Showing posts with label आर्थिक समाचार. Show all posts
Showing posts with label आर्थिक समाचार. Show all posts

Sunday, October 18, 2020

 एफओबीबाट सामान मगाउन आयातकर्तालाई सुझाव

एफओबीबाट सामान मगाउन आयातकर्तालाई सुझाव



राधेश्याम पटेल, वीरगंज, २ कात्तिक/
    भारत तथा तेस्रो मुलुकसँगको व्यापार तथा पारवहनको ज्ञान सबैलाई नहुँदा व्यापारमा ठूलो घाटा भोग्नुपर्छ। कुन प्रणालीबाट के सामान मगाउने हो, सोको उचित ज्ञान र दक्ष कर्मचारीको अभावमा व्यवसायीहरू कङ्गाल हुन सक्छन्। तर सही समयमा सही ज्ञान र सीप लगाएर व्यवसाय गरियो भने व्यवसायमा लागत खर्च घटाएर फाइदा गर्न सकिने विज्ञहरूको भनाइ छ।
    श्रीसिया सुक्खा बन्दरगाह भन्सार सञ्चालन गर्न ५ वर्षको ठेक्का लिएको ठेकेदार कम्पनीका अर्थविज्ञहरूका अनुसार नेपाली आयातकर्ताहरूसँग तेस्रो मुलुकसँग गर्नुपर्ने व्यापारमा दक्ष जनशक्ति (प्रोफेशनल फ्रेट फरवार्डर)को नेपालमा अभाव देखिएको छ।
    सुक्खा बन्दरगाह सञ्चालन गर्ने प्रिन्सिटाइन भ्याली प्रालिका स्ट्रेटेजी प्रमुख आदित्य रोयका अनुसार नेपाली आयातकर्ताहरू एजेन्ट वा कम ज्ञान भएका लजिस्टिक प्रतिनिधिबाट मालसामान मगाउँँदा बर्सेनि करोडौं रुपैयाँ घाटा बेहोरिरहेको छन्। उनले नेपाली आयातकर्ताहरू विशेषगरी सिआइएफ
(कस्ट इन्स्युरेन्स पे्रmट)बाट मालसामान मगाउने गरेको बताए।
    यसमा आयातकर्ताहरू निर्यातकर्ता र सिपिङलाइन कम्पनीको नियन्त्रणमा रहने गर्छन्। तर फ्रि अन बोर्ड (एफओबी)बाट मालसामान मगाउँँदा कम्तीमा विभिन्न शुल्कबापत २५ प्रतिशत बचत गर्न सकिने उनको विश्लेषण छ। ‘सिआइएफबाट सामान मगाउँदा जहाजबाट आउने सामानको बीमा विदेशी कम्पनीले गर्छ, जहाज डुब्यो भने बीमाको रकम लिन झन्झट खेप्नुपर्छ, भाडा पनि सिपर
(जहाज कम्पनी)ले तय गर्छ। त्यसैगरी, सामान कुन समयमा आउँछ, कति दिनको विलम्ब शुल्क लिने हो, सबै कुरा सिपिङलाइन कम्पनीको हातमा हुने भएकोले व्यवसायीले अरूको भर पर्नुपर्नेछ। तर एफओबीबाट सामान मगाउँँदा जहाजको भाडा बार्गेनिङ गर्न सहज हुन्छ, बीमा नेपाली कम्पनीसँग गर्न कागजात तथा पैसा भुक्तानी लिन दिन पनि सहज हुनेछ।
    विलम्ब शुल्कमा पनि सिपिङलाइन कम्पनीसँग बार्गेनिङ गर्न सकिन्छ। यसरी सिआइएफभन्दा एफओबी न्यून खर्चिलो प्रणाली हुने भएकोले यस विधिबाट नै सामान मगाउँँदा बेस हुने उनले सुझाव दिए।

Wednesday, September 30, 2020

 व्यावसायिक केराखेतीः सुगर फ्री केरा पनि उत्पादन

व्यावसायिक केराखेतीः सुगर फ्री केरा पनि उत्पादन


प्रस, सेढवा, १४ असोज/
    जीराभवानी गाउँपालिका–१ निवासी जितेन्द्र यादवले व्यावसायिक केराखेती शुरू गरेका छन्।
    यादवले पाँच कट्ठा जग्गामा गत वर्षको कात्तिकमा पाँच सय केराको बोट रोपेका थिए। ११ महीनामा यादवले दुर्ई लाख मूल्यबराबरको केरा उत्पादन गरेका छन्।
    उत्पादित केरा एक साताभित्र बेच्ने यादवले बताए। यादवले जी–९ प्रजातिको केरा रोपेका छन्। साथै सोही प्रजातिका दशवटा सुगर फ्री केरा पनि रोपेका छन्। यादवले प्रतिदर्जन रु ३५ मा केरा व्यापारीलाई बेच्ने योजना बनाएका छन्।
    ५ कट्ठा बलौटे जग्गामा अन्य बाली उत्पादन नहुने भएपछि उनले थप १ बिघा १५ कट्ठा जग्गामा करीब साढे तीन हजार केराको बोट रोपेका छन्। यादवले ५ वर्षदेखि व्यावसायिक कुखुरापालन पनि गर्दै आएका छन्।

