Showing posts with label प्रमुख समाचार. Show all posts
Showing posts with label प्रमुख समाचार. Show all posts

Monday, October 19, 2020

 लकडाउनमा तेस्रोलिङ्गीको अवस्था दयनीय –संयोजक बम

लकडाउनमा तेस्रोलिङ्गीको अवस्था दयनीय –संयोजक बम



प्रस, वीरगंज, ३ कात्तिक/
    सहयात्री समाज नेपाल, पर्साले सोमवार सरोकारवालाहरूसँग समन्वय बैठक गरी जिल्लामा रहेका समलिङ्गी, तेस्रोलिङ्गी समुदायको अवस्थाबारेमा जानकारी गराएको छ।
    वीरगंज–१२ पानीटङ्कीस्थित कार्यालयमा आयोजित कार्यक्रममा सहयात्री समाज पर्साकी संयोजक समता बमले यौनिक तथा लैङ्गिक अल्पसङ्ख्यक (समलिङ्गी, तेस्रोलिङ्गी) समुदायको मानव अधिकारसँगै एचआइभी एड्स तथा यौनरोग नियन्त्रणको क्षेत्रमा समाजले काम गरिरहेको बताइन्। उनले लकडाउन र निषेधाज्ञाको समयमा जिल्लामा रहेका समलिङ्गी, तेस्रोलिङ्गीको अवस्था दयनीय भएको र उनीहरूलाई राज्यका तीनै तहबाट कुनै पनि सेवा, सुविधा, राहत उपलब्ध नगराइएको बताइन्।
    पर्सा जिल्लामा अनुमानित ४ हजारको सङ्ख्यामा यो समुदाय रहेको र ७ महीनामा धेरैजना रोजगारविहीन भई आर्थिक समस्यासँग जुधिरहे पनि उनीहरूलाई सङ्घ, प्रदेश र स्थानीय सरकारले कुनै वास्ता नगरेको बताइन्। संयोजक बमले सरकारले लैङ्गिकमैत्री बजेट बनाउने नीति राखे पनि स्थानीय तहले सरकारको निर्देशन पालना नगरेको र बजेट लैङ्गिकमैत्री नभएको कारण समलिङ्गी, तेस्रोलिङ्गीहरूले समान अधिकार नपाएको आरोप लगाइन्।  उनले हरेक दृष्टिकोणबाट पछाडि परेको यो समुदायलाई अगाडि बढाउन स्थानीय सरकारको पहल हुनुपर्ने बताइन्।
    बैठकमा वडा नं ८ का अध्यक्ष राजकिशोर गुप्ताले तेस्रोलिङ्गी, समलिङ्गीको कारण वीरगंजमा पछिल्लो समयमा निकै समस्या तेर्सिएको बताए। सामाजिक विकृति फैलाउनुका साथै लूटपाट आदिमा पनि यो समुदायको संलग्नता बढेको आरोप लगाए।
    वडा प्रहरी कार्यालय, श्रीपुरका प्रहरी निरीक्षक दीपक साहले आफू आएयता ४० वटा लूटपाटका घटना तेस्रोलिङ्गी, समलिङ्गीबाट भएको बताए। उनले तेस्रोलिङ्गीलगायत समाजमा हुने सबैखाले विकृति, विसङ्गति, अपराधविरुद्ध प्रहरी मात्रको सक्रियताले न्यूनीकरण हुन नसक्ने भन्दै यसमा समाजको सहयोग आवश्यक भएको बताए। तेस्रोलिङ्गीको हकमा उनीहरूलाई थुनेर, कुटेर समस्या समाधान नहुने भन्दै रोजगारको अवसर प्रदान गर्नुपर्ने बताए।
    नेशनल मेडिकल कलेजका प्रबन्ध निर्देशक बसरुद्दीन अन्सारीले सामाजिक विकृति बढाउने कार्यमा तेस्रोलिङ्गी आरोपित भएपनि उनीहरू अन्य पेशाप्रति भने इमानदार भएको दाबी गरे। उनले तेस्रोलिङ्गीहरूलाई उनीहरूको योग्यता, क्षमता अनुसार रोजगार दिने प्रतिबद्धता जाहेर गरे। अन्सारीले चौकीदारमा तत्काल ५ जनालाई र नर्सिङ सेवामा संलग्न हुन चाहनेलाई पनि अवसर दिने बताए।
    समाजका जटाशङ्कर साह कानूले कार्यक्रमको सहजीकरण गरेका थिए भने समापन रेडक्रस पर्साका कार्यालय प्रमुख उदयराज शर्माले गरेका थिए।

Sunday, October 18, 2020

 मालपोत पर्सामा लेखनदासहरूको दादागिरी

मालपोत पर्सामा लेखनदासहरूको दादागिरी


प्रस, वीरगंज, २ कात्तिक/
    भूमिसुधार तथा मालपोत कार्यालय, पर्सामा लेखनदासहरूले आइतवार कार्यालय बन्द गर्दा प्रहरी परिचालन भएर खुलेको छ।
    बिहीवार राति ८ बजेसम्म काम गरिरहँदा जिल्ला प्रशासन कार्यालय, पर्साले छापा मारी १३ जना कर्मचारी र ८ जना लेखनदासलाई पक्राउ गरेको थियो। उनीहरूबाट केही नगद पनि बरामद भएको थियो। सो सम्बन्धमा जिल्ला प्रशासन कार्यालय, पर्साले कर्मचारीको हकमा विभागीय कारबाईको लागि सिफारिश गरेको छ भने आठजना लेखनदासविरुद्ध सार्वजनिक मुद्दा दायर गरेको छ।
    यो घटनापछि मालपोत कार्यालय, पर्सा तोकिएको समयमा शुक्रवार सञ्चालन भयो। यसैगरी, आइतवार जिल्ला प्रशासन कार्यालयले तोके अनुसार २० जना सेवाग्राहीलाई एक दिनमा सेवा दिने गरी कारबाई अगाडि बढाउँदा लेखनदासहरूले कार्यालय बन्द गर्ने प्रयास  गरेका थिए। मालपोत कार्यालयमा प्रहरी पुगेर लेखनदासहरूलाई तह लगाएको थियो। कार्यालयको काममा अड्चन हाले सोही अनुसार कारबाई हुने प्रहरीले चेतावनी दिएपछि लेखनदासहरू पछि हटेका थिए।
    मालपोत कार्यालय, पर्साले आइतवारबाट चारवटा मोठ फाँटमा २०/२० जना सेवाग्राहीको मात्र काम गर्ने सूचना जारी गरेपछि लेखनदासहरू सोको विरोधमा ओर्लिएका हुन्। यसअघि सो कार्यालयबाट दैनिक अढाई सयसम्म रजिस्टे«शन पारित हुने गर्दथ्यो। जिल्ला प्रशासन कार्यालय, पर्साले लकडाउन हटाएसँगै असोजको पहिलो सातादेखि सञ्चालनमा आएका कार्यालयहरूमा आइतवार, सोमवार वीरगंज महानगर, मङ्गलवार, बुधवार पोखरिया, पर्सागढी, बहुदरमाई नगरपालिका र बिहीवार, शुक्रवार १० वटा गाउँपालिकाका सेवाग्राहीहरूको काम गर्न निर्देशन गरेको थियो। तर सोविपरीत मालपोतमा लेनदेनको आधारमा सबै दिन सबै पालिकाका कामहरू हुँदै आएको थियो।
    बिहीवारको घटनापछि निमित्त कार्यालय प्रमुख सुमन झाले चारवटा मोठ फाँटबाट दैनिक ८० वटा रजिस्टे«शन मात्र पारित हुने बताए। आइतवार दुईवटा फाँटका कर्मचारी नआएको भन्दै लेखनदासहरूले विवाद गरी कार्यालय बन्द गर्न खोज्दा प्रहरीले सञ्चालनमा ल्याएको थियो।

Saturday, October 17, 2020

 अलमलमैं शिक्षालय

अलमलमैं शिक्षालय



प्रस, गरुडा, १ कात्तिक/
    शिक्षा, विज्ञान तथा प्रविधि मन्त्रालयले विद्यालयमा विद्यार्थीलाई बोलाएर शिक्षण सिकाइ क्रियाकलाप गर्न नभने पनि कतिपय स्थानीय तहले निर्णय नै गरेर विद्यालय सञ्चालन गरेको देखिन्छ । सर्लाहीका विभिन्न स्थानीय तहले निर्णय गरेर नै विद्यालय सञ्चालन गरेका छन् ।

    सर्लाहीमैं पनि शिक्षण सिकाइ क्रियाकलापमा अलमल देखिएको छ । कतिपय विद्यालयले कक्षा १ देखि नै औपचारिक जस्तै सामान्य अवस्थाको जस्तो कक्षा सञ्चालन गरेका छन् भने कतिपय स्थानीय तहमा विद्यालयलाई सिकाइ केन्द्र मानेर कक्षालाई फरक किसिमले व्यवस्थित गरी चलाइएको पाइएको छ ।

    रौतहटको चन्द्रपुर, गौर, गरुडा र फतुवा विजयपुर नगरपालिकाले विद्यालयमा विद्यार्थी र शिक्षकको आधारमा दुई वा तीन सिप्mटमा विभाजन गरेर कक्षा सञ्चालन गरेका छन् । गत हप्ता चन्द्रपुर नगरपालिकाको शिक्षकमा कोरोना सङ्क्रमण देखिएपछि विद्यालयहरू पुनः बन्द गरिएका थिए ।

    विद्यालयलाई सिकाइ केन्द्र मानेर विद्यार्थी बोलाइ कक्षा सञ्चालन गर्ने रौतहटका चारमध्ये तीन नगरपालिका शहरी क्षेत्रमा रहेका छन् । शहरी क्षेत्रमा संस्थागत विद्यालयको मागलाई सम्बोधन गर्न पनि विद्यालय सञ्चालन गरिएको आरोप लाग्ने गरेको छ तर विद्यालयलाई सिकाइ केन्द्र मानेर विभिन्न सिप्mटमा कक्षा सञ्चालन गर्दा विद्यार्थीले पढ्न पाएका छन् भने शिक्षकले पढाउन नखोजेको आरोपको खण्डन पनि भएको छ ।

    जिल्ला प्रशासन कार्यालय रौतहटले गत हप्ता कतिपय विद्यालयले स्कूल बसमा विद्यार्थी ल्याएर कक्षा सञ्चालन गरेको पाइएको भन्दै वैकल्पिक विधिबाट विद्यार्थीको सिकाइलाई प्रभावकारी बनाउन सूचना जारी गरेको थियो ।

    देशमा दिन प्रतिदिन कोरोनाको सङ्क्रमण बढ्दै जाँदा कतिपय स्थानीय तह पर्ख र हेरको स्थितिमा रहेका छन् । रौतहटको गढीमाई नगरपालिकाका प्रमुख श्यामप्रसाद यादवले दशैंसम्म हेरेर जिल्लामा कोरोना सङ्क्रमणको अवस्था बुझेपछि मात्र विद्यालय सञ्चालनको विषयमा निर्णय लिइने बताएका छन् ।

    विद्यालय सञ्चालन नभए पनि अधिकांश स्थानीय तहका शिक्षक दिनहुँ विद्यालय पुगिरहेका छन् । विद्यालय पुगेर हाजीरी गर्ने र समस्या लिएर आउने विद्यार्थीको सिकाइलाई सहजीकरण गर्ने गरेको मौलापुर नगरपालिकाका एक शिक्षकले बताएका छन् ।

    रौतहट तथा बारामा टोल शिक्षण खासै प्रभावकारी देखिएको छैन तर जूम प्रविधिमार्पmत् शिक्षण सिकाइ क्रियाकलापलाई निरन्तर अगाडि बढाइएको छ । गरुडामा रहेको नेपाल पुलिस स्कूलले गत असारदेखि नै जूम प्रविधिमार्पmत् शिक्षण सिकाइ क्रियाकलापलाई निरन्तरता दिइरहेको छ । यस विद्यालयले जूम प्रविधिमार्पmत् विद्यार्थीको परीक्षा पनि लिएको छ ।

    रेडियो र जूम प्रविधिमार्पmत् हुने शिक्षण सिकाइमा कक्षाको तुलनामा विद्यार्थी सहभागिता कम हुने गरेको पाइएको छ । प्रत्यक्ष कक्षाजस्तो जूम प्रविधिको पढाइप्रति विद्यार्थीको पहुँच र आकर्षण दुवै कम भएको पाइएको कटहरिया नगरपालिकाका शिक्षा संयोजक अनिलकुमार निधिले जानकारी गराएका छन् ।

    गत चैतको पहिलो हप्तापछि विद्यार्थी विद्यालय जान नपाएकाले सिकाइको स्तर कमजोर हुने वा शैक्षिक सत्र नै कमजोर बन्ने हो कि भन्ने चिन्ता अभिभावकलाई समेत रहेको छ । कतिपय विद्यालयले नगरपालिकाको अनुमतिविनै माथिल्लो तहको विद्यार्थीलाई बोलाएर अनौपचारिक भन्दै कक्षा सञ्चालन गरेको पनि पाइएको छ ।

    बारामा जिल्ला प्रशासन कार्यालयले जिल्लाका सबै विद्यालयको पठनपाठन बन्द गरिएको सूचना सार्वजनिक गरेको थियो भने पर्साका केही विद्यालय सञ्चालनमा आउन थालेका थिए । औपचारिक वा अनौपचारिकरूपमा सञ्चालनमा रहेका सबै विद्यालय तथा क्याम्पसहरू घटस्थापनादेखि पूर्णिमासम्म बन्द हुँदैछन् ।

Friday, October 16, 2020

 केराउ, मरिच, सुपारी छुट्यो, छोहोडा छुटेन

केराउ, मरिच, सुपारी छुट्यो, छोहोडा छुटेन



राधेश्याम पटेल, परवानीपुर, ३० असोज/
    भन्सार नाकामा ६ महीना होल्ड भएको अर्बौं मूल्यको केराउ, मरिच र सुपारी सरकारको आदेशमा छुटेको छ भने छोहोडा छुट्न सकेको छैन ।
    उद्योग राज्यमन्त्री मोतीलाल दुगडको सेन्चुरी मसला उद्योगको लागि तेस्रो मुलुकबाट आयात गरिएको ठूलो परिमाणको मरिच भन्सार नाकामा अड्केको थियो । सरकारले गत चैत १६ गतेदेखि कोरोना महामारी र नेपाली डलर विदेश पलायन नहोस् भन्ने उद्देश्यले यी वस्तुको आयातमा रोक लगाएको थियो । खाद्य प्रविधि तथा गुण नियन्त्रण विभागको स्वीकृतिविना डिएपी (डकुमेन्ट अगेन्स्ट पेमेन्ट) विधिबाट मगाइएको केराउ, मरिच, सुपारी र छोहोडालाई भन्सार जाँचपास नगरिने निर्देशनपछि वीरगंज, विराटनगरलगायत सबै भन्सार नाकाबाट आयात रोकियो । तर पहुँचवाला आयातकर्ताले सरकारलाई फकाइफुल्याइ गरी चैत १६ गतेअगावै सिपमेन्ट अर्थात् जहाजमा मालसामान हिडिसकेको सामानको जाँचपास गर्न मिल्ने आर्थिक ऐनमा संशोधन गराउन सफल भए । गत भदौको अन्तिम साता मन्त्रिपरिषद्बाट भन्सार नाकामा रोकिएका केराउ, मरिच र सुपारीको जाँचपास गर्न निर्देशन आएपछि करोडौं विलम्ब शुल्क र पार्किङ शुल्क तिरेर व्यवसायीले आआप्mनो सामान जाँचपास गराइसकेका छन् भने केहीले गरिरहेका छन् । वीरगंजस्थित सुक्खा बन्दरगाहबाट करीब ७ सय कन्टेनर केराउ, ४० कन्टेनर मरिच र १० कन्टेनर सुपारी जाँचपास भएको व्यसायीले बताए ।
    तर सुक्खा बन्दरगाहमा अड्केको करीब ९ करोड मूल्यबराबरको छोहोडाको बारेमा भने सरकार मौन छ । यसबारेमा निर्णय नभएकोले छोहोडाको जाँचपास हुन सकेको छैन । यही कारण सुक्खा बन्दरगाह भन्सारमा अहिले पाकिस्तानबाट खरीद गरी कोलकातासम्म जहाजमा र त्यसपछि रेलबाट ल्याइएका करीब ५० कन्टेनर छोहोडा त्यत्तिकै थन्केर बसेको छ । चाँडै जाँचपास नभए घामपानीले खराब हुन सक्छ । पाकिस्तानबाट करीब नेपाली
रु ८५ प्रतिकिलोमा खरीद गरी भाडा र राजस्व तिर्दा किलोको करीब रु १५० पर्छ । एउटा कन्टेनरमा करीब १७/१८ टन छोहोडा हुन्छ । छोहोडाको जाँचपासबाट सरकारलाई करीब रु सवा दुई करोड राजस्व प्राप्त हुन्छ । छोहोडा आयातमा ६ प्रतिशत भन्सार महसूल, ५ प्रतिशत अन्तःशुल्क र १३ प्रतिशत मूल्य अभिवृद्धि कर लाग्छ । दीपेन्द्र गुप्ताको बिएलजे ग्रुप प्रालिको ४ कन्टेनर, प्रदेश २ का सदस्य राजेश्वरसाह तेलीको जयमाँ भुवनेश्वरी ट्रेडिड्ढो ८ कन्टेनर, नवनीत अग्रवालको २ कन्टेनर, मुकेश अग्रवालको बालाजी ट्रेडर्सको ४ कन्टेनर, तेजकरण जैन सञ्चालक रहेको कुबेर एक्जिम प्रालिको ३५ कन्टेनर गरी ५१ कन्टेनर छोहोडा रोकिएको छ ।
    ५० कन्टेनर ७ महीनादेखि रोकिंदा करीब ५ करोडभन्दा बढी विलम्ब शुल्क र पार्किङ शुल्क मात्र लाग्ने व्यवसायीहरू बताउँछन् । उता पाकिस्तानी निर्यातकर्ताले सामान पठाइसकेपछि भुक्तानी पाएका छैनन् । व्यवसायीका अनुसार सामान जाँचपास नहुँदा नेपाली आयातकर्ताले बैंकिङ प्रक्रिया पूरा गर्न नसकेको कारण निर्यातकर्ताको भुक्तानी रोकिएको छ । यही कारण पाकिस्तानको कराँचीमा रहेको सुखी इन्टरप्राइजेज, ग्लेमर ट्रेडर्स, सुहाना ट्रेडर्सलगायत २० निर्यातकर्तालाई पाकिस्तान सरकारले कालोसूचीमा राखेको छ ।
छोहोडा जाँचपासको प्रक्रियामा छौं–वाणिज्य सचिव

    भन्सार नाकामा रोकिएको छोहोडाको जाँचपासको विषयमा वाणिज्य सचिव वैकुण्ठ अर्यालले जाँचपासको प्रक्रियाबारेमा गृहकार्य भइरहेको बताए । सचिव अर्यालले छोहोडाको बारेमा ढिलो गरी भनिएको बताए । उनले मरिच, केराउ, सुपारीको विषयमा निर्णय भएर छुट्न थालेपछि यसबारेमा कुरा आएको प्रस्ट्याए । उनले छोहोडाको गुणस्तर जाँच हुने र आयात गर्न मुनासिब देखिए मात्र सोचविचार गर्ने अन्यथा कानून मिचेर आयात गरिएकोले सोको जोखिम व्यवसायी स्वयंले लिनुपर्ने बताए ।

Thursday, October 15, 2020

 नेपाल–भारत सिल सीमाको उल्लङ्घन बढ्दै, वीरगंज–रक्सौल मुख्य नाकाबाटै आवतजावत

नेपाल–भारत सिल सीमाको उल्लङ्घन बढ्दै, वीरगंज–रक्सौल मुख्य नाकाबाटै आवतजावत


प्रस, वीरगंज, २९ असोज/
    सरकारले लकडाउन घोषणा गर्नुअगावै भारतसँगको सीमा सिल गरेको  सात महीना बितिसकेको छ र अहिले पनि सीमा सिल नै छ । तर सीमा सिल भएको अवस्थामा जिल्लाका ग्रामीण क्षेत्रमा खुला सीमाको फाइदा उठाउँदै नेपाल–भारतका मानिसहरू लुकीछिपी आवतजावत गर्दै आएकोमा अहिले मुख्य नाकाबाटै आवतजावत शुरू भएको छ ।
    कोरोनाको सङ्क्रमण बढेको बेला सीमानाकाबाट आवतजावतमा कडाइ गरिएको थियो । तर सङ्क्रमण कम भएपछि पर्साका ग्रामीण नाकाका साथै मुख्य नाकाबाट पनि मानिसहरूको आवागमन शुरू भएको पाइएको छ । सीमा सुरक्षामा खटेका दुवै देशका सुरक्षाकर्मीहरूले तस्करका लागि सर्वप्रथम नाका खुकुलो गरेका थिए । तस्करलाई आवतजावत सहज गरेको तर आम मानिसलाई भने रोकेको भनेर ग्रामीण बासिन्दाले सीमाका विभिन्न स्थानमा सुरक्षाकर्मीसँग घम्साघम्सी गरेपछि आम मानिसको आवतजावत शुरू भएको हो ।
    ग्रामीण क्षेत्रका खुला सीमाका चोरबाटोबाट शुरू भएको यो खेल अहिले मुख्य नाकाबाट पनि शुरू भएको छ । वीरगंज महानगरपालिकाको अलौं, श्रीसिया, छपकैया, भकुवा, इनर्वासँगै छिमेकी जिल्ला बाराको बलिरामपुर, मुसहर्वा आदिबाट पनि अहिले मानिसहरूको आवागमन बाक्लिएको छ ।
    तस्करको लागि नाका खुकुलो पारिएपछि सोको फाइदा आम मानिसले पनि उठाउन थालेको स्थानीयले बताए । तस्करीको लागि सुरक्षाकर्मीहरूले बिहान र बेलुकी गरी तीन घण्टाको समय दिएका छन् । यो बाटो नेपालबाट छोहोडा, मरिच, केराउको तस्करी हुन्छ छ भने भारतबाट लत्ताकपडा, किराना, इलेक्ट्रोनिक्स सामानका साथै सबैभन्दा बढी चामलको तस्करी भइरहेको छ । सयौंको सङ्ख्यामा साइकल, मोटरसाइकलबाट तस्करी तीव्ररूपमा भएपछि स्थानीयले पनि मानिस ओसारपोसारको काम शुरू गरेको एकजना स्थानीयले प्रतीकलाई बताए ।
    भारतबाट नेपाल आउन र नेपालबाट भारत जानका लागि केहीले साइकल, मोटरसाइकलबाट मानिसहरूको ओसार पोसार गरिरहेको बताइएको छ । तस्करहरूसँग रकम लिने सुरक्षाकर्मीहरूले यसरी कामविशेषले सीमावारिपारि गर्नेहरूसँग पनि रकम लिने गरेको स्रोतले बतायो ।
    वीरगंजबाट निषेधाज्ञा हटेपछि र सरकारले असोज १ गतेदेखि सार्वजनिक यातायात सञ्चालन गराएपछि भारतबाट मजदूर, व्यावसाय गर्नेहरू ठूलो सङ्ख्यामा यिनै मानिसहरूको सहारामा प्रतिव्यक्ति एक हजार रुपैयाँसम्म दिएर भित्रिएको तिनै स्रोतको दाबी छ । खुला सीमामा सशस्त्र प्रहरी तैनाथ छ । सशस्त्रले तस्कर र मानिसहरूको आवागमनमा रोक नलगाएपछि सीमा पार भएर आउनेहरूबाट ती ठाउँमा रहेका चौकीका प्रहरीले समेत रकम उठाउने गरेको स्रोतको भनाइ छ ।
    मुख्य नाका वीरगंज–रक्सौलमा एकाबिहानैदेखि वीरगंज भन्सार परिसरमा सवारीसाधनहरू राखेर रक्सौलमा काम हुनेहरू त्यहाँ जाने र रक्सौलबाट आउनेहरू शङ्कराचार्य गेटदेखि दक्षिण खुला ठाउँमा सवारीसाधन राखेर वीरगंज आउने गरेको दृश्य अहिले सामान्यझैं भएको छ ।

Wednesday, October 14, 2020

 तिलावे पुलको काममा ठेकेदारको बदमाशी, जनतालाई सास्ती

तिलावे पुलको काममा ठेकेदारको बदमाशी, जनतालाई सास्ती



राधेश्याम पटेल, वीरगंज, २८ असोज/

    वीरगंज–पोखरिया सडकखण्डमा पर्ने तिलावे पुलको काममा ठेकेदार कम्पनीको बदमाशीले गर्दा पर्साका हजारौं जनता सास्ती खेप्न बाध्य छ । ठेकेदार कम्पनी पप्पु/लुम्बिनी ज्वाइन्ट भेन्चर प्रालिको बदमाशीका कारण २०७२ जेठ ७ गते सकार गरेको ठेक्काको अन्तिम २०७७ फागुन १३ गते रहे पनि हालसम्म सम्पन्न हुन सकेको छैन ।
    तत्कालीन भौतिक पूर्वाधार विकासमन्त्री विमलेन्द्र निधिले  उक्त पुलको शिलान्यास गरेका थिए ।
रु ७ करोड ७१ लाख निर्माण लागत रहेको सो पुलको निर्माण अवधि ५ वर्ष बितिसके पनि हालसम्म सो पुलको भौतिक प्रगति २५ प्रतिशत मात्र रहेको छ ।
    ग्रामीण सडकको मेरुदण्ड रहेको तिलावे पुलको काममा स्थानीय जनप्रतिनिधि तथा प्रहरी प्रशासनको उदासीनताले पनि ठेकेदार कम्पनीले निर्माण कार्यमा लापरवाही गरेको बुझिएको छ ।
    पप्पुको साझेदार लुम्बिनी जेभी काठमाडौंका व्यवसायी विष्णु शर्माले  आगामी ५ महीनामा काम सम्पन्न गरिसक्ने बताएका छन्््् । उनले ४० प्रतिशत भौतिक प्रगति भइसकेको र शतप्रतिशत काम ठेक्काको अन्तिम मितिसम्म सकिने बताए । उनले दुईवटा स्पानको काम एकैपटक शुरू भएको दाबी गरेका छन् । पुलको फाउन्डेशन ३५ प्रतिशत, सब स्ट्रक्चर १५ प्रतिशत र स्लेब ढलान ५० प्रतिशत गर्नुपर्नेमा फाउन्डेशनको काम सकेर सब–स्ट्रक्चरको काम भइरहेको बताए । पप्पुले तीन वर्षसम्म काम नगरेपछि लुम्बिनीले आपैंm काम सम्पन्न गर्ने जिम्मा लिएको हो ।

Tuesday, October 13, 2020

 जिल्ला प्रशासनको निर्णयले घूसखोरी बढ्यो

जिल्ला प्रशासनको निर्णयले घूसखोरी बढ्यो



प्रस, वीरगंज, २७ असोज/
    जिल्ला प्रशासन कार्यालय, पर्सा अन्तर्गतको कोभिड–१९ सङ्कट व्यवस्थापन केन्द्रले सरकारी कार्यालय सञ्चालनको क्रममा पर्सा जिल्लाका महानगर, नगर र गाउँपालिकाहरूलाई दुई/दुई दिनको समय प्रदान गरेपछि अहिले यही विषयलाई लिएर सरकारी कार्यालयमा घूसखोरी बढेको छ।
    जिल्ला प्रशासन कार्यालयले आइतवार, सोमवार वीरगंज महानगरपालिका, मङ्गलवार, बुधवार पर्सागढी, बहुदरमाई र पोखरिया नगरपालिका तथा बिहीवार, शुक्रवार १० वटा गाउँपालिकाका जनतालाई सेवा प्रदान गर्न सरकारी कार्यालयहरूलाई निर्देशन गरेको थियो। अहिले सेवाग्राहीहरूको बढी भीड हुने  कार्यालयहरूमा यही बहानामा घूसखोरी बढेको हो। यातायात सवारी शाखा, मालपोत कार्यालय पर्सा, नापी, भूमिसुधार र स्वयम् जिल्ला प्रशासन कार्यालयमा पनि यसै बहानामा घूसखोरी बढेको छ। तोकिएको दिनमा नतोकिएका ठाउँका सेवाग्राहीहरूले सेवा लिंदा घूस दिनुपरेको सेवाग्राहीहरूले बताए। घूस दिएपछि सो दिनको सूचीमा नपरेको ठाउँको काम हुने र घूस नदिनेहरूको काम नहुने गरेको बताएका छन्। सेवाग्राहीहरूले सम्बन्धित कार्यालयमा यसबारे तथ्याङ्क हेर्दा प्रस्ट हुने बताए। कुनै पनि कार्यालयमा घूस दिनेहरूको काम साप्ताहिकरूपमा हुने गरेको बताइएको छ।


Monday, October 12, 2020

 कृषि क्षेत्रलाई आधुनिकीकरण गरे मात्र मधेसमा समृद्धि

कृषि क्षेत्रलाई आधुनिकीकरण गरे मात्र मधेसमा समृद्धि



प्रस, वीरगंज, २६ असोज/
    जनता समाजवादी पार्टी, पर्साको आयोजनामा पटेर्वासुगौली गाउँपालिकाको महुवन र औराहामा पार्टी प्रवेश तथा शुभकामना कार्यक्रम सम्पन्न भएको छ।
    कार्यक्रमका प्रमुख अतिथि एवं पार्टीका वरिष्ठ नेता पूर्वप्रधानमन्त्री डा बाबूराम भट्टराईले कृषि क्षेत्रलाई आधुनिकीकरण तथा बन्द रहेका उद्योगहरू सञ्चालनमा नल्याएसम्म मधेसको अवस्था नसुध्रिने बताए। वर्तमान सरकार भ्रष्टाचारमा लिप्त भएकोले विकास कार्य हुनै नसक्ने उनको आरोप थियो। उनले प्रधानमन्त्रीको समृद्धिको कुरा नाटक मात्र हो, जनतालाई समृद्ध बनाउन अधिकारसम्पन्न बनाउनुपर्ने आवश्यकता रहेको बताए।
    पूर्वप्रम डा भट्टराईले विभिन्न दलका ठूला नेताहरू भ्रष्टाचारमा मुछिएकाले अधिकारसम्पन्न लोकपाल विधेयकको पक्षमा जसपा रहेको र यसका लागि लडिरहने बताए। उनले रेल र जहाजको सपना देखाउने सरकारले यहाँका किसानको लागि खादमलको कारखाना खोलिदिए सहयोग पुग्ने बताए। उनले कोशी, गण्डकी, एनसेल, वाइडबडी जस्ता अर्बौं घोटाला भएकाले आफूले संसद्मा आवाज उठाइरहेको बताए। उनले अधिकारसम्पन्न आयोग बनेमा छानबीनमा सहयोग गर्ने बताए।
    कार्यक्रममा पार्टी अध्यक्ष उपेन्द्र यादवले पाएको अधिकारलाई सुनिश्चित गर्दै बाँकी अधिकारको लागि पार्टी अगाडि बढेको बताए। उनले अहिले पार्टीमा सम्पूर्ण समुदायका व्यक्ति रहेकाले आगामी चुनावमा जनताले सहयोग गरे सरकार बनाउने बताए। अध्यक्ष्F यादवले स्थानीय र प्रदेश सरकार मजबूत रहे पनि अधिकारविहीन रहेकाले अधिकारसम्पन्न बनाउन आफूहरूले सङ्घर्ष गरिरहेको बताए।
    प्रदेश २ का मुख्यमन्त्री लालबाबू राउत गद्दीले प्रदेश २ मा आफ्नो शासन र प्रशासन हेर्न चाहेको र चाँडै प्रशासनको  लागि कर्मचारी गठन गर्ने प्रक्रिया शुरू हुने बताए। सङ्घ सरकारले प्रदेश सरकारलाई पङ्गु बनाएको र अधिकारविहीन प्रदेश सरकारले केही गर्न नसकेको बताए। उनले जनतालाई समृद्ध बनाउन रोजगार आवश्यक रहेको बताए। मुख्यमन्त्री गद्दीले राष्ट्रिय सूचकाङ्कमा कर्णाली प्रदेशभन्दा पनि तल रहेको प्रदेश २ मा सडक, शिक्षा, स्वास्थ्यको अवस्था खराब रहेको र अब सुधार हुँदै गइरहेको बताए। कार्यक्रममा विभिन्न पार्टी परित्याग गरी सयौंले जसपाको सदस्यता लिएका थिए। गापा अध्यक्ष्F प्रदीप जैसवालको सभापतित्वमा भएको कार्यक्रममा वरिष्ठ नेता राजेन्द्र श्रेष्ठ, सङ्घीय सांसद प्रदीप यादव, प्रदेश सांसदहरू प्रह्लाद गिरी, मन्जुर अन्सारी, सिंहासन साह कलवार, भीमा यादव, केन्द्रीय सदस्य वीरेन्द्र यादव, करीमा बेगमलगायतले मन्तव्य व्यक्त गरेका थिए। कार्यक्रमको सञ्चालन जसपाका जिल्ला सचिव तबरेज अहमदले गरेका थिए।

Sunday, October 11, 2020

 साँवा, ब्याज तिर्न पुनः ऋण लिन दबाब

साँवा, ब्याज तिर्न पुनः ऋण लिन दबाब



प्रस, पर्सागढी, २५ असोज/
    लकडाउन, निषेधाज्ञाको अवधिमा लघुवित्त संस्थाहरूबाट लिएको ऋण, ऋणको साँवा, ब्याज तिर्न नसकेका महिला सदस्यहरू अहिले द्विविधामा परेका छन्।
    नेशनल माइक्रो फाइनान्स वित्तीय संस्था लि., सारथि लघुवित्त बैंक, छिमेकी लघुवित्त बैंकलगायतबाट ऋण लिएका हजारौं महिला अहिले बैंकले साँवा र ब्याज तिर्नका लागि पुनः ऋण लिन दबाब दिएपछि द्विविधामा परेका हुन्। बैंकले नयाँ कर्जा दिएर पुरानो कर्जा तिर्न समूहमा रहेका सदस्यहरूलाई भनेको छ।
    नेशनल माइक्रो फाइनान्सका प्रमुख दयाराम प्रसादले ३ सय समूहमा ४ हजार महिला आबद्ध रहेको र उनीहरूलाई साँवा र ब्याज चुक्ताको लागि पुनः ऋण लिन आग्रह गरिएको बताए। उनले केही महिलाले यो अवधिमा ऋणको ब्याज मात्र तिरेको तर साँवा नतिरेको अवस्थामा पुनः सोही साँवाको ब्याज तिर्नुपर्ने हुनाले नयाँ ऋणको लागि आग्रह गरिएको बताए। लकडाउन, निषेधाज्ञाको कारण आर्थिक समस्यामा परेकाहरूलाई बैंकले थप ऋण दिएर भाका अनुसारको किस्ता तिर्न सुविधा दिएको दाबी गरे।
    सारथि लघुवित्त बैंकका प्रमुख गजेन्द्र ठाकुर लोहारको पनि यही भनाइ छ। यस बैंकमा १९ सय ९२ वटा समूह छन् र त्यसमा २२ सय महिला आबद्ध छन्। सबैभन्दा बढी समूह छिमेकी लघुवित्त बैंकमा छ। यो बैंकमा ३३ सय समूह छन्। तर बैंकले सबै तथ्याङ्क दिन असमर्थता जनाएको छ। गोपनीयताको लागि तथ्याङ्क सार्वजनिक गर्न नमिल्ने सो बैंकका कर्मचारीले बताए।
    अहिले लघुवित्त बैंकहरूले २० प्रतिशत ब्याज घटाएर १५ प्रतिशतमा झारेका छन्। लघुवित्त बैंकबाट ऋण लिने महिलाहरूले भने लकडाउन, निषेधाज्ञा अवधिमा ब्याज मात्र तिर्न सकेको र किस्ता तिर्नका लागि बैंकले भने अनुसार ऋण लिने हो भने दोहोरो आर्थिक भारमा पर्ने बताए।
    बैंकले ऋण दिंदा ऋणीसँग डेढ प्रतिशतदेखि २ प्रतिशतसम्म सेवा शुल्क लिने गरेको छ। जतिपटक ऋण लियो सेवा शुल्क तिर्नुपर्छ। बैंकलाई किस्ताबापतको रकम आउने र सेवा शुल्कबाट थप आयआर्जन हुने भएपनि ऋणीहरूलाई भने आर्थिक भार थपिने उनीहरूले बताए।

Saturday, October 10, 2020

 तीन स्थानमा १२ महिलासहित १७८ जनाद्वारा रक्तदान

तीन स्थानमा १२ महिलासहित १७८ जनाद्वारा रक्तदान

प्रस, वीरगंज, २४ असोज/
    वीरगंज महानगरको दुई स्थान र बाराको महागढीमाई नगरपालिकाको एक स्थान गरी शनिवार तीन ठाउँमा भएको रक्तदान कार्यक्रममा १२ जना महिलासहित १७८ जनाले रक्तदान गरेको रक्तसञ्चार केन्द्र वीरगंजका प्रमुख उदयराज शर्माले बताए।
    वीरगंज महानगरको रानीघाटमा दुर्गापूजा सेवा समितिले १४औं पटक आयोजना गरेको रक्तदान कार्यक्रममा तीनजना महिलासहित ६३ जनाले रक्तदान गरेका थिए। समितिका अध्यक्ष सतीशसिंह राजपूतको अध्यक्षतामा भएको रक्तदान कार्यक्रममा सल्लाहकार प्रदीप कुशवाहाले उद्घाटन गरेका थिए। कार्यक्रममा स्वागत दिनानाथ रौनियार र सहजीकरण प्रणय साहले गरेका थिए।
    कार्यक्रममा नीरज गुप्ता, मुन्ना कुमार, साजन सिंह राजपूत, राजकुमार चौधरी, रमिता चौधरीले रक्तदान गरेको रक्तसञ्चार केन्द्र वीरगंजका प्राविधिक धीरेन्द्र झाले बताए।
    यसैगरी प्रभु अस्पतालको प्रथम वार्षिकोत्सवमा आयोजित रक्तदान कार्यक्रमको उद्घाटन पर्साका प्रमुख जिल्ला अधिकारी आसमान तामाङले गरेका थिए।
    अस्पतालका सञ्चालक डा मनोज गुप्ताको अध्यक्षतामा भएको उद्घाटन समारोहमा प्रहरी नायब उपरीक्षक मनोजीत कुँवर, डा दीपक शाक्य, नेपाल पत्रकार महासङ्घ प्रदेश उपाध्यक्ष केसी लामिछाने, शाखा उपाध्यक्ष श्याम बन्जारा, व्यवस्थित वीरगंज अभियानका अध्यक्ष दिलीपराज कार्कीलगायतले मन्तव्य व्यक्त गरेका थिए।
    कार्यक्रममा अनिता यादव, श्रेया गुप्ता, अरुण गुप्ता, अनुराग गुप्ता, उपेन्द्र यादव, रिंकुकुमार, सुरेश परियार, नरेन्द्र प्रसादलगायत ७ महिलासहित ६४ जनाले रक्तदान गरेको रक्तसञ्चार केन्द्र वीरगंजका प्राविधिक प्रमुख सौरभराज पाण्डेले बताए।
    यसैगरी बाराको महागढीमाई नगरपालिकाको गंजभवानीपुरमा ग्लोबल युथ क्लबले आयोजना गरेको रक्तदान कार्यक्रमको उद्घाटन प्रदेशकी अर्थ राज्यमन्त्री उषा यादवले गरेकी थिइन्।
    क्लबका अध्यक्ष अभिषेक साहको अध्यक्षतामा भएको रक्तदान कार्यक्रममा धर्मराज, नवलकिशोर साह, प्रमोद गुप्ता, जनार्दन चौरसिया, जयराम ठाकुरसमेत दुईजना महिलासहित ५१ जनाले रक्तदान गरेको रक्तसञ्चार केन्द्र वीरगंजका प्राविधिक डिल्लीमाया घिमिरेले जानकारी दिइन्।

Friday, October 9, 2020

 ज्येष्ठ नागरिक सङ्घको सातौं जिल्ला सभा सम्पन्न, ज्येष्ठ नागरिकलाई माया गर्नुपर्छ –नगरप्रमुख सरावगी

ज्येष्ठ नागरिक सङ्घको सातौं जिल्ला सभा सम्पन्न, ज्येष्ठ नागरिकलाई माया गर्नुपर्छ –नगरप्रमुख सरावगी



प्रस, वीरगंज, २३ असोज/
    ज्येष्ठ नागरिक सङ्घ, पर्साको सातौं जिल्लासभा वीरगंजमा सम्पन्न भएको छ।
    वीरगंज महानगरका नगरप्रमुख विजय सरावगीको प्रमुख आतिथ्यतामा शुरू भएको कार्यक्रम फूल तथा आँपको बिरुवा रोपण गरी शुभारम्भ भएको थियो। कार्यक्रममा नगरप्रमुख सरावगीले ज्येष्ठ नागरिक, समाज र परिवारको गहना भएको बताए। उनले ज्येष्ठ नागरिकलाई हेला होइन, माया गर्नु परिवारको सदस्यको कर्तव्य रहेको बताए।
    नगरप्रमुख सरावगीले ज्येष्ठ नागरिकलाई आफूले सकेसम्म सहयोग गरेको बताउँदै आगामी दिनमा पनि सहयोग गर्ने प्रतिबद्धता व्यक्त गरे। उनले ज्येष्ठ नागरिक सङ्घलाई जग्गा दिने प्रक्रिया शुरू भइसकेको बताउँदै चाँडै भवन निर्माण गरिदिने आश्वासन दिए।
    उनले लक्ष्मणवा पार्कलाई व्यवस्थित गरेर ज्येष्ठ नागरिक सङ्घको जिम्मा लगाउने प्रक्रियामा रहेको बताए।
    नगरप्रमुख सरावगीले घण्टाघरदेखि पावरहाउस चोकसम्मको बाटो बिग्रेको स्वीकार्दै टेन्डर प्रक्रियाबाट चाँडै सडक विस्तार गर्ने बताए। गत वर्ष भएको मरम्मतको क्रममा सडकभन्दा माथि टालटुल गरेको कारण महानगर नै आलोचित भएको र यसको लागि क्षमायाचनासमेत गरे।
    सङ्घका अध्यक्ष जगदीशप्रसाद शर्माको अध्यक्षतामा भएको कार्यक्रममा जिल्ला सभा उद्घाटन समारोहमा त्रिमूर्ति टोल सुधार समितिकी अध्यक्ष उमा मिश्र, वडाध्यक्ष रामदरश कुशवाहालगायतले मन्तव्य व्यक्त गरेका थिए।
    कार्यक्रममा सङ्घको विगत गतिविधि र आगामी वर्षको कार्यक्रमबारे सचिव जुमादिन शेख हवारीले प्रतिवेदन र सङ्घका कोषाध्यक्ष किशोरीप्रसाद गुप्ताले आय–व्ययको विवरण प्रस्तुत गरेका थिए। निवर्तमान अध्यक्ष पशुपति विक्रम शाहले स्वागत मन्तव्य व्यक्त गरेको कार्यक्रमको सञ्चालन तेस्रो पुस्ताका मुस्कान शर्मा र खुशी शर्माले गरेका थिए।
    लगत्तै शुरु भएको बन्द सत्रले सचिव र कोषाध्यक्षको प्रतिवेदनमाथि सहमति जनाउँदै पारित गरेका थिए। बन्द सत्रले कार्य समितिका सदस्य नवलकिशोर पाण्डेको मृत्यु भई खाली रहन गएको पदमा कार्यसमितिले मनोनयन गरको बद्रीनारायण केसीको नाम अनुमोदन गरेको थियो।

Thursday, October 8, 2020

 संस्थागत विद्यालयका विद्यार्थीहरू सामुदायिकमा भर्ना हुँदै

संस्थागत विद्यालयका विद्यार्थीहरू सामुदायिकमा भर्ना हुँदै


ओमप्रकाश चौधरी, सेढवा, २२ असोज/
    संस्थागत विद्यालयमा अध्ययनरत विद्यार्थीहरू अहिले सामुदायिक विद्यालयमा भर्ना हुन थालेका छन्।
    लकडाउन, निषेधाज्ञामा निजी विद्यालयमा अध्ययनरत विद्यार्थीहरूसँग अहिले विद्यालयले सो अवधिको शुल्क माग गरेपछि उनीहरू संस्थागत विद्यालय त्यागेर सामुदायिक विद्यालयमा भर्ना हुन थालेका हुन्। लामो समयसम्म विद्यालय बन्द भएपनि संस्थागत विद्यालयले शुल्कको लागि अभिभावक र विद्यार्थीहरूलाई दबाब दिएपछि उनीहरू सामुदायिक विद्यालयमा भर्ना भइरहेका एकजना अभिभावकले बताए।
    जगरनाथपुर गापा–१ पिडारीगुठीका राजु चतुर्वेदीका छोरा वीरगंजस्थित ओम नेशनल स्कूलमा अध्ययनरत थिए। अहिले उनले छोरालाई सो विद्यालयबाट निकालेर सामुदायिक विद्यालयमा भर्ना गराएका छन्। विद्यालयबाट नाम हटाएको प्रमाण लिनका लागि पनि संस्थागत विद्यालयले अध्ययन नगराएको ६ महीनाको शुल्क माग गरेको चतुर्वेदीले बताए। एक दिन पनि विद्यालय सञ्चालनमा नआएको अवस्थामा ६ महीनाको शुल्क माग गर्नु सरासर गलत भएको उनको भनाइ छ।
    जीराभवानी गापा–२ मा रहेको नेरामावि सेढवाबिर्ताका प्रअ जितेन्द्रप्रसाद गौरोले तीन–चार दिनको अवधिमा ४५ जनाभन्दा बढी संस्थागत विद्यालयका विद्यार्थीहरू भर्ना भएको बताए। उनले कक्षा ६, ७, ८ मा संस्थागत विद्यालयका विद्यार्थीहरू भर्ना भएको जानकारी गराए। विद्यालयले पाठ्यपुस्तक र छात्रवृत्ति वितरण गरेपछि भर्ना बढेको हो। भर्ना हुनेमा संस्थागत विद्यालयका विद्यार्थीहरू बढी भएको उनको भनाइ छ।
    नेपाल शिक्षक महासङ्घ, ठोरीका अध्यक्ष अमृत श्रेष्ठले ग्रामीण क्ष्Fेत्रबाट ठूलो सङ्ख्यामा बालबालिकाहरू पठनपाठनको लागि शहर गएका र लकडाउन, निषेधाज्ञामा उनीहरू फर्केर घरमा बसेको अवस्थामा संस्थागत विद्यालयहरूले घर बसाइको पनि शुल्क माग गरेको हुँदा अभिभावकहरूले शुल्क तिर्न नसकेर गाउँकै सामुदायिक विद्यालयमा भर्ना गराउन थालेको बताए। उनले ठोरीमा कक्षा १ देखिका विद्यार्थीहरूको भर्ना भइरहेको जानकारी गराए।
    ठोरी गापाको सामुदायिक विद्यालयमा प्रअ र शिक्षकहरू नयाँ भर्ना भएका विद्यार्थीहरूलाई घरदैंलोमा पुगेर निश्शुल्क पाठ्यपुस्तक वितरण गरिरहेको अध्यक्ष श्रेष्ठले बताए।  

Wednesday, October 7, 2020

 गैरकर्मचारीबाट सञ्चालित पर्साको मालपोत कार्यालय

गैरकर्मचारीबाट सञ्चालित पर्साको मालपोत कार्यालय



प्रस, पर्सागढी, २१ असोज/
    मालपोत कार्यालय, पर्सामा ११ जना गैरकर्मचारीले संवेदनशील फाँट सञ्चालन गर्दैआएको रहस्य खुलेको छ। जग्गासम्बन्धी संवेदनशील फाँट मानिएको तामेली र मठ फाँटलगायतमा ११ जना गैरकर्मचारी खटिएका छन्।
    उनीहरू खटेको बारेमा कार्यालय प्रमुख सुमन झा अनभिज्ञ छैनन्। उनले कर्मचारी अभावमा गैरकर्मचारी खटेको स्वीकारे। मालपोतबाट दरबन्दी, करार र अस्थायीमा नरहेका गैरकर्मचारीहरूको खटनपटन झनै विवादास्पद छ। उनीहरूले सेवाग्राहीहरूसँग खुलेआम रकम माग्ने गरेका छन्। रकम नदिनेहरूको काम नगर्ने, उनीहरूलाई दैनिकी कार्यालयमा आउन बाध्य पारेर दुःख दिने र पैसा लिएर मात्र काम गर्नेजस्ता कार्य गर्दैछन्।
    यसबारेमा कार्यालय प्रमुख झाले जवाफ दिएनन्। कार्यालयमा खटेका ११ जना कर्मचारीले खुलेआम सेवाग्राहीसँग रकम लिने गरेको प्रमाण सुरक्षित छ। यसअलावा मालपोत कार्यालय, पर्सामा लेखनदासहरू स्वयम्ले फाँट–फाँटमा गएर आआफ्नो काम गर्छन्। यही कारण बेलाबेलामा  मालपोत कार्यालय, पर्सामा फर्जी जग्गा प्रकरण हुने गरेको छ।
    गैरकर्मचारी र लेखनदासहरूको मनोमानी काम रोक्न कार्यालय असमर्थ देखिएको छ। स्वयम् कार्यालय प्रमुख कर्मचारी अभाव भएको दुहाइ दिएर यी सबै विकृतिलाई टुलुटुलु हेरी बसेका छन्। गैरकर्मचारीको मनोमानीलाई नजरअन्दाज गर्नुले कार्यालय प्रमुखको संलग्नता प्रस्टिन्छ।

Tuesday, October 6, 2020

 वीरगंज–ठोरी सडक सामान्य वर्षामा पनि अवरुद्ध

वीरगंज–ठोरी सडक सामान्य वर्षामा पनि अवरुद्ध



प्रस, सेढवा, २० असोज/

    वीरगंज–ठोरी सडकखण्ड सामान्य वर्षामा पनि अवरुद्ध हुन थालेको छ ।
    सोमवार दिउँसो साढे दुई बजेतिर परेको सामान्य वर्षापछि वीरगंज–ठोरी सडकखण्ड अन्तर्गत जीराभवानी गाउँपालिका–२ सेढवाको सडक हिलाम्य भयो । सडक हिलाम्य भएसँगै सवारीसाधनहरू सञ्चालनमा अवरोध भयो । सडकखण्डमा सवारीसाधन सञ्चालन हुन नसकेपछि गापाले मर्मत सम्भार ग¥यो । मर्मत सम्भार नहुन्जेल यो सडकखण्डबाट सञ्चालन हुने सवारीसाधनहरू वैकल्पिक बाटोको प्रयोग गर्न बाध्य भए । सेढवाबाट सुपौली, जगरनाथपुर भएर गण्डक नहर हुँदै अहिले बस, ट्याक्टर, ट्रक, एम्बुलेन्स, साइकल, मोटरसाइकल चलिरहेका छन् । थरुहट सडकको ठेक्का पाएको रञ्जन निर्माण सेवाले गत असारमा यो सडकखण्डमा माटो खसाएर अहिलेसम्म काम सुचारु नगरेको कारण सामान्य वर्षामा पनि यो सडक अवरुद्ध हुने गरेको छ । बारम्बारको ताकेतापछि पनि ठेकेदार कम्पनीले असोजको आधाभन्दा बढी अवधि बित्दा सडक निर्माणको काम शुरू गरेको छैन । ठेकेदारले सडक निर्माणमा चासो नदेखाएको कारण अहिले यो भेगमा सामान्य वर्षामा पनि सवारीचालकहरू समस्या भोग्न बाध्य छन् ।

Monday, October 5, 2020

जिप्रकामैं स्वास्थ्य मापदण्डको पालना भएन

जिप्रकामैं स्वास्थ्य मापदण्डको पालना भएन

 


प्रस, वीरगंज, १९ असोज/

    लकडाउन, निषेधाज्ञा जारी भएको सात महीनामा पछिल्लोपटक असोज १ गतेदेखि सञ्चालनमा आएको पर्सा जिल्लाका सरकारी कार्यालयहरूमा अहिले सङ्क्रमणको जोखिमलाई बेवास्ता गर्दै सेवा प्रवाह भइरहेको पाइएको छ ।
    कोभिड–१९ को जोखिमका बीच सञ्चालनमा आएका सरकारी कार्यालयहरूलाई उच्च सतर्कता अपनाएर स्वास्थ्य मापदण्डको निर्देशन पालना गरी सञ्चालन गर्न निर्देशन दिएको जिल्ला प्रशासन कार्यालय पर्सा आपैंmले नै सो निर्देशनको पालना गरेको छैन । कार्यालय सञ्चालन भएपछि यो कार्यालयमा दैनिक पाँच सयभन्दा बढी सेवाग्राहीको आवतजावत देखिएको छ । सेवा लिन आउनेहरूले सेनिटाइजरको प्रयोग, मास्क लगाउने र सामाजिक दूरी बनाउने जस्ता स्वास्थ्य मापदण्डको ठाडो उल्लङ्घन गरिरहेका पाइएको छ । जिप्रका पर्सामा नागरिकता बनाउन, नागरिकताको प्रतिलिपि लिन, राहदानी बनाउन, उजूरी दिन, मिलापत्र र विभिन्न कार्यालय प्रयोजनका काम गराउनका लागि सेवाग्राहीहरूको आवतजावत हुने गरेको छ । यहाँ सबैभन्दा बढी भीडभाड नागरिकता र राहदानी बनाउने फाँटमा हुन्छ ।
    स्वयम् नियम पालना गराउने कार्यालयमा यस प्रकारको भीडभाडबारे प्रमुख जिल्ला अधिकारी आसमान तामाङ भन्छन्, “सात महीना कार्यालय बन्द भएकोले धेरै काम रोकिएको छ । त्यसैले सेवाग्राहीहरूको सङ्ख्या बढेको छ । उनीहरूलाई सेनिटाइजरको प्रयोग, मास्क लगाउन र सामाजिक दूरी बनाउन भनिए तापनि कार्यान्वयनमा समस्या भएको छ,” उनले जोखिम भएको कुरा स्वीकार्दै भन्छन्, “जतिभन्दा पनि सेवाग्राहीहरूले टेरेका छैनन् । कार्यालय प्रवेश गर्दा सुरक्षाकर्मी र कार्यालयभित्रका कर्मचारीले भन्दा–भन्दा थाकिसके तर सेवाग्राहीहरूले अटेर गरिरहेका छन् ।”
    नियम कानूनको पालना गर्ने, गराउने कार्यालयको यो हरिबिजोग छ भने यहाँका अन्य भीडभाड बढी हुने कार्यालय मालपोत, नापी, भूमिसुधार, यातायात (सवारी, लाइसेन्स), वीरगंज महानगरपालिका लगायतका कार्यालयको हविगत के होला सहजै अनुमान गर्न सकिन्छ ।

Sunday, October 4, 2020

धानभन्दा भुस धेरै भएपछि किसान पीरमा

धानभन्दा भुस धेरै भएपछि किसान पीरमा



चिरञ्जीवी सापकोटा, ठोरी, १८ असोज/

    असारमा मानो रोपे पनि मङ्सिरमा मुरी भिœयाउन नसकिने लक्षण देखिएपछि ठोरीका किसानलाई पीर परेको छ ।
    धानको बालामा दाना लाग्नुपर्ने बेला दानाभन्दा पनि भुस धेरै देखिएको छ । “असारको बेला दिनरात घामपानी नभनी धान रोपेकै हौं । रु ७ सय पर्ने युरिया मल रु ३ हजारसम्म तिरेर धानमा हालेका थियौं । तर अहिले धानको झुल्नुपर्ने बालामा दानाविनाको भुसले बाला ढाकेको छ,” ठोरी–२ का धान किसान गोविन्द प्याकुरेलले प्रतीकसँग गुनासो पोखे । धान भिœयाउनुपर्ने बेलामा यस वर्ष पराल मात्रै भिœयाउनुपर्ने अवस्था आएकोले निकै मानसिक तनाव भइरहेको ठोरीका किसानहरूको दुःखेसो छ ।
    बालीहरूमध्ये सबैभन्दा धेरै मेहनत धान रोप्नको लागि पर्छ । खेत जोत्ने, हिल्याउने, पानी लगाउने, रोपाइँ गर्ने, गोडमेल गर्ने, मल छर्ने, कीटनाशक औषधिको प्रयोग गर्नेलगायतका कृषि कर्म गरेका किसानहरू मङ्सिरमा भिœयाइने  धानको बालामा पोटिलो दानाको कल्पनामा थिए । तर दाना लाग्नुपर्ने बेलामा धान सुक्दै पहेंलो हुँदै गएपछि दानाको ठाउँमा भुस मात्रै देखिएको छ ।
    धान नफलेको कारण कतिपय किसान खेतमा डँढेलो लगाउने बताइरहेका छन् भने केही किसान वस्तुभाउलाई खुवाउनको लागि पराल मात्रै भएपनि भिœयाउने तयारीमा छन् । धान किसान प्याकुरेलका अनुसार धानको कुनै पनि बालामा हरियोपन देखिंदैन, बोट सुकेर पहेंलो भएको छ । धान फल्ने बालामा भुसैभुस मात्रै फलेको छ ।   बितेका वर्षहरूमा चितवन राष्ट्रिय निकुञ्जको जङ्गलबाट आउने हात्ती, बँदेललगायतका जङ्गली जनावरले धान खाने, नष्ट पार्ने गरेका थिए । यस वर्ष बोटमा दाना नफलेपछि जङ्गली जनावर पनि नआएको स्थानीय बासिन्दाको भनाइ छ । विगत ७० मुरी धान फल्ने खेतमा यसपालि मुश्किलले ४ देखि ७ मुरीसम्म मात्र धान भिœयाउन पाउने किसान रञ्जु पराजुलीको अनुमान छ ।
    “धानको बाला लाग्ने बेला भएपछि शुरूशुरूमा सेतो पुतली लागेको त्यसपछि अन्य कीराहरू लागेर धानको बालालाई सुकाइदियो,” पराजुलीले बताइन् ।
      यसपालि धेरै पानी परेको र हुरीबतास बढी चलेका कारण धानमा यसको  असर परेको हुन सक्ने किसानहरूको  ठम्याइ छ । ठोरी १ र २ का अधिकांश बासिन्दा कृषिमा निर्भर छन् । यहाँको प्रमुख खेती धानबाली हो । यहाँ कुनै पनि निकायबाट मजदूरका लागि सम्बन्धित निकायले समयमैं उन्नत जातका बीउबिजनको व्यवस्था गर्न सके, समयसमयमा कृषि प्राविधिकद्वारा कृषकहरूलाई प्रशिक्षण, अनुगमन र राय सल्लाह दिए यस्ता समस्या नआउने जानकारहरूको सुझाव छ ।

Saturday, October 3, 2020

 ८ महिलासहित ८२ जनाद्वारा रक्तदान

८ महिलासहित ८२ जनाद्वारा रक्तदान



प्रस, वीरगंज, १७ असोज/
    वीरगंज महानगर–१४ पिपरामा शनिवार ग्यालेक्सी युवा क्लब पिपराले आयोजना गरेको रक्तदान कार्यक्रममा ८ महिलासहित ८२ जनाले रक्तदान गरेको रक्तसञ्चार केन्द्र वीरगंजका प्राविधिक प्रमुख सौरभराज पाण्डेले बताए।
    क्लबका अध्यक्ष राजेश पटेलको अध्यक्षतामा भएको कार्यक्रमको प्रमुख अतिथि नेपाली काङ्ग्रेसका केन्द्रीय सदस्य अजय चौरसियाले उद्घाटन गरेका थिए। उद्घाटन कार्यक्रममा नेपाली काङ्ग्रेसका नेता अनिल रूँगटा, रामनारायण कुर्मीलगायतले मन्तव्य व्यक्त गरेका थिए।
    क्लबका अध्यक्ष पटेलले रक्तदान गरी शुभारम्भ गरेको कार्यक्रममा भीम पटेल, उमाशङ्कर ठाकुर, लालबाबूप्रसाद कुर्मी, देवकुमार पटेल, शम्भु साह, सन्तोषप्रसाद पटेल, सुनील पटेल, रूपेश साह, राजु हवारी, प्रमोद चौधरी, रेखा देवी, गायत्री देवी, इन्दु देवी, सङ्गीता देवी, सुनीता देवी, मुन्ना गुप्ता, सुशील ढुङ्गेल, रञ्जीत पटेललगायतले रक्तदान गरेको रक्तसञ्चार केन्द्र वीरगंजका प्रमुख उदयराज शर्माले बताए।

Friday, October 2, 2020

 नक्कली कारोबारलाई रोक्न राजस्वमा बायोमेट्रिक फर्म दर्ता

नक्कली कारोबारलाई रोक्न राजस्वमा बायोमेट्रिक फर्म दर्ता



प्रस, परवानीपुर, १६ असोज/
    आन्तरिक राजस्व कार्यालय पर्साले आधुनिक प्रविधियुक्त बायोमेट्रिक प्रणालीबाट फर्म दर्ता गर्ने सुविधा शुरू गरेको छ।
    गत आव २०७६/७७ देखि यो सुविधा शुरू भएको कार्यालयका सूचना अधिकारी एवं कर अधिकृत ह्दयनारायण महतोले जानकारी गराए। उनका अनुसार नेपाल सरकारको नीति अनुसार अब हरेक आन्तरिक राजस्व कार्यालयमा शुरूको चरणमा मूल्य अभिवृद्धि करतर्फ दर्ता हुने फर्मको बायोमेट्रिक प्रणालीबाट दर्ता प्रक्रिया शुरू भएको हो।
    गत असार मसान्तसम्म आन्तरिक राजस्व कार्यालय वीरगंजमा ३४ जना नयाँ करदाताले उक्त प्रविधिबाट आफ्नो फर्म दर्ता गराइसकेको उनले जानकारी गराए। साथै आगामी २०७८ असार मसान्तसम्म मूअकमा दर्ता रहेका पुरानाका करदाताहरूको विवरण पनि अद्यावधिक गर्ने कार्य भइरहेको उनले बताए।
    कार्यालयको गत असार मसान्तसम्मको तथ्याङ्क अनुसार मूअकतर्फ ९ हजार २ सय २०, डब्लु प्यान (सरकारी कार्यालय)तर्फ ६७, अन्तःशुल्कतर्फ १३ सय ९२, आयकरतर्फ ३१ हजार १ सय ९६, घरबहालतर्फ ११४ र व्यक्तिगत प्यानतर्फ ४७ हजार ४ सय ७८ जना करदाता दर्ता रहेका छन्। यो प्रणालीमा फर्म अद्यावधिक वा नयाँ दर्ता गराउन सम्बन्धित व्यक्ति स्वयम् उपस्थित भई कम्प्युटरमा फोटो खिच्ने, दुवै हातको दुईवटा बूढी औंलाको छाप दिनुपर्ने, डिजिटल हस्ताक्षर दिनुपर्ने नियम छ। अशिक्षित फर्म सञ्चालकले औंठा छाप र डिजिटल हस्ताक्षरमा पनि औंठाकै छाप हान्नुपर्ने नियम छ।
    बायोमेट्रिक प्रणालीबाट फर्म दर्ता गरेपछि कार्यालयले केही सेकेन्डमा उक्त व्यक्तिको कुन कुन आर्थिक कारोबारमा संलग्नता छ भन्ने ट्र्याक गर्न सजिलो हुनेछ। गलत तथा फर्जी आर्थिक कारोबारलाई अङ्कुश लगाउन सकिने भएकोले सरकारले यस्तो प्रविधिबाट करदातालाई नियन्त्रण तथा सुविधा दिन खोजेको कार्यालयले जनाएको छ।

Thursday, October 1, 2020

 पाँचजना ज्येष्ठ नागरिक सम्मानित, ज्येष्ठ नागरिकलाई सहयोग गर्ने नगरप्रमुखको प्रतिबद्धता

पाँचजना ज्येष्ठ नागरिक सम्मानित, ज्येष्ठ नागरिकलाई सहयोग गर्ने नगरप्रमुखको प्रतिबद्धता



प्रस, वीरगंज, १५ असोज/
    अन्तर्राष्ट्रिय ज्येष्ठ नागरिक दिवस वीरगंजमा मनाइएको छ। वीरगंज महानगरपालिकाको आयोजना तथा ज्येष्ठ नागरिक सङ्घ, पर्साको सहकार्यमा नेपाल पत्रकार महासङ्घ, पर्साको सभाकक्षमा दिवस मनाइएको थियो।
    दिवसको अवसरमा नगरप्रमुख विजयकुमार सरावगी र उपप्रमुख शान्ति कार्कीले तीनजना महिला र दुईजना पुरुष गरी पाँचजना ज्येष्ठ नागरिकलाई प्रमाणपत्र, दोसल्ला, छाता र नगदबाट सम्मानित गरे। विष्णुकुमारी कँडेल, पद्माकुमारी शर्मा, तेतरी कनुइन, गोपाल साह कानू, इस्माइल मियाँ धोबी सम्मानित भएका हुन्।
    ज्येष्ठ नागरिकहरूलाई छाताको व्यवस्थापन रोटरी क्लब अफ वीरगंज मेट्रोपोलिसले गरेको थियो।
    सो अवसरमा नगरप्रमुख सरावगीले ज्येष्ठ नागरिकका लागि महानगरपालिकाबाट सक्दो सहयोग गर्ने प्रतिबद्धता व्यक्त गरे। उनले ज्येष्ठ नागरिकहरूको हकमा महानगरपालिकाले थुप्रै काम गर्दै आएको र गर्ने आश्वासन पनि दिए।
    नगरप्रमुख सरावगीले ज्येष्ठ नागरिकहरूको लागि जग्गा उपलब्ध गराउने काम अन्तिम चरणमा रहेको बताए। उनले कोरोनाको समयमा ज्येष्ठ नागरिकहरूलाई झन् बढी ख्याल गर्नुपर्ने सुझाव दिए। यसैगरी, ज्येष्ठ नागरिकहरूलाई कोरोनाबाट जोगिनको लागि बाहिर नघुम्न र घरमैं सुरक्षित बस्न सुझाव दिए।
    फरक प्रसङ्गमा नगरप्रमुख सरावगीले आफू महानगरमा पैसा कमाउन, व्यापार गर्नका लागि नआएको प्रस्ट्याए। उनले महानगरको विकासको लागि आफू आएको र त्यसैमा लागेको दाबी गरे। भ्रष्टाचारको कुरा फैलाएर बदनाम गराउनेहरू सक्रिय रहेको भन्दै उनले तथ्यपरकरूपमा भ्रष्टाचार उजागर भएको खण्डमा दोषीलाई कारबाई गर्ने प्रतिबद्धता जाहेर गरे। उनले महानगरका कर्मचारीहरूको सहकार्यमा विकास निर्माण कार्य भइरहेको बताए।
    कार्यक्रममा मनोचिकित्सक डा भरत गोइतले ज्येष्ठ नागरिकहरूलाई बढी ख्याल गर्नुपर्ने बताए। बढ्दो उमेरका ज्येष्ठ नागरिकहरू घरपरिवारलाई लिएर बढी चिन्तित हुने गरेको र उनीहरूको शारीरिक शक्ति पनि कमजोर हुने हुनाले कोरोनाको कहरमा विशेष ध्यान दिनुपर्ने बताए। ज्येष्ठ नागरिकहरूको हकमा घरपरिवारले बढी ख्याल गर्नुपर्ने उनले सुझाव दिए।
    डा नीरज सिंहले कोरोना सङ्क्रमणको बेला विश्वमा देखिएभन्दा नेपालमा फरक परिणाम देखिएको बताए। उनले अन्यत्र बढी उमेरका मानिसहरू सङ्क्रमित भएर मृत्युवरण गर्ने गरेकोमा नेपालमा विपरीत अवस्था देखिएको बताए। चालीसदेखि पचास वर्ष उमेरका सङ्क्रमितहरूको मृत्युदर बढी रहेको उनको भनाइ थियो। डा सिंहले तथ्याङ्क जेजस्तो भएपनि ज्येष्ठ नागरिकहरूलाई स्वस्थ रहनको लागि घरपरिवारले विशेष ध्यान दिनुपर्ने बताए।
    ज्येष्ठ नागरिक सङ्घ, पर्साका अध्यक्ष जगदीशप्रसाद शर्माको अध्यक्षतामा भएको कार्यक्रममा वीरगंज कलेजका प्रिन्सिपल विनोद गुप्ताले ज्येष्ठ नागरिकबारे कार्यपत्र प्रस्तुत गरेका थिए।
    गुप्ताले कार्यपत्र प्रस्तुत गर्दै बदलिंदो परिवेशमा नेपालीको औसत आयु ७५–७७ वर्ष पुग्ने अनुमान गरिएकोले आगामी दिनमा युवा पुस्ता र ज्येष्ठ नागरिकबीचको जीवनशैलीमा परिवर्तन हुन सक्ने बताए। यसको व्यवस्थापनको लागि सरकारले सामाजिक कानून निर्माण गरी सुरक्षित जीवन प्रदान गर्नुपर्ने बताए।

Wednesday, September 30, 2020

  हुलाकी सडकमा पप्पुको बेतुकको काम

हुलाकी सडकमा पप्पुको बेतुकको काम


प्रस, वीरगंज, १२ असोज/
    हुलाकी सडक अन्तर्गत वीरगंज–ठोरी सडकखण्ड मध्ये ३० किलोमिटर सडक निर्माणको जिम्मा पाएको अमर/ कन्टेक्ट/पप्पु जेभी निर्माण सेवाले विनातुकको काम गरिरहेको स्थानीयले आरोप लगाएका छन्। वीरगंजको लक्ष्मणवा चोकदेखि जीराभवानीको चमरीटोलसम्म ३० किलोमिटर सडक विस्तार गर्न जिम्मा पाएको पप्पु कन्स्ट्रक्शनले आवश्यक ठाउँमा कालोपत्र नगरी पहिलेदेखिको राम्रो कालोपत्र भत्काएर पुनः कालोपत्र गरिरहेको देखेर स्थानीयहरूले विनातुकको काम गरिरहेको आरोप लगाएका छन्।
    सोही सडकखण्ड अन्तर्गत बहुअर्वाभाठादेखि चमरी खोलासम्म निर्माणाधीन अवस्थामा रहेको सडक स्तरोन्नति नगरी वीरगंज–पोखरिया सडकखण्डको बहुअर्वाभाठादेखि तिलावे पुलसम्मको कालोपत्रे भत्काएर पुनः कालोपत्र गरेको देखेर स्थानीयहरू छक्क परेका छन्। पप्पु कन्स्ट्रक्शनले अहिले भत्काएकोे कालोपत्र २०७४ सालमा ठेकेदार कम्पनीले निर्माण गरी हस्तान्तरण गरेका थिए।
    कालोपत्र नभएको ठाउँमा सडक सुधार गर्नुको साटो राम्रो अवस्थामा रहेको सडक भत्काएर हिलाम्य र धूलाम्य बनाएको छ। सो सडकमा हिंड्ने जोकोहीले पनि भएको कालोपत्र भत्काएको देख्दा ठेकेदार कम्पनीलाई धिकार्ने गरेका छन्। पप्पु कन्स्ट्रक्शनले बनेको काम बिगार्न मात्र जानेको छ भनी विन्दवासिनीका स्थानीय युवा नेता नरेश गुप्ताले टिप्पणी गरे। लक्ष्मणवादेखि चमरी खोलासम्म ३० किलोमिटर सडकखण्डको अधिकांश ठाउँमा धेरै काम बाँकी छ। तर पप्पुले सिलसिलेवार तरीकाले काम नगरी भएको कालोपत्रे उत्काएर धेरै काम गरेको जस्तो देखाइरहेको गुप्ताको जिकिर छ। सोही सडकखण्डमा पप्पुले तिलावे पुलको निर्माण कार्य वर्षौंदेखि गर्न सकेको छैन। ठेक्का लिएको ७ वर्ष बितिसक्दा पनि एउटा पिलरबाहेक अरू निर्माण कार्य गरेको छैन। पुरानो पुल साँघुरिएर बिहान र बेलुका घण्टौं जाम लाग्ने गरेको छ। सबैभन्दा जरुरी कार्य पुल निर्माणलाई पाखा लगाइ स्तरीय कालोपत्रलाई मात्र पप्पुले भत्काउन जानेको छ।
    गत वर्ष असार मसान्तमा लक्ष्मणवा चोकदेखि रामगढवासम्म कालोपत्रमाथि कालोपत्र गरेको, श्रीसिया खालोनजीकको ५ सय मिटर कालोपत्र भत्काएर सडक जीर्ण बनाएकोले आवागमनमा समस्या भइरहेको छ।
    हुलाकी सडकखण्डको चमरी खोलादेखि ठोरीको चौतारासम्मको ३० किलोमिटर सडकखण्ड निर्माणको जिम्मा पाएको बाँनिया कन्स्ट्रक्शनले ९५ प्रतिशत काम सम्पन्न गरिसकेको छ। तर पप्पु कन्स्ट्रक्शनको अनुसार उसले ३५ प्रतिशत मात्र काम सम्पन्न गरेको  छ। पप्पुले यस किसिमले निर्माण कार्य गर्दा सरोकारवाला निकाय चुप लागेर बस्नु विकासको नाममा गलत अभ्यासले प्रसय पाएको स्थानीयको आरोप छ।
    यस विषयमा हुलाकी सडकका भारतीय कन्सल्टेन्ट बप्पुन बोहोरासँग सम्पर्क गर्दा उनले हुलाकी सडक निर्माणका लागि पप्पु कन्स्ट्रक्शनले २०७२ सालमा ठेक्का लिएको र सोको अन्तिम म्याद २०७७ पुस १३ गतेसम्म रहेको जानकारी दिए। ठेकेदारले ठेक्काभित्र पर्ने सबै काम सिध्याउनुपर्ने हुन्छ। अनिमात्र सबै भुक्तानी पाउने बोहोराले जानकारी दिए। भएको कालोपत्र भत्काएर कालोपत्र नगर्न आफूले पहिले नै सुझाव दिएको तर ठेकेदारले नमानेपछि आफूले केही गर्न नमिल्ने बोहोराको भनाइ रहेको छ। पप्पु कन्स्ट्रक्शनले त तोकिएको समयमा जसरी पनि काम गर्नुपर्छ नत्र भारतीय सरकार रकम फिर्ता लैजाने तयारीमा रहेको बोहोराको भनाइ छ।
    भारतीय कन्सल्टेन्ट बोहोराका अनुसार ५ वर्ष अवधिमा पप्पु कन्स्ट्रक्शनले ३० प्रतिशत काम गरेको बताए। अहिले देखिएको जनशक्ति तथा उपकरणले तोकिएको समयमा पप्पुले काम गर्न नसक्ने बोहोराको भनाइ छ। तर ठेकेदार कम्पनीले म्याद सकिन दुई महीना अवधिभित्र बाँकी ७० प्रतिशत काम सम्पन्न गर्ने दाबी गर्दै आएको बोहोराले बताए।

फरक समाचार

Find us