिए।

Saturday, February 20, 2021

घण्टाघरमा नवनिर्मित शहीद स्मारकको अनावरण, संवैधानिक त्रुटिका कारण प्रतिगमन भयो –सांसद यादव

घण्टाघरमा नवनिर्मित शहीद स्मारकको अनावरण, संवैधानिक त्रुटिका कारण प्रतिगमन भयो –सांसद यादव

प्रस, वीरगंज, ८ फगुन/
पूर्वसांसद प्रदीप यादवको संसदीय कोष तथा वीरगंज महानगरपालिकाको संयुक्त लगानीमा वीरगंजको घण्टाघरमा नवनिर्मित शहीद स्मारकको अनावरण कार्यक्रम शनिवार सम्पन्न भएको छ।
कार्यक्रममा सांसद प्रदीप यादवले संविधानमा त्रुटि रहेकोले प्रतिगमन भएको बताए। संविधान जारी भएदेखि मधेसी दलहरूले त्रुटिपूर्ण संविधानलाई पुनर्लेखन वा परिमार्जन गर्नुपर्ने माग राख्दै आएको बताए। प्रतिगमनको कारण देशमा राजनीतिक तथा संवैधानिक सङ्कट आएकोले सर्वोच्च अदालतले त्यसलाई नसच्याए देशमा सङ्कटकालसमेत लाग्न सक्ने उनले जिकिर गरे। उनले देश र जनताको लागि आफ्नो ज्यान गुमाएका शहीद कसैको निजी हुन सक्दैन साझा हुने बताए।

कार्यक्रममा वीरगंज महानगरपालिकाका प्रमुख विजयकुमार सरावगीले शहीदहरूले दिएको बलिदानीको फलस्वरूप देशमा सङ्घीय गणतन्त्र आएको र सोही व्यवस्था अन्तर्गत आफूलगायत सम्पूर्ण स्थानीय तहमा जनप्रतिनिधिहरू निर्वाचित भएको बताए। शहीदको बलिदानीले देशमा ठूलो परिवर्तन आएको र शहीदहरूको परिवार व्यवस्थापनको लागि महानगरले चारजनालाई रोजगार दिनुका साथै शहीद परिवारलाई अन्य सहयोग गर्दै आएको बताए।
शहीदहरूको सम्मानस्वरूप नै शहीद स्मारक बनेको र चाँडै विपी उद्यानको जग्गामा मधेसका सबै शहीद अट्ने गरी ठूलो शहीद पार्कको योजना अनुसार महानगर अगाडि बढेको बताए।
घण्टाघरमा नवनिर्मित शहीद स्मारकमा शहीद सोहनसाह कलवार, दिलीप चौरसिया, धर्मराजसिंह राजपुत, देवप्रकाश साह, आशीष राम, दिनानाथ साह, सतेन्द्र पटेलको शालिक राखिएको छ।
जसपाका जिल्ला अध्यक्ष रामनरेश यादवको सभापतित्वमा भएको कार्यक्रममा प्रदेश सांसद प्रह्लाद गिरी, जन्नत अन्सारी, सिंहासनसाह कलवार, करिमा बेगम, जिल्ला समन्वय समितिका सभापति नेकमहम्मद अन्सारीलगायतले मन्तव्य व्यक्त गरेका थिए। कार्यक्रमको सहजीकरण जिल्ला सचिव तबरेज अहमदले गरेका थिए।

Thursday, February 18, 2021

स्व बिहारीलाल लाठ कर्मवीर सम्मानबाट रूँगटा सम्मानित

स्व बिहारीलाल लाठ कर्मवीर सम्मानबाट रूँगटा सम्मानित

प्रस, वीरगंज, ६ फागुन/
रिलिफ सोसाइटी अफ कमर्सको २९औं वार्षिक साधारणसभा एवं स्व बिहारीलाल लाठको ९औं वार्षिक पुण्यतिथिको अवसरमा स्व बिहारीलाल लाठ कर्मवीर सम्मानपत्र प्रदान गरिएको छ।
रिलिफ सोसाइटीका संस्थापक महासचिव एवं पूर्वअध्यक्ष स्व बिहारीलाल लाठको पुण्यतिथिको अवसरमा उनको नाममा स्थापित कर्मवीर सम्मानपत्रबाट नेपाल उद्योग वाणिज्य सङ्घ प्रदेश २ का अध्यक्ष एवं प्रमुख अतिथि गणेश लाठले वीरगंजका समाजसेवी मुरलीधर रूँगटालाई सम्मानित गरेका थिए।
कार्यक्रममा वक्ताहरूले लामो समयदेखि रिलिफ सोसाइटीले समाजमा गरेको योगदान अतुलनीय रहेको बताए। रिलिफ सोसाइटीले स्थापनाकालदेखि नै वीरगंजमा आफ्नै भवनमा निश्शुल्क कानको उपचारसँगै इम्प्याक्ट नेपालसँगको सहकार्यमा अस्पतालसमेत निर्माण गरी न्यूनतम मूल्यमा कानको शल्यक्रिया गरी समाजसेवा योगदान दिइरहेको बताए। रिलिफ सोसाइटीले विभिन्न क्ष्Fेत्रमा योगदान गर्नेलाई सम्मान गर्दै आएको र कर्म गरी खानेलाई पहिचान गरी सिलाइ मेशिन वितरण गरी रोजगारको अवसर दिएकोप्रति वक्ताहरूले आभार व्यक्त गरेका थिए। रिलिफ सोसाइटीले महिलाहरूलाई सिलाइ मेशिन वितरण गरेर रोजगार सृजना गरी परनिर्भरताबाट उन्मुक्ति दिने कार्यमा सहयोग गरेको बताए। कार्यक्रममा वक्ताहरूले रिलिफ सोसाइटीले आफ्नो सेवा विस्तार गर्दै लैजानुपर्ने सुझाव दिएका थिए।

कार्यक्रममा कोभिडको बेलामा समाजमा योगदान दिएका ६ जनालाई सम्मानित गरिएको थियो। सम्मानित हुनेमा शोभा अधिकारी उपाध्याय, सानो पाइलाका कञ्चन झा, चिकित्सक डा नीरज सिंह, ग्रीनसिटी सामुदायिक सेवा केन्द्रका अध्यक्ष जयप्रकाश खेतान र सामाजिक अभियन्ता प्रकाश थारू रहेका छन्।
सो अवसरमा बारा, पर्साका १५ जना महिलालाई सिलाइ मेशिन वितरण गरिएको थियो।
संस्थाका अध्यक्ष अशोक लाठको सभापतित्वमा भएको कार्यक्रममा ज्येष्ठ नागरिक सङ्घ पर्साका पूर्वअध्यक्ष पशुपति विक्रम शाह, नेपाली काङ्ग्रेस पर्साका सभापति अजय द्विवेदी, जसपाका केन्द्रीय सदस्य निजामुद्दीन समानी, नेकपा पर्साका अध्यक्ष प्रभु हजरा, अधिवक्ता बालमकुन्द खरेल, मधु राणा, उषा शाह, वीउवासङ्घका केन्द्रीय सदस्य सुबोध गुप्ता, इम्प्याक्ट नेपालका सुभाष कोइरालालगायतले मन्तव्य व्यक्त गरेका थिए। कार्यक्रमको सञ्चालन सोसाइटीका महासचिव नीरज अग्रवालले गरेका थिए।

Wednesday, February 17, 2021

पर्साका चारवटा खोलामा ठेक्का लगाउन अझै समय लाग्ने

पर्साका चारवटा खोलामा ठेक्का लगाउन अझै समय लाग्ने

प्रस, वीरगंज, ५ फागुन/
पर्साका छवटा खोलामध्ये चारवटा खोलाको ठेक्का लगाउन अझै समय लाग्ने देखिएको छ।
जिल्ला समन्वय समिति पर्साका सभापति नेकमहमद अन्सारीका अनुसार चारवटा खोलाको विषयमा प्रारम्भिक वातावरण परीक्षण प्रतिवेदन (आइइई) स्वीकृति गराउन समय लाग्ने भएकोले ठेक्का प्रक्रिया पनि लम्बिने उनले बताए। उनका अनुसार पर्सामा अहिले वीरगंज महानगरको स्वामित्वमा पर्ने भेडाहा खोलाको मात्र ठेक्का भई बालुवा, गिट्टी र ढुङ्गा उत्खनन भइरहको छ भने पर्सागढीको सिंगाही खोलाको पनि ठेक्का लागिसकेकोमा केही शर्त मिचिएकाले आजको बैठकले विभिन्न शर्त पालना गराउन दुवै खोलाका ठेकेदारलाई निर्देशन दिएको छ।

सभापति अन्सारीले ठेक्का प्रक्रियाको सम्झौता र शर्तविपरीत ठेकेदारले खोलाबाट नदीजन्य पदार्थ उत्खनन गरी लगेको विभिन्न सञ्चारमाध्यममा आएका समाचारको आधारमा छवटा विभिन्न शर्त पालना गरेर मात्र बालुवा, गिट्टी, ढुङ्गा उत्खनन गर्न निर्देशन दिएको बताए। यदि ती शर्त पालना नभएमा आगामी दिनमा ठेक्का तोडेर आवश्यक कानूनी कारबाहीको लागि चेतावनी पनि दिइएको उनले बताए।
त्यसैगरी, पर्सागढी नपाको अर्को खोला कर्जनिया, पटेर्वासुगौलीको एकल स्वामित्वमा पर्ने गादी खोलाको ठेक्का लाग्न नसकेर बन्द भए तापनि तस्करहरूले ती खोलाबाट अवैधरूपमा नदीजन्य पदार्थको उत्खनन गरी तस्करी गरिरहेका छन्। त्यसैगरी, दुई पालिकाको क्षेत्र पर्ने जमुनिया, भलुवाही खोलामा पनि यस्तै कार्य भइरहेको गाउँलेहरूले बताएका छन्। जमुनिया खोलामा पटेर्वासुगौली र सखुवाप्रसौनी गाउँपालिकाको संयुक्त स्वामित्व पर्छ भने भलुवाहीमा पटेर्वासुगौली र जीराभवानीको। आइइई नभई ठेक्का लाग्न नसकेका चारवटा खोलाको विषयमा यस वर्ष सङ्घीय सरकारले आइइई प्रतिवेदन स्वीकृति गराउन प्रदेश सरकारलाई जिम्मा दिएकोमा त्यो अधिकार प्रदेश सरकारले स्थानीय पालिकालाई सुम्पेकोमा आगामी वर्षदेखि सबै खोलाको प्रारम्भिक वातावरण परीक्षण प्रतिवेदन तयार गरी समयमैं ठेक्का लाग्ने बताइएको छ। सभापति अन्सारीले स्थानीय पालिकाभित्र पर्ने खोलाको हकमा सम्बन्धित पालिकाले पहिले अनुगमन गरी प्रतिवेदन तयार गरे पनि जिल्लास्थित जिल्ला समन्वय समितिको नेतृत्वमा विज्ञहरूको टोलीले अनुगमन गरी प्रतिवेदनलाई स्वीकृति दिएपछि खोलाको टेन्डर प्रक्रिया अघि बढ्ने नियम रहेको छ। चारवटा खोलाको ठेक्का लाग्न नसक्दा स्थानीय पालिकाको वार्षिक करोडौं रुपैयाँ राजस्व गुमिरहेको छ।

Tuesday, February 16, 2021

मध्य तराईमा सुरक्षित नागरिक आवास कार्यक्रम सुस्त, कर्मचारीले घूस लिएर कोटा दिएको गुनासो

मध्य तराईमा सुरक्षित नागरिक आवास कार्यक्रम सुस्त, कर्मचारीले घूस लिएर कोटा दिएको गुनासो

प्रस, परवानीपुर, ४ फागुन/
मध्य तराईको पर्सा, बारा र रौतहटमा दलित, विपन्नहरूको लागि जस्तापाताको छानो बनाइदिने कार्यक्रम सुरक्षित नागरिक आवास कार्यक्रम सुस्त गतिमा अघि बढिरहेको छ।
आव २०७६/०७७ देखि शहरी विकास मन्त्रालय अन्तर्गतको वीरगंजस्थित सघन शहरी तथा भवन निर्माण आयोजना कार्यालयले यो कार्यक्रम अगाडि बढाएको हो। यो कार्यक्रमबारे सूचना प्रकाशित भएपछि  दलित, विपन्नहरूले आफ्नो अवस्थाबारे विवरण समावेश गरी निवेदन दिएपछि जिल्लाको सुरक्षित नागरिक आवास समन्वय समितिले छनोट गरेमा आवेदकले दुई किस्तामा पचास हजार रुपैयाँ पाउँछन्।
उक्त रकमले दलित, विपन्न परिवारले फुसको छानो हटाएर जस्तापाताको छानो लगाउनुपर्छ। तर चालू आवमा यस कार्यक्रमको अनुगमन, नियमन र किस्ता वितरण गर्ने अधिकार स्थानीय पालिकामा गएपछि कार्यक्रम सुस्त गतिमा अघि बढेको आयोजना कार्यालय वीरगंजका प्रमुख रञ्जनकुमार दासले बताए। उनका अनुसार पर्साको क्षेत्र नं १ मा ९४७, २ मा ८५१, ३ मा १११२ र ४ मा ९९७ गरी ३९०७ वटा फुसको घरमा जस्तापाताको छानो छाउनुपर्नेछ।

बाराको क्षेत्र नं १ मा ९३५, २ मा २४७, ३ मा १३३६ र ४ मा १०४२ गरी ३५६० र रौतहटको क्षेत्र नं १ मा ११४६, २ मा ८५१, ३ मा १२७१ र ४ मा १०६५ गरी ४३३३ वटा फुसको घरमा जस्तापाताको छानो छाउने योजना रहेको छ।
प्रधानमन्त्रीको बहुप्रतीक्षित कार्यक्रम अन्तर्गतको योजना भए तापनि यसको कार्यान्वयन, अनुगमन र नियमनको पाटो फितलो भएकोले यो कार्यक्रमको लाभ प्रत्यक्षरूपमा दलित, विपन्न परिवारले लिन नसकेको र लिए तापनि जस्तापाताको छानो बन्न नसकेको गाउँलेहरूले बताएका छन्। केही गाउँलेले पचास हजार रकममध्ये तीस हजार र बीस हजार गरी दुई किस्तामा रकम दिने गरे तापनि एउटा किस्ताको लागि आयोजना कार्यालयकै प्राविधिक र समाजका केही अगुवा व्यक्तिले रु २ हजार घूसबापत लिएर कोटा पारिदिने र त्यसपछि रकम उपलब्ध गराउने गरेको गुनासो गरेका छन्।
यस विषयमा आयोजना कार्यालयका प्रमुख दासले गत आवमा कार्यालयले नै सबै काम हेर्ने गरेकोमा कोटा दिने काम अहिले जिल्ला समन्वय समिति, पर्साका सभापतिको अध्यक्षतामा रहेको सुरक्षित नागरिक आवास समन्वय समितिले गर्ने गरेको र रकमको निकासा स्थानीय पालिकाले गर्ने गरेकाले यसमा आफ्नो कार्यालयका कर्मचारीको दोष नरहेको दाबी गरे। आएका गुनासाबारेमा आफूले पनि छानबिन गर्ने उनले बताए।

Monday, February 15, 2021

मिटर ब्याजीको आरोपमा मित्रुकाद्वयमाथि अनुसन्धान शुरू

मिटर ब्याजीको आरोपमा मित्रुकाद्वयमाथि अनुसन्धान शुरू

प्रस, वीरगंज, ३ फागुन/
जिल्ला प्रशासन कार्यालय, पर्साले दुईजना मिटर ब्याजीमाथि अनुसन्धान शुरू गरेको छ।
पीडित र पीडकबीच भएको छलफलको क्रममा तत्कालको लागि पीडक दोषी रहेको भन्दै प्रारम्भिक अनुसन्धानबाट खुलेपछि जिल्ला प्रशासन कार्यालय पर्साले बयान लिएको छ।
झापाको भद्रपुर–२ घर भई वीरगंज महानगर–१० मा बसोबास गर्दै आएका मुरलीमनोहर मित्रुका र मदनमोहन मित्रुकालाई मिटर ब्याजीको आरोपमा आज जिल्ला प्रशासन कार्यालयले पक्राउ गरी १० दिनको तारिखमा रिहा गरेको प्रमुख जिल्ला अधिकारी आसमान तामाङले बताए।

वीरगंज महानगर–१२ मुर्लीका एमडी सहाबुद्दीन अन्सारीले मुरलीमनोहरसँग रु १३ लाख ऋण लिई कपाली तमसुक गरेका थिए। तर मित्रुकाले सात वर्षमा साँवा–ब्याजसहित १ करोड ९० लाख  पु–याएपछि अन्सारीले जिल्ला प्रशासन कार्यालय पर्सामा उजूरी दिए। उजूरीमा मुरलीमनोहर र मदनमोहनले वीरगंजमा सयौंलाई ब्याज दिने र पछि मिटर ब्याज असुल्दै दर्जनौं व्यक्तिमाथि मुद्दा दायर गरेको देखिन्छ। पीडित अन्सारीका अनुसार मित्रुका दाजुभाइले अहिले जिल्ला अदालतमा चारजनामाथि मुद्दा दायर गरी घर–जग्गाविहीन बनाएको बताए।
२०७१ वैशाख २ गते अन्सारीले मित्रुका दाजुभाइसँग ऋण लिएको तर चलनचल्ती अनुसार रु १३ लाखको दोब्बर रु २६ लाखको कपाली तमसुक बनाएको अन्सारीले बताए। तर दाजुभाइ मिली एकै दिन मिति फरक पारी मदनमोहनको नाममा वीरगंज महानगर–१२ नक्शा सिट नं. ०३५१–०४, कित्ता नं. ६९३, क्षेत्रफल ०५५८.७४ को जग्गा दृष्टिबन्धक गरेको देखिन्छ।
ठग्ने उद्देश्यले दाजुभाइले पीडित अन्सारीलाई झुक्याइ अन्य कागजातमा सहीछाप गराउने गरेको उजूरीमा उल्लेख छ। दाजुभाइले दिएको रकमको ब्याज १० प्रतिशत लिनुपर्नेमा उनीहरूले मिटर ब्याज असुल गरी आफूलाई बिल्लबाठ बनाएको र अहिले आएर जिल्ला अदालतमा मुद्दा हालेको पीडित अन्सारीले बताए।
आज जिल्ला प्रशासन कार्यालय पर्सामा भएको छलफलको क्रममा मित्रुका दाजुभाइले रु ५१ लाख अन्सारीलाई दिएको बताउँदै सावाँ–ब्याजसहित १ करोड ९० लाख भएको दाबी गरेका छन्।
प्रजिअ तामाङसामु मित्रुका दाजुभाइले आफू अन्यायमा परेको  बताएका थिए। तर पीडित अन्सारीका अनुसार आफूले छोरीको बिहेको लागि रु १३ लाख ऋण लिएको तर मित्रुका दाजुभाइले झुक्याएर रु २६ लाखको कपाली तमसुक तथा रु २५ लाख बराबरको जग्गा दृष्टिबन्धक गराएको आरोप लगाए। उनले कपाली तमसुक अनुसार रु २६ लाख दिन तयार रहेको बताएका छन्।

Sunday, February 14, 2021

गोतामे पत्रकारिता स्वर्ण पदक पत्रकार चित्राङ्ग थापालाई प्रदान

गोतामे पत्रकारिता स्वर्ण पदक पत्रकार चित्राङ्ग थापालाई प्रदान

प्रस, वीरगंज, २ फागुन/
स्व गोपालचन्द्र गौतमको स्मृतिमा स्थापित पत्रकार गोपालचन्द्र गौतम प्रतिष्ठानले प्रदान गर्दै आएको गोतामे पत्रकारिता स्वर्ण पदक–२०७७ सुदूरपश्चिमका पत्रकार चित्राङ्ग थापालाई आइतवार कार्यक्रमको आयोजना गरी प्रदान गरिएको छ।
वरिष्ठ समाजसेवी एवं रूँगटा वेलफेयर सोसाइटीका संयोजक मुरलीधर रूँगटाले पत्रकार थापालाई गोतामे पत्रकारिता स्वर्ण पदक प्रदान गरेका थिए।
कार्यक्रममा संविधानसभा सदस्य अजयकुमार द्विवेदीले स्व पत्रकार गोतामेले देखाएको पथमा पत्रकारहरूलाई हिंड्न सुझाव दिए। उनले चटपटे किसिमबाट समाचार सम्प्रेषण गर्ने जमातले शान्त, शालीन र समाजप्रति उत्तरदायी भएर पत्रकारिता गर्नको लागि स्व गोतामेको सिको गर्नुपर्ने सुझाव दिए। प्रतिकूल समयमा स्व गोतामेले वीरगंजको पत्रकारितालाई देशभरिमा चिनाएको उनले बताए।

कार्यक्रममा नेपाल उद्योग वाणिज्य महासङ्घ प्रदेश २ का अध्यक्ष गणेश लाठले गोतामे पत्रकारिता पुरस्कारलाई निरन्तरता दिंदै आएकोमा प्रतिष्ठानलाई धन्यवाद ज्ञापन गरे। उनले यो अभियानमा आफूले पनि सहयोग गर्ने प्रतिबद्धता जनाए।
नेपाल पत्रकार महासङ्घ प्रदेश २ का अध्यक्ष दीपेन्द्र चFैहानले स्व गोतामेले मूल्यनिष्ठ पत्रकारिता गरेर समाजमा पत्रकारितालाई मर्यादित बनाएको बताए।
नेपाल प्रेस युनियनका महासचिव अजयबाबू शिवाकोटीले स्व गोतामे पत्रकारिता स्वर्ण पदक पुरस्कार सुदूरपश्चिमका नामधारी पत्रकारलाई प्रदान गरिएकोमा खुशी व्यक्त गरे। उनले जसको नाममा पदक प्रदान गरिएको छ र अहिले पदक लिने व्यक्ति पनि सुदूरपश्चिमको चिरपरिचित पत्रकार भएको बताए। मोफसलबाट वीरगंजले स्वर्ण पदक पुरस्कार प्रदान गर्दै आएको र उपत्यकाबाहेक देशभरिका चुनिन्दा पत्रकारलाई पुरस्कार प्रदान गर्दै आएकोमा सराहना गरे।
नेपाल पत्रकार महासङ्घका पूर्व केन्द्रीय सदस्य महेश दासले उपत्यकाबाहिर प्रदान गरिने यो पुरस्कार आफैंमा सर्वोत्कृष्ट रहेको बताए। पत्रकारिताको माध्यमबाट समाजमा आफ्नो पृथक पहिचान बनाउन सफल पत्रकारलाई प्रतिष्ठानले पुरस्कृत गर्दै आएको उनले जानकारी गराए।
स्व गोतामेकी पत्नी शोभा गौतमले कठिन समयमा पतिले गरेको पत्रकारिताको स्मरण गराइन्। विभिन्न चरणमा राज्यले पत्रिका प्रतिबन्ध गर्दा पनि भारतबाट समेत पत्रिका प्रकाशन गरेर यो क्षेत्रमा पतिले योगदान पु–याएको चर्चा गरिन्।
प्रतिष्ठानका अध्यक्ष जगदीशप्रसाद शर्माको अध्यक्ष्Fतामा भएको कार्यक्रममा जसपाका केन्द्रीय सदस्य शिव पटेल, निमित्त प्रमुख जिल्ला अधिकारी भीमकान्त पौडेल, सशस्त्र प्रहरी उपरीक्षक राजेन्द्र खड्का, समाजसेवी पशुपति विक्रम शाहलगायतले मन्तव्य व्यक्त गरेका थिए। कार्यक्रममा प्रतिष्ठानका उपाध्यक्ष चन्द्रकिशोरले स्वागत र सदस्य श्याम बन्जाराले सहजीकरण गरेका थिए।
यो पुरस्कार शुभारम्भमा रु १० हजार राशिबाट शुरू भएको र वृद्धि हुँदै दशौंपटकमा एक तोला सुनमा परिणत भएको प्रतिष्ठानका सचिव केसी लामिछानेले बताए। पछिल्लो चरणमा एक तोला सुनको पदक तीनजनालाई प्रदान गरिसकिएको छ।
यसअघि यो पुरस्कारबाट मकवानपुरका पत्रकार प्रताप विष्ट, विराटनगरका पत्रकार मोहन भण्डारी, बुटवलका पत्रकार डिआर घिमिरे, राजविराजका पत्रकार शिवहरि भट्टराई, झापाका पत्रकार स्व मदन ढकाल, पाल्पाका पत्रकार मेघराज शर्मा, सप्तरी (कञ्चनरूप)का पत्रकार भोला पासवान, भैरहवाका पत्रकार अर्जुन ज्ञवाली, झापाका पत्रकार केशव आचार्यले प्राप्त गरिसकेका छन्।

फरक समाचार

Find us