Sunday, September 20, 2020

 नोवेल टेक्सटाइल्सको ११ करोडको होजियारी प्लान्ट आउँदै

नोवेल टेक्सटाइल्सको ११ करोडको होजियारी प्लान्ट आउँदै



प्रस, परवानीपुर, ४ असोज/
    चिनियाँ र भारतीय रेडिमेड कपडाको आयात कम भएपछि वीरगंजका उद्योगीहरूले गार्मेन्ट उद्योगतर्फ लगानी विस्तार गर्न थालेका छन्।
    विगत ६ महीनादेखि कोरोना महामारीको कारण बजार, व्यापार प्रभावित भएको छ। लकडाउनले नेपाल–भारत सीमा सिल हुँदा भारतबाट तस्करीमार्फत् तयारी कपडाहरू नेपाल भित्रिन पाएको छैन। जसले गर्दा स्वदेशी उद्योगहरू फस्टाउन थालेको वीरगंजका उद्योगीहरूको भनाइ छ। वीरगंज–पथलैया औद्योगिक कोरिडोरको परवानीपुरस्थित नोवेल टेक्सटाइल्स प्रालिले होजियारी धागो र कपडा उत्पादन गर्ने अर्को युनिट थपिरहेको छ। उद्योगका सञ्चालक रमेश गाडियाका अनुसार रु ५ करोडको मेशिन र भवन भाडा, बिजुलीलगायतमा रु ६ करोड गरी कुल ११ करोडको लगानीमा नोवेल टेक्सटाइल्सको अर्को प्लान्ट स्थापना भइरहेको हो।
    आगामी नोभेम्बरदेखि सञ्चालनमा आउने उद्योगको निटिङ फेब्रिक कपडा बुन्ने मेशिन चीनबाट आयात भएको तथा एयर कभरिङ मेशिन स्वीट्जरल्यान्डबाट आयात गरिएको उनले जानकारी गराए। विदेशबाट आयात तथा तस्करीबाट भित्रिने कपडाको परिमाण घट्दै गएको र महामारीको समयमा देशमा स्वदेशी उद्योगबाट उत्पादित कपडाको माग बढ्दै गएकोले वीरगंजका अन्य उद्योगीहरू पनि होजियारीका कपडा जस्तैः टीसर्ट, ट्र्याक सुट, लेगिङ्जलगायतका कपडा बुन्ने उद्योग लगाउनेतर्फ लगानी बढाउन थालेका छन्।
    “कोरोना महामारीले कपडा उद्योगको लागि अवसर प्रदान गरेको छ। पहिले भारतबाट तस्करीको माध्यम बर्सेनि अर्बौंको कपडा नेपाल भित्रिन्थ्यो, जुन अहिले सम्भव छैन। यस्तो बेलामा स्वदेशी उद्योगहरूलाई सरकारले सहुलियत दियो भने अहिलेको सङ्कटको बेलामा पाठ सिकेर हामी कपडा उत्पादनमा आत्मनिर्भर बन्न सक्छौं,” गाडियाले भने।
    सो प्लान्टबाट मासिक १० टन धागो र ३५ टन कपडा उत्पादन हुने जनाइएको छ। पूर्ण स्वचालित प्रविधि रहेको सो उद्योगमा प्रारम्भिक चरणमा १२ जना प्राविधिकले रोजगार पाउने बताइएको छ।
    वीरगंजमा एउटा/दुई वटा मेशिन  राखेर कम्तीमा २० वटा होजियारी र ५० वटा जति कपडा उद्योग सञ्चालनमा छन्। उद्योगीले कपडा उद्योगजस्तै गार्मेन्ट (तयारी पोशाक) उद्योगलाई पनि सहुलियत दरमा ऋण उपलब्ध गराउनुपर्ने माग गरेका छन्। कपडा उद्योगले ब्याजदरमा ५ प्रतिशत सहुलियत पाउँछ भने गार्मेन्ट उद्योगलाई अहिले सरकारले सहुलियत दिएको छैन। फाइबर आयातमा शून्य प्रतिशत भन्सार महसूल, यार्नमा ५ प्रतिशत र रेडिमेड कपडा आयातमा १५ प्रतिशत रहेकोमा कम्तीमा १० प्रतिशत थप भन्सार महसूल बढाउँदा विदेशी रेडिमेड कपडाको आयात घटेर स्वदेशी उद्योगलाई प्रवद्र्धन गर्न सकिने बताइएको छ।
    विगत १५ वर्षदेखि सञ्चालित नोवेल टेक्सटाइल्समा वीरगंजका उद्योगी विनय साह, गणेश लाठ, चेतन गाडियाको लगानी रहेको छ।

Wednesday, September 16, 2020

 निषेधाज्ञा र लकडाउनका कारण वीरगंजमा रोकियो १५ सय कार

निषेधाज्ञा र लकडाउनका कारण वीरगंजमा रोकियो १५ सय कार


राधेश्याम पटेल, वीरगंज, ३१ भदौ/
    दशैंको सिजन शुरू हुन लाग्दा पनि वीरगंज नाकाबाट पहिलेजस्तो गाडी आयात भएको छैन। दशैं–तिहारमा विशेष गरी मोटरसाइकलदेखि विलासी कार र हेभी सवारीसाधन विगतमा खूबै आयात हुन्थ्यो। तर विगत ६ महीनादेखि जारी कोभिडको असरले देशकै अर्थव्यवस्थामा नकारात्मक असर पारिरहेको छ।
    चैत १० गतेदेखि नेपालमा शुरू भएको लकडाउन र निषेधाज्ञाको कारण बजार बन्द छ। सडकमा गाडी गुडेको छैन, बिक्री नभएर गाडीहरू शोरूममा थन्केका छन्। त्यसमाथि पूर्वअर्थमन्त्री डा युवराज खतिवडाको गाडी आयातमा परिवर्तित भन्सार नीतिले गाडी आयातकर्ताहरू निराश बन्नुका साथै खर्बाैंको लगानी रहेको यो व्यवसाय पनि घाटाको व्यापार बन्न थालेको बताइएको छ।
    गाडी आयात रोक्दा व्यापार घाटा कम हुने भएकोले सरकारले त्यस्तो नीति ल्याएको अर्थमन्त्रीको दाबी थियो। तर गत जेठ १५ गतेको बजेट भाषणमा विद्युतीय गाडीको आयातमा कडाइ गर्दै राजस्वको दर बढाउँदा अहिले विद्युतीय गाडीहरू पनि भन्सार नाकामैं होल्ड भएर खिया लाग्न शुरू भएको छ।
    वीरगंजमा अहिले तीनवटा भन्सार नाकामा १५०० वटा सवारीसाधन होल्ड भएर बसेको भन्सार अधिकारीहरूले बताएका छन्। वीरगंज भन्सारको पुरानो भन्सार नाकामा ३०० कार र आइसिपी नाकामा १४०० वटा सवारीसाधन (ट्रक, ट्रिपर, कार, जीप, भ्यान, ट्याक्टर, लरी) अड्केको छ। श्रीसिया सुक्खा बन्दरगाह भन्सारको यार्डमा करीब २०० विभिन्न ब्रान्डका गाडी थन्केका छन्। कुल गाडीमध्ये ८० प्रतिशत विलासी कार रहेका छन्। कारहरूमा मारुती सुजुकी, हुन्डाई, महिन्द्रा, किया, इसुजु, फोर्ड, टोयोटा, निसान, प्राडोलगायत रहेको आइसिपी भन्सार सञ्चालन हेर्ने नेपाल इन्टरमोडेल यातायात विकास समिति, आइसिपी वीरगंजका वरिष्ठ सहायक प्रकाशकुमार झाले बताए। उनले दुई दिनदेखि ५३२ दिनसम्म होल्ड भएका थुप्रै कार रहेको बताए। यसरी गाडी होल्ड हुँदा २ दिनदेखि ८ दिनसम्म पार्किङबापत २७३ रुपैयाँ प्रतिदिन तिर्नुपर्छ भने त्यसपछि हरेक दिनको ५३२ रुपैयाँ जोडिंदै जाने नियम छ।
    आइसिपीमा रोकिएका करीब १४०० वटा गाडीको पार्किङ शुल्कबापत रु ३ करोड ८ लाख असुल हुन्छ। होल्ड भएका गाडीको पार्किङ शुल्क बढ्दै जाँदा पछि आयातकर्तालाई थप भार पर्छ। उनले हुन्डाई कार आयात गर्ने लक्ष्मी इन्टरकन्टिनेन्टल लिमिटेडले जेठ पहिले नै मगाएको २७ वटा विद्युतीय कार पनि जाँचपास हुन नसकेर थन्केर बसेको बताए। त्यसैगरी, कन्टिनेन्टल ट्रेडिङले आयात गरेको किया, जिओ
अटो मोबाइल्सले आयात गरेको फोर्ड ब्रान्डको कार, अग्निले आयात गरेको महिन्द्राका गाडीहरू, सिप्रदीले आयात गरेको टाटाका गाडीहरू, चौधरी समूहले मगाएको मारुती सुजुकी कार, जापानी ब्रान्डको टोयोटा र निसानका गाडीहरू पनि होल्ड भएका छन्। त्यसैगरी, १० वटा प्राडो कार पनि होल्ड भएको छ।
    बजार बन्द र माग कम भएपछि गाडी आयातकर्ताहरूले गाडी भन्सार बिन्दुबाट नछुटाएको भन्सार अधिकारीहरूले बताएका छन्। वीरगंज भन्सारका सूचना अधिकारी विमलकुमार साहका अनुसार डिजेल र पेट्रोलबाट चल्ने विलासी गाडीको आयातमा ६० देखि ८० प्रतिशत भन्सार महसूल, शतप्रतिशत अन्तःशुल्क, १३ प्रतिशत मूल्य अभिवृद्धि कर र ८ प्रतिशत सडक निर्माण दस्तुर जोड्दा करीब २ सय प्रतिशत राजस्व तिर्नुपर्छ। त्यसैले आयातकर्ताहरू गाडी किन्ने ग्राहक पक्का भएपछि मात्र भन्सार नाकाबाट गाडी छुटाउँछन्। विद्युतीय गाडीमा पनि राजस्व बढाउँदा विद्युतीय गाडीको आयात ठप्प भएको छ भने भन्सार नाका आइपुगेका गाडी जाँचपास गराउन पनि व्यवसायी उदासीन बनेका छन्।

Tuesday, September 8, 2020

 परल मूल्यमा मल पाएपछि किसानहरू खुशी

परल मूल्यमा मल पाएपछि किसानहरू खुशी



प्रस, सेढवा, २३ भदौ/
    जीराभवानी गाउँपालिकाका किसानले परल मूल्यमा मल पाएका छन्। प्रतीक दैनिकमा भदौ १६ गते साल्ट टे«डिङबाट सरकारको अनुदानमा प्राप्त मल संस्थाहरूले दोब्बरी मूल्यमा बिक्री गरिरहेको समाचार प्रकाशित भएपछि स्थानीय प्रशासनले किसानहरूलाई परल मूल्यमा मल उपलब्ध गराउन पहल गरेपछि किसानहरूले मल प्राप्त गरेका हुन्।
    जीराभवानी गापाको वडा नं. २, ३, ४ सेढवा, नौकाटोला, सुपौलीमा रहेको चारवटा कृषि सहकारी संस्थाले युरिया मल प्रतिबोरा रु ८ सयमा बिक्री गरेको छ। साल्ट टे«डिङबाट रु ७ सय ५० मा खरीद गरेको र ढुवानी खर्च जोडेर रु ८ सयमा बिक्री गरेको सहकारी संस्थाले जनाएको छ। साल्ट टे«डिङले यसअघि कृषि सहकारी संस्थाहरूलाई युरिया मलसँगै एसएसपी, साल्फेट र जिङ्क खरीद गर्न बाध्य गरेकोमा यसपटक सहकारीहरूलाई बाध्य गरिएको छैन। साल्ट टे«डिङले संस्थालाई मल मात्र बिक्री गरेपछि संस्थाले पनि किसानहरूलाई आवश्यकता अनुसार मल बिक्री गरेको छ।
    यसअघि, संस्थाले जबरजस्ती किसानहरूलाई मलसँगै अन्य मल पनि बिक्री गर्ने गरेको थियो।
    कृषि संस्थाले किसानहरूको माग अनुसार मल उठाएको र ढुवानी खर्च जोडेर बिक्री गरेको किसानहरूले बताएका छन्। संस्थालाई साल्ट टे«डिङले सातामा एकपटक ७० बोरा युरिया मल उपलब्ध गराएको छ। यसअघि ३० देखि ४० बोरा मल मात्र उपलब्ध गराउने गरेको थियो।
प्रस, पर्सागढी/
    साल्ट टे«डिङले कृषि सहकारी संस्थालाई मल उपलब्ध गराउन शुरू गरेपछि पर्सागढी नपाका किसानहरू खुशी भएका छन्।
    मल नपाएर भारत जानुपर्ने किसानहरूलाई अहिले सुविधा भएको छ। पछिल्लो समयमा नेपाली किसानहरूले भारतीय मल पनि तस्करीका कारण रु १२ सयदेखि रु १४ सयमा खरीद गर्नुपरेको थियो। भारतीय मल प्रतिबोरा ४५ किलोको हुन्छ। भारतमा भारु ३५० पर्ने मल तस्करहरूले रु १२ सयदेखि १४ सयमा बिक्री गर्ने गरेका थिए। अहिले नेपाली मल ५० किलो बोराको किसानहरूले रु ८ सयमा पाइरहेका छन्।
    पर्सागढी सहकारी संस्थाका सञ्चालक रामाशीष यादवले वडाको सिफारिशमा किसानहरूले साल्ट टे«डिङबाट सीधैं मल पाइरहेको बताए। यसका साथै संस्थाले गाउँमा लगेर भाडा जोडी किसानहरूलाई परल मूल्यमा बिक्री गरिरहेका छन्।     


 सुक्खा बन्दरगाहद्वारा १ अर्ब ८६ करोड राजस्व असुली

सुक्खा बन्दरगाहद्वारा १ अर्ब ८६ करोड राजस्व असुली


राधेश्याम पटेल, वीरगंज, २३ भदौ/
    श्रीसिया सुक्खा बन्दरगाह भन्सार कार्यालयले चालू आवको साउनमा राजस्व लक्ष्य भेटाएको छ। भन्सार विभागले भन्सार कार्यालयलाई दिएको लक्ष्यभन्दा ४.६७ प्रतिशत बढी राजस्व सङ्कलन गरेको छ।
    सुक्खा बन्दरगाह भन्सार कार्यालयले गत साउनमा रु १ अर्ब ७८ करोड २७ लाख ८४ हजारको मासिक राजस्व लक्ष्य पाएकोमा लक्ष्यभन्दा ४.६७ प्रतिशत बढी अर्थात् रु १ अर्ब ८६ करोड ६० लाख ८५ हजार राजस्व सङ्कलन गरेको छ। भन्सार कार्यालयले भन्सार महसूलतर्फ रु ९८ करोड ७ लाख ५२ हजार लक्ष्य पाएकोमा रु ८२ करोड २८ लाख २ हजार, मूअकतर्फ रु ५२ करोड २४ लाख १ हजार लक्ष्य पाएकोमा रु ९२ करोड ९९ लाख ९५ हजार, अन्तःशुल्कतर्फ रु २५ करोड ७१ लाख ५ हजार लक्ष्य पाएकोमा रु १० करोड १२ लाख ३३ हजार, सडक निर्माण दस्तुर तथा अन्य महसूल गरी कुल रु १ अर्ब ८६ करोड ६० लाख ८५ हजार राजस्व असुली भएको सुक्खा बन्दरगाह भन्सार कार्यालयका सूचना अधिकारी जगदीश पूर्वेेले जानकारी गराए।
    उनले गत आवभन्दा यस आवको साउनमा राजस्व लक्ष्य कम पाएको हुनाले लक्ष्य भेटाउन सहज भएको बताए। कोरोना महामारीको कारण वीरगंज भन्सार र श्रीसिया सुक्खा बन्दरगाह भन्सार कार्यालयले गत वर्षभन्दा यस वर्ष राजस्व लक्ष्य कम पाएका छन्।
    यस बन्दरगाह भन्सारले चालू आवको १२ महीनाको लागि रु ४४ अर्ब ६३ करोड ३ लाख ६२ हजार राजस्व लक्ष्य पाएको छ। भन्सार कार्यालयले भदौमा रु ३ अर्ब १२ करोड ५७ लाख ७१ हजार, आगामी असोजमा रु ४ अर्ब ४६ करोड २६ लाख ९२ हजार, कात्तिकमा रु २ अर्ब ५ करोड ४२ लाख ८ हजार, मङ्सिरमा रु ४ अर्ब ९२ करोड २६ लाख ६४ हजार, पुसमा रु ५ अर्ब ९७ करोड ८८ लाख २५ हजार, माघमा रु ३ अर्ब ५७ करोड ५१ लाख ३० हजार, फागुनमा रु ३ अर्ब ५६ करोड ९९ लाख २० हजार, चैतमा रु ३ अर्ब ६५ करोड ८५ लाख ३५ हजार, वैशाखमा रु ५ अर्ब १ करोड २४ लाख २२ हजार, जेठमा रु ४ अर्ब १ करोड ९ लाख ४४ हजार र असारमा रु ३ अर्ब ५५ करोड ६४ लाख ६१ हजारको राजस्व लक्ष्य पाएको छ।
सुक्खा बन्दरगाह भन्सार प्रमुखको सरुवा

    श्रीसिया सुक्खा बन्दरगाह भन्सार प्रमुख उमेश श्रेष्ठको सरुवा भएको छ। उनलाई वीरगंजबाट राजस्व अनुसन्धान विभाग, ललितपुरमा सरुवा गरी पठाइएको छ।
    भन्सार प्रमुख श्रेष्ठ आज काठमाडौं गए। उनको ठाउँमा को आउनेबारे निर्णय भएको छैन।
    पछिल्लो दुई वर्षमा सुक्खा बन्दरगाह भन्सार कार्यालयले लक्ष्य अनुसारको असुली गर्दै आएको थियो भने कोरोनाकालमा पछिल्लो ६ महीनामा राजस्व सङ्कलन प्रभावित भएको थियो।

Monday, September 7, 2020

 धानबालीमा विभिन्न रोगको प्रकोप

धानबालीमा विभिन्न रोगको प्रकोप



प्रस, पोखरिया, २२ भदौ/
    बजियानका किसानहरू पनि धानमा बेक्टोरियल लिफ ब्लाइट, सित ब्लाइट, पातको डढुवा (सरनवा) ब्लास्ट रोगको समस्याबाट ग्रसित छन्।
    पकाहामैनपुर, कालिकामाई,   छिपहरमाई गाउँपालिका र पोखरिया नगरपालिकाका किसानहरू धानमा लाग्ने यी रोगहरूबाट आक्रान्त भएको पकाहामैनपुर गापा, धोरे निवासी किसान मनोज मेहताले बताए। उनले पात सुक्ने, रातो, पहेंलो, खैरो धर्को पातमा देखिने गरेको बताए।
    अर्का किसान सोही गापाका सुर्जाहा निवासी वीरेन्द्र चौहानले पनि आफूहरू धानमा लाग्ने रोगबाट चिन्तित भएको र उत्पादन घट्ने चिन्ताले सताएको बताए। पकाहामैनपुर गापाको कृषि शाखाका प्राविधिक हरिनारायण चौरसियाले उपचार गरिएको बीउको प्रयोग नगरेको र रासायनिक मल धानबालीमा आवश्यकता अनुसार नदिएकोले यस्तो रोग निम्तिएको बताए। उनले रोग लागेको धानमा टुप्पोबाट पात सुक्ने, पहेंलो, खैरो धर्को पातमा देखिने जस्ता समस्याहरू किसानहरूले सुनाएको बताए। यो रोगको लागि खेतमा जमेको पानी हटाइ सुक्खा पारेर फाइटोमाइसिन औषधि ५ ग्राम १५ लिटर पानीमा मिसाएर एक कट्ठा खेतमा छर्नुपर्ने बताए।
    यसैगरी, टाटा कन्टस, कपर हाइड्रोसाइड, मेलिगनलगायतका औषधिहरू पनि यो रोगविरुद्ध प्रयोग गर्न सकिने उनले सुझाव दिएका छन्। प्राविधिक चौरसियाले गत वर्षभन्दा यस वर्ष धानखेती बढी भएको र रोग पनि बढी देखिएको बताएका छन्।

Monday, August 24, 2020

 वीरगंज भन्सारको राजस्वमा गिरावट

वीरगंज भन्सारको राजस्वमा गिरावट

राधेश्याम पटेल, वीरगंज, ८ भदौ/
    चालू आर्थिक वर्षको पहिलो महीना साउनमा वीरगंज भन्सारका दुई नाकाबाट एकदमै कम सामान भित्रिएको छ। वीरगंजमा साउन १० गतेदेखि र  जिल्लाभरिमा साउन १९ गतेदेखि विस्तार गरिएको निषेधाज्ञाले पुरानो भन्सार कार्यालय र अलौंमा सञ्चालनमा आएको एकीकृत जाँच चौकी (आइसिपी)बाट आयात–निर्यात एकदमै प्रभावित हुँदF राजस्व सङ्कलन पनि कम भएको भन्सार अधिकारीहरूले बताएका छन्।
    वीरगंज भन्सारले चालू आर्थिक वर्षको १२ महीनाको लागि गत आवभन्दा १० अर्ब कम राजस्व लक्ष्य तोकेको छ। चालू आव २०७७/०७८ को लागि रु १ खर्ब ७२ अर्ब ७९ करोड ८१ लाख ७५ हजार राजस्व लक्ष्य सरकारले निर्धारित गरेको छ। जबकि गत आवको लागि रु १ खर्ब ८२ अर्ब तोकेको थियो।
    चालू आवको साउनको लागि मात्र रु ११ अर्ब ४२ करोड ७४ लाख २० हजार राजस्व तोकिएकोमा रु ७ अर्ब ८१ करोड ९ लाख ५३ हजार सङ्कलन भएको वीरगंज भन्सारले जनाएको छ। भन्सार कार्यालयका सूचना अधिकारी विमलकुमार साहका अनुसार लक्ष्यभन्दा ३ अर्ब ६१ करोड ६४ लाख ६७ हजार कम राजस्व उठेको हो। उनले भने–“कोरोना सङ्कटको बेला स्वास्थ्य सामग्री, औषधि, अत्यावश्यक सामानबाहेक अन्य सामानको आयात न्यून देखिएको छ, विलासी कारसँगै सवारीसाधनको आयातमा पनि ठूलो गिरावट आएपछि वीरगंज भन्सारको राजस्व सङ्कलन प्रभावित भएको हो।”
    वीरगंज भन्सारले गत साउनमा निकासीतर्फ रु ४० लाख राजस्व लक्ष्य लिएकोमा रु ७ लाख ४४ हजार मात्र सङ्कलन गरेको छ। त्यसैगरी, पैठारीतर्फ रु ३ अर्ब ९८ करोड २९ लाख ८१ हजार लक्ष्य रहेकोमा रु ३ अर्ब १७ करोड ८ लाख ९५ हजार असुली गरेको छ। अन्तःशुल्कतर्फ रु १ अर्ब ३४ करोड ८४ लाख ९३ हजार राजस्व लक्ष्य रहेकोमा रु ८७ करोड ७ लाख ६२ हजार सङ्कलन भएको छ भने मूल्य अभिवृद्धि कर (भ्याट)तर्फ रु ५ अर्ब २७ करोड १ लाख ३८ हजार लक्ष्य रहेकोमा रु २ अर्ब ८६ करोड ९९ लाख ११ हजार मात्र सङ्कलन भएको छ।

 धानबालीमा गबारो कीराको प्रकोप, किसानहरू चिन्तित

धानबालीमा गबारो कीराको प्रकोप, किसानहरू चिन्तित


बलिराम शुक्ला, बिरुवागुठी, ८ भदौ/
    धानबालीमा गबारो कीराको प्रकोप देखा परेपछि किसानहरू चिन्तित भएका छन्।
    पर्सागढी नगरपालिका, पटेर्वासुगौली, सखुवाप्रसौनीलगायतका गाउँपालिकामा किसानले लगाएको धानबालीमा यस वर्ष गबारो कीराको प्रकोपको कारण धानबाली नष्ट हुँदा किसान चिन्तित भएका हुन्।
    गबारो कीराले धानको गुबो काट्ने गरेको कारण गुबो गुलाबी/रातो भई सुक्ने गरेको किसानहरू बताउँछन्। कोरोना महामारीले सताइरहेको अवस्थामा धानबालीमा कीरा देखिनुले यस वर्ष धानको उत्पादन कम हुने चिन्ताले किसानहरूलाई सताएको छ।
    कोरोना महामारी, निषेधाज्ञाका कारण नगरपालिका तथा गाउँपालिकाहरू बन्द हुँदा कृषि शाखाका प्राविधिकसँग सुझाव लिन नपाएका किसानहरूले आफूखुशी छरेको विषादीले काम नगरेको र थप आर्थिक भारसमेत बढेको पर्सागढी नगरपालिका–३ का किसान नन्दलाल चौधरीले बताए।
    नगरपालिका तथा गाउँपालिका कृषि प्राविधिकहरू किसानका गाउँँ/टोलमा गई धानबालीमा देखिएको रोग/कीरा न्यूनीकरणको लागि किसानलाई जानकारी गराउनुपर्ने नारायणप्रसाद दाहालले बताए।
    पर्सागढी नगरपालिका कृषि शाखा प्रमुख खड्गप्रसाद खत्रीका अनुसार नगरपालिका बन्द भएको कारण किसानहरूलाई अहिलेको रोग/कीरा सम्बन्धमा सुझाव दिन नसकिएको र अहिले देखिएको गबारो कीरा नियन्त्रणको लागि प्रकाशको पासोको माध्यमबाट वयस्क पुतलीलाई आकर्षित गरी मार्ने र विषादी प्रयोग गर्नुपरेमा कारटाप हाइड्रोक्लोराइड २ जिआर वा फिप्रोनिल ०.३ जिआर १.२५ किलो प्रतिकट्ठाको दरले युरिया मलमा मिसाइ छर्न उनले सुझाव दिएका छन्।

Friday, August 21, 2020

 भदैया मन्सुली धानको बाला सुक्न थाल्यो

भदैया मन्सुली धानको बाला सुक्न थाल्यो

 
प्रस, सेढवा, ५ भदौ/
    भदैया मन्सुली धानको बालामा दाना नलाग्दै सुक्न थालेपछि किसानहरू चिन्तित भएका छन्।
    यो बाली रोपेको ६० दिनपछि बाला निस्किन थालेको र बालाहरूमा दाना नै नलागी सुकेको जीराभवानी गाउँपालिका–२ सेढवाका किसान रामजनम दास थारूले बताए।
    यस वर्ष समय–समयमा पानी परेकाले बाली सप्रे पनि दाना नलाग्दै बाला सुक्दा उत्पादनमा निकै –हास आउने किसान दासले बताए।
    भदौ महीनाको अन्तिम साता वा असोजको पहिलो सातामा भिœयाउन सकिने भदैया मन्सुली, सोना सारो, हर्दिनाथ जातका सबै बालीमा यो रोग देखा परेको छ। यो बाली विशेषगरी गण्डक नहरभन्दा उत्तरतर्फका जगरनाथपुर, जीराभवानी, ठोरी, पटेर्वासुगौली, सखुवाप्रसौनी गाउँपालिका, पर्सागढी नगरपालिका र वीरगंज महानगरपालिकाका किसानहरू लगाउने गरेका छन्।
    जगरनाथपुर गाउँपालिका–३ का साबिर आलमले बितेका वर्षमा पनि यो रोग लागेको बताए। तर पहिले कम थियो, अहिले धेरै बाला सुक्दै गएको उनले बताए।
    पटेर्वासुगौली गाउँपालिकाका कृषि संयोजक गोविन्दभैया थारूले फङ्गस जीवाणुको कारण यो रोग लागेको बताए। बाला निस्किनुअघि धानको पात पहेंलो हुनु यसको लक्षण रहेकोे र समयमैं कारबेन्डाजिन ५० प्रतिशत डब्ल्युपी वा हेक्सा क्लोनाजेल ढुसीनाशक औषधि छरे यो रोग नियन्त्रण गर्न सकिने संयोजक थारूले बताए। तर बाला निस्किसकेपछि यो रोग नियन्त्रण गर्न नसकिने संयोजक थारूले जनाएका छन्।

Thursday, August 20, 2020

 युरिया मलको अभावः डिएपी छर्दै किसानहरू

युरिया मलको अभावः डिएपी छर्दै किसानहरू


प्रस, सेढवा, ४ भदौ/
    भदैया मन्सुली धानको बाला निस्किने र सोना मन्सुलीको गोभा आउने समयमा रासायनिक मलको अभाव कायम नै रहेको छ।
    जीराभवानी गाउँपालिका–१ शान्तिनगरका रविमोहन सापकोटा युरिया मल खरीदको लागि दर्जनौं पसलमा चहारे पनि मल पाएनन्। युरिया मलको अभाव भएपछि उनले डिएपी मल धानमा छरेका छन्। युरिया मलको अभावले गर्दा डिएपी मलमा जिङ्क र श्रीराम फोर्जा मिसाइ बालीमा छरेको किसान सापकोटाले बताए।
    रु १५ प्रतिकिलो पर्ने भारतीय युरिया मल अहिले रु ४० प्रतिकिलोको दरमा बिक्री भइरहेको भएपनि पाउन मुश्किल भएको किसानहरूले गुनासो गरेका छन्।
    पटेर्वासुगौली गाउँपालिका–२ बेलवाका किसान रामपूजन चौधरीले बालीमा छर्न एक महीनादेखि मल खोज्दै हिंडेको तर हालसम्म नपाएको बताए। खेतमा मल नछरेको कारण बाली पहेंलो भएको उनले दुःखेसो गरे। युरिया मल अभावको कारण धान उत्पादनमा निकै गिरावट हुने बताउँदै उनले आगामी एक वर्ष कसरी जहानको पेट पाल्ने भन्ने कुरामा चिन्तित छन्।
    कतिपय किसानले ४० रुपैयाँ प्रतिकिलोको युरिया छर्नुभन्दा ४५ रुपैयाँ प्रतिकिलोमा पाइने डिएपी रासायनिक मल प्रयोग गर्न थालेका छन्। भारतबाट आउने युरिया गुणस्तरहीन भएको भन्दै किसानहरूले बालीमा दोस्रोपटक युरिया मलको साटो डिएपी छर्न थालेका छन्।
    जीराभवानी गापा–२ सेढवाका किसान सन्तोष महतोले भारतीय युरिया मल प्रयोग गर्दा बाली हरियो हुनुको सट्टा रातो हुँदै गएकोमा चिन्ता व्यक्त गरेका छन्।

 सखुवाप्रसौनीमा युरिया मल वितरण

सखुवाप्रसौनीमा युरिया मल वितरण


प्रमोद यादव, पंचगावाँ, ४ भदौं/
    सखुवाप्रसौनी गाउँपालिका–६ लखनपुरमा किसानहरूलाई युरिया मल बिक्री वितरण गरिएको छ।
    जिल्ला कृषि सहकारी सङ्घ पर्साले किसानहरूलाई ३० बोरा युरिया मल बिक्री वितरण गरेको हो। रु ८ सयमा किसानहरूलाई मल बिक्री गरिएको संस्थाका अध्यक्ष शिवकुमार साह तेलीले बताए। एकजना किसानलाई एक बोराको दरले युरिया मल उपलब्ध गराइएको कृषक धर्मा साहले बताए।
    यसैगरी, सखुवाप्रसौनी गाउँपालिका–५ महुवनका आधा दर्जनभन्दा बढी संस्थाले युरिया मल ल्याएर रु एक हजारमा बिक्री गरिरहेको एकजना कृषकले बताएका छन्। साल्ट ट्रेडिङबाट अनुदानमा प्राप्त युरिया मल रु एक हजारमा महुवन र एकडर्वाका सहकारी संस्थाले बिक्री गरिरहेको सखुवाप्रसौनी गापा–५ का किसान चिरञ्जीवी यादवले जानकारी गराएका छन्।
    एकजना कृषकका अनुसार भारतीय मल रु १६ सय र नेपाली युरिया मल रु एक हजारमा खरीद गर्न किसानहरू बाध्य  छन्।

Sunday, August 9, 2020

धान बालीमा गान्ही कीरा र ब्लास्ट रोगको प्रकोप

धान बालीमा गान्ही कीरा र ब्लास्ट रोगको प्रकोप


प्रस, सेढवा, २५ साउन/
    पर्सा जिल्लामा रोपिएको भदैया धानमा अमेरिकी फौजी (गान्ही) कीराको प्रकोप देखिएको छ।
    ११० दिनमा तयार हुने सोना सारो र भदैया मन्सुली धानमा बाला निस्किने बेलामा गFन्ही कीरा लागेर बालालाई क्षति पु–याएको किसानहरूले बताएका छन्। धानको गाभा सुक्ने रोगले अहिले थरुहट क्षेत्रका किसानहरू समस्याग्रस्त भएका छन्।
    गान्ही कीराले बाला लाग्ने बेलामा धानको दाना लाग्ने दूध खाने हुनाले बाला लाग्न नसकेको किसानहरूले बताएका छन्। उनीहरूले गान्ही कीराको कारण उत्पादनमा कमी आउने चिन्ता जाहेर गरे।  जीराभवानी गापा–२ सेढवाका अजयदत्त चौधरीले गान्ही कीराले धानको दाना लाग्ने दूध खाने गरेकोले धानको गाभा सुक्न लागेको बताए। उनले कीरा मार्न दुईपटक औषधि छरेको भएपनि नियन्त्रण नभएको बताए। गान्ही कीराले ठोरी, जीराभवानी, जगरनाथपुर, पटेर्वासुगौली, सखुवाप्रसौनीलगायतका क्षेत्रमा दुःख दिएको छ।
    भदैया धानसँगै अगहनी धानको बालीमा भने सरलहवा (ब्लास्ट) रोगले दुःख दिएको छ। ब्लास्ट रोगले धानको जरालाई खाने र जरा कुहिने गरेको जगरनाथपुर गापाका संयोजक शत्रुघ्न चौरसियाले बताए। उनले निषेधाज्ञाको कारण कार्यालय बन्द भएपनि फोनबाट किसानहरूलाई प्राविधिक सल्लाह दिइरहेको बताए।
    ठोरी गापाका कृषि संयोजक कृष्ण कार्कीले भदैया धानमा लागेको गान्ही कीरा मार्न साप्ताहिकरूपमा कीटनाशक औषधि छर्नुपर्ने बताए। उनले गाउँपालिकाले किसानलाई सो औषधि उपलब्ध गराउने योजनामा राखे पनि निषेधाज्ञाको कारण वितरण गर्न नसकेको बताए। तत्कालका लागि प्राविधिक सल्लाहमा किसानहरूलाई कीटनाशक औषधि प्रयोग गर्न उनले सुझाए।

Thursday, July 30, 2020

चार हजार नागरिकता वितरण

चार हजार नागरिकता वितरण

प्रस, जीतपुर, १५ साउन/
    इलाका प्रशासन कार्यालय सिमरा बाराले एक वर्षमा ४ हजार नागरिकता वितरण गरेको छ भने १ हजार राहदानी सिफारिश गरेको छ।
    इप्रका सिमरा बाराका प्रमुख उपसचिव लक्ष्मण ढकालले आव २०७६/०७७ मा जीतपुरसिमरा उपमहानगरपालिका र निजगढ नगरपालिकाका सर्वसाधारणलाई नागरिकता तथा राहदानी वितरण गरिएको जनाएका छन्। एक वर्षमा २६९२ थान नयाँ नागरिकता, ६० थान वैवाहिक अङ्गीकृत नागरिकता, ११५९ थान प्रतिलिपि नागरिकता र ९७२ थान राहदानीको लागि काठमाडौं सिफारिश गरिएको प्राप्त विवरणमा उल्लेख छ।

Monday, July 27, 2020

वर्षाले पर्साको बदामखेती प्रभावित

वर्षाले पर्साको बदामखेती प्रभावित


प्रस, पोखरिया, १२ साउन/
    यसपालिको बाढीले पर्सा जिल्लाका विभिन्न गाउँपालिकामा बदामखेतीलाई क्षति पु–याएको छ।
    पर्सा जिल्लाका कालिकामाई, धोबिनी, पकाहामैनपुर, जगरनाथपुर, छिपहरमाई, जीराभवानी गाउँपालिकालगायतमा करीब २० हेक्टर क्षेत्रफलमा बदामखेती गरिन्छ। कृषि ज्ञान केन्द्र, पर्साका सुरेश चौरसियाले करीब २० हेक्टर जमीनमा बदामखेती हुने र यसपटकको बाढीले बदामखेतीलाई क्षति गरेको बताए।
    किसानहरूले प्रतिकट्ठा ६०–७० किलो बदाम उत्पादन गर्दै आएका थिए। तर यसपटक बाढीले क्षति पु–याएको हुँदा प्रतिकट्ठा २० किलो बदाम उत्पादन हुने लक्षण पनि देखिएको छैन। नगदेबालीको रूपमा रहेको बदामखेतीबाट किसानहरूले प्रतिकिलो रु २ सयमा बदाम बिक्री गर्दै आएका थिए। बदामखेतीमा यो क्षेत्रका सयभन्दा बढी किसान संलग्न छन्। कालिकामाई गापाको मुर्ली, तीनडोबिया, छिपहरमाई गापाको भिस्वा, जयमङ्गलापुर, मिर्जापुर, भलुवाही, धोबिनी गापाको लङ्गडी, आसवारी, पटेर्वासुगौली गापाको शङ्करसरैया, पाँडेपुर, देउरिया, पकाहामैनपुरको पोखरिया टोल आदिमा बदामखेती गरिन्छ।
    खासगरी, नदी किनारको जमीन र  बलौटे जमीनमा बदामखेती राम्रो हुने गर्छ। जेठ महीनामा बदाम लगाउने र असोजमा उत्पादन भित्र्याइन्छ। यसपटक लगातार आएको बाढीले बदामखेती गर्ने किसानहरूलाई निराश पारेको छ। अझ आज सोमवारदेखि चर्को वर्षा हुने मौसम विभागले सूचना जारी गरेपछि बदाम किसानहरू झनै चिन्तित भएका छन्।

Thursday, July 23, 2020

किसानहरू गोडमेलमा व्यस्त, मलको समस्या यथावत्

किसानहरू गोडमेलमा व्यस्त, मलको समस्या यथावत्

प्रस, सेढवा, ८ साउन/
    पर्साको थरुहट क्ष्Fेत्रका किसानहरू भदैया मन्सुली र अगहनी धानको गोडमेलमा व्यस्त छन्।
    वर्षे बाली धानमा विभिन्न प्रजातिका घाँस, झारहरू उम्रने गरेकाले त्यसलाई गोडमेल गरी सफा गरेर मल छर्दा धान उत्पादन बढी हुने पटेर्वासुगौली गापा–३ का किसान भगन चौधरीले
    समयमा गोडमेल नगर्दा उत्पादन घट्ने हुनाले अहिले किसानहरू गोडमेलमा लागिपरेका छन्। बिहानैदेखि किसानहरू गोडमेलमा सक्रिय देखिएका छन्। भदैया मन्सुली धानको दोस्रोपटक गोडमेल भइरहेको छ भने अगहनी धान र सोना मन्सुलीको पहिलोपटक गोडमेल भइरहेको छ। दुवै धानको गोडमेलमा किसानहरू व्यस्त छन्।
    जीराभवानी गापा–१ का भरत दास थारूले भदैया धानलाई सोहनी (गोडमेल) गर्दै बेहनीको अवस्थामा आएको बताए। उनले भदैया धानको गोडमेल अन्तिम भएको र यो समयमा किसानलाई युरिया मलको आवश्यकता रहेको बताए। तर किसानलाई आवश्यक भएकै बेलामा कृषि सामग्री कम्पनी र साल्ट टे«डिङमा युरिया मलको अभाव छ।
    भारतबाट एक–दुई बोरा आवश्यकता अनुसार ल्याइने युरिया मल पनि पछिल्लो चरणमा त्यहाँ लकडाउन कडा गरिएपछि रोकिएको छ। भारतीय सीमा सुरक्षा प्रहरीले किसानहरूलाई एक–दुई बोरा मल ल्याउन रोक लगाएको छैन। तर तस्करहरूसँगको मिलेमतोमा नेपालतर्फका सुरक्षाकर्मीले भने किसानहरूलाई दुःख दिने गरेको उनले गुनासो गरे।
    नेपालमा पचास किलो तौलको युरिया मल रु ७५० मा प्राप्त हुन्छ भने भारतमा सोही मल भारु ३५० मा पाइन्छ। अहिले युरिया मलको अभाव भएकोले किसानहरूले ४५ किलो तौलको भारतीय युरिया मल रु १५ सयमा खरीद गर्नुपरेको छ। केही किसानले मात्रै युरिया मल सञ्चय गरेका छन्।
    अधिकांश किसानलाई गोडमेल गरेपछि युरिया मल कहाँबाट ल्याउने भन्ने चिन्ता छ।
बताए। उनले यस वर्ष आकाशे पानीमा आश्रित किसानहरूसमेत नियमित वर्षाले उत्पादन सप्रने भएपछि खुशी भएको बताए।
वीरगंज भन्सारले लक्ष्य भेटाउन सकेन

वीरगंज भन्सारले लक्ष्य भेटाउन सकेन

राधेश्याम पटेल, परवानीपुर, ८ साउन/
    मुलुककै प्रमुख भन्सार नाका वीरगंज भन्सार कार्यालय अन्तर्गतका दुर्ई नाका मिलेर पनि गत आर्थिक वर्षको लक्ष्य भेटाउन सकेनन्।
    कोरोना महामारीको कारण आयात–निर्यात, उद्योग–व्यापार चौपट हँुदा वीरगंज भन्सारको राजस्व सङ्कलन पनि प्रभावित भएको हो। गत आवमा लक्ष्यभन्दा ७० अर्ब कम राजस्व भन्सार कार्यालयले असुली गरेको छ। कार्यालयले गत साउनदेखि असारसम्म रु १ खर्ब ८८ अर्ब ६२ करोड ४९ लाख ९४ हजार राजस्वको लक्ष्य पाएकोमा गत आवको १२ महीनामा भन्सार कार्यालयले जम्मा १ खर्ब १८ अर्ब ९७ करोड २७ लाख ५१ हजार मात्र राजस्व सङ्कलन गरेको जनाएको छ।
    वीरगंज भन्सारका सूचना अधिकार विमलकुमार साहका अनुसार कार्यालयले भन्सार महसूलतर्फ ८० अर्ब ७७ करोड १९ लाख ७९ हजार लक्ष्य पाएकोमा ५४ अर्ब ४९ करोड ९८ लाख ५२ हजार, मूअकतर्फ ७६ अर्ब ३३ करोड ८२ लाख ७९ हजार लक्ष्य पाएकोमा ४८ अर्ब ९८ करोड १९ लाख ११ हजार र अन्तःशुल्कतर्फ ३१ अर्ब ५१ करोड ४७ लाख ३६ हजार लक्ष्य पाएकोमा १५ अर्ब ४९ करोड ९ लाख ८७ हजार रुपैयाँ राजस्व सङ्कलन गरेको छ।
    भन्सार कार्यालयले चैत, वैशाख, जेठमा न्यून राजस्व असुली गरे तापनि गत असारमा लकडाउन खुकुलो भएपछि करीब १४ अर्ब राजस्व सङ्कलन गरेको थियो। असारमा भन्सार कार्यालयले १५ अर्ब ७१ करोड ८७ लाख ४९ हजार लक्ष्य पाएकोमा १४ अर्ब ३२ करोड ४४ लाख ७४ हजार राजस्व सङ्कलन गरेको थियो।
    त्यसैगरी, निकासी महसूलतर्फ गत आवमा १ करोड ३६ लाख १२ हजार, पैठारी महसूलतर्फ ४३ अर्ब ४३ करोड ४० लाख ७१ हजार, कृषि सुधार करतर्फ ८५ करोड ७० लाख १२ हजार, पूर्वाधार करतर्फ ७ करोड ८८ लाख १७ हजार, अग्रिम आयकरतर्फ १८ करोड ४२ लाख १८ हजार र स्वास्थ्य जोखिम करतर्फ १० लाख ४४ हजार राजस्व सङ्कलन गरेको सूचना अधिकारी साहले बताए।
    भन्सार कार्यालयले सडक सुधार तथा सम्भार दस्तुरतर्फ ३ अर्ब ३० करोड १८ लाख ११ हजार र सडक निर्माण तथा सम्भार दस्तुर अन्तर्गत ३ अर्ब ९३ करोड ८४ लाख ५६ हजार राजस्व सङ्कलन भएको जनाएको छ।
    विदेशबाट भित्रिने महँगा सवारीसाधन, मदिरा, औद्योगिक कच्चा पदार्थ, क्लिङ्कर, कच्चा पदार्थ, फलामजन्य कच्चा पदार्थलगायतका सामानको आयात घट्दा राजस्व सङ्कलनमा कमी आएको हो। वीरगंज भन्सार अन्तर्गत हाल पुरानो शङ्कराचार्य–रक्सौल नाकाको भन्सार कार्यालय र अलौंमा सञ्चालमा रहेको एकीकृत जाँच चौकी आइसिपी भन्सार नाका गरी दुर्ईवटा भन्सार नाका सञ्चालनमा छन्।

Sunday, July 19, 2020

सुक्खा बन्दरगाह भन्सारले लक्ष्य भेटाएन

सुक्खा बन्दरगाह भन्सारले लक्ष्य भेटाएन

राधेश्याम पटेल, वीरगंज, ४ साउन/
    नेपालको एकमात्र सुक्खा बन्दरगाह वीरगंजस्थित श्रीसिया सुक्खा बन्दरगाह (ड्राइपोर्ट) भन्सारले गत आवमा लक्ष्यको तुलनामा करीब साढे ५ अर्ब रुपैयाँ कम राजस्व असुली गरेको छ।
    कोरोना सङ्कटको कारण आयात–निर्यात प्रभावित भएपछि राजस्व सङ्कलनमा गिरावट आएको श्रीसिया सुक्खा बन्दरगाह भन्सार कार्यालयका प्रमुख उमेश श्रेष्ठले जानकारी गराएका छन्।
    गत आर्थिक वर्षको साउनदेखि असारसम्म भन्सार कार्यालयले रु ४१ अर्ब ८८ करोड ५ लाख ४ हजार राजस्व लक्ष्य लिएकोमा रु ३८ अर्ब १९ करोड ७३ लाख ९५ हजार राजस्व सङ्कलन गरेको छ।
    भन्सार कार्यालयले भन्सार महसूलतर्फ रु १९ अर्ब २२ करोड ९० लाख ४८ हजार लक्ष्य पाएकोमा रु १६ अर्ब ५८ करोड ९९ लाख ४१ हजार, मूअकतर्फ रु १९ अर्ब ४० करोड ६ लाख २६ हजार लक्ष्य पाएकोमा रु १७ अर्ब १४ लाख २९ हजार, अन्तःशुल्कतर्फ रु ३ अर्ब २५ करोड ८ लाख २९ हजार लक्ष्य पाएकोमा रु २ अर्ब ४३ करोड २ लाख ७० हजार र सडक निर्माण दस्तुरतर्फ रु १७ करोड ५७ लाख ५ हजार गरी कुल रु ३६ अर्ब १९ करोड ७३ लाख ९५ हजार राजस्व सङ्कलन भएको उनले बताए।
    कोरोना महामारीको कारण श्रीसिया सुक्खा बन्दरगाह भन्सार कार्यालयले साउनदेखि फागुनसम्म लक्ष्यको न्यूनतम ९० प्रतिशतभन्दा माथिको अङ्कमा राजस्व सङ्कलन गर्दै आएकोमा चैतदेखि राजस्व सङ्कलनमा रोक नै लागेको थियो।
    कार्यालयले चैतमा रु ३ अर्ब १६ करोड १२ लाख राजस्व लक्ष्य पाएकोमा रु २ अर्ब ३ करोड ६९ लाख, वैशाखमा रु ३ अर्ब ३५ करोड ८८ लाख लक्ष्य पाएकोमा वर्षकै सबैभन्दा कम रु १ अर्ब ३८ करोड ९५ लाख, जेठमा रु ३ अर्ब ७४ करोड ९७ लाख लक्ष्य पाएकोमा रु ३ अर्ब ५४ करोड ३७ लाख र असारमा रु ३ अर्ब ४९ करोड ४२ हजार लक्ष्य पाएकोमा रु ३ अर्ब १९ करोड ३२ लाख राजस्व सङ्कलन गरेको थियो।
    जेठमा सवारी आयात बढी भएकोले लक्ष्यको तुलनामा राजस्व असुली बढेको थियो भने असार १ गतेदेखि लकडाउन खुकुलो भएसँगै भन्सारमा रोकिएका मालवस्तुको जाँचपास हुँदा राजस्व असुलीमा पछिल्लो महीनाभन्दा वृद्धि भएको थियो।

Thursday, July 9, 2020

जीतपुरमा ठूलो लगानीमा होटल ड्रिम्स ताज खुल्दै

जीतपुरमा ठूलो लगानीमा होटल ड्रिम्स ताज खुल्दै

प्रस, जीतपुर, २५ असार/
    वीरगंज–हेटौंडा कोरिडोरमा पर्यटकीय स्थलहरू बढेसँगै यहाँका युवा व्यवसायीहरू होटल व्यवसायतर्फ आकर्षित हुन थालेका छन्। राष्ट्रिय तथा अन्तर्राष्ट्रिय पर्यटक र स्थानीय खानाका पारखीहरूलाई मध्यनजर गरी यहाँ ठूलासाना होटलहरू सञ्चालनमा छन्।
    यसैगरी, बारा जिल्लाकै व्यापारिक तथा आर्थिक नगरीको रूपमा पहिचान बनाउन सफल जीतपुरसिमरा उपमहानगरपालिकाको केन्द्र जीतपुरमा एक युवा व्यवसायीले साठी लाख रुपैयाँको लागतमा आकर्षक  होटल ‘ड्रिम्स ताज’ सञ्चालनमा  ल्याउन लागेका छन्। युवा व्यवसायी विनोदप्रसाद गुप्ताले पाँचतारे होटलको जस्तै सेवा तथा सुविधा सामान्य नागरिकको पहुँचमा पु–याउन तथा जीतपुरको शान उच्च राख्न होटल ड्रिम्स ताज खोल्न लागेको बताए। विभिन्न देशमा स्वादिष्ट खानाको परिकार बनाएर सेवा दिएका कूकहरू ड्रिम्स ताजमा आफ्नो कौशलता देखाउन आतुर रहेका होटलका सञ्चालक गुप्ताले जानकारी गराए। जीतपुरस्थित गिरी मार्केटको पहिलो तलामा खुल्न लागेको सुविधासम्पन्न होटल पारिवारिक वातावरण उपलब्ध गराउने, विभिन्न पार्टी, समारोह तथा विवाहका लागिसमेत उपयुक्त हुने गरी सञ्चालनमा आउन लागेको ड्रिम्स ताजको उद्घाटन मिति चाँडै नै तोकिने गुप्ताले बताए।
ठोरीमा खुर्सानी बिक्री नभएपछि कृषकले बोट मास्न थाले

ठोरीमा खुर्सानी बिक्री नभएपछि कृषकले बोट मास्न थाले


माधव तिमिल्सिना, ठोरी, २५ असार/
    लकडाउनको कारण खुर्सानी बिक्री नभएपछि ठोरी–३ का कृषकहरू समस्यामा परेका छन्।
    अघिल्ला वर्षहरूमा खुर्सानीखेतीबाट मनग्गे आम्दानी गर्ने यस वडाका  किसानको यो वर्ष लगानीसमेत डुब्ने अवस्था छ। यस क्षेत्रका खोर्सानीको मुख्य बजार सीमावर्ती भारतीय क्षेत्र हो। भारतका थोक व्यापारीहरू कृषकको खेतमा आएर हरियो खोर्सानी लिएर जाने गरेका थिए। सीमावर्ती भारतको जमुनिया बजार, मानपुर, चक्रसन, नरकटियागंज, धुम्बाटारलगायतका क्षेत्रका हाटबजारहरू ठोरीमा उत्पादित खुर्सानीको एकछत्र बजार हो। यस वर्ष लकडाउन र सीमा सिल भएका कारण एकजना पनि भारतीय व्यापारी नआएको ठोरी–३ का अगुवा खुर्सानी कृषक हीरालाल श्रेष्ठले बताए।
    त्यसैगरी, ठोरी–३ ब्रह्मनगर क्षेत्रमा उत्पादित खुर्सानी सोही गाउँपालिकाका अन्य वडाहरूमा पनि राम्रैसँग बिक्री हुने गरेको थियो। ठोरीका विभिन्न ठाउँमा लाग्ने हाटबजारमा सहजै खुर्सानी बिक्री हुँदा किसानले मुनाफा गर्ने गरेका थिए।  लकडाउनका कारण व्यापारी आउन नपाएपछि कतिपय किसानले फल्दा फल्दैको खुर्सानीखेती मासेर धान रोपेको ठोरी–३ बुद्धनगरका स्थानीय पिताचन्द्र ढुङ्गेलले बताए। उत्पादित खुर्सानी झरेर भुइँभरि हुँदासम्म व्यापारी नआएकाले यस वर्ष खुर्सानीमा गरिएको लगानी नै डुबेको ढुङ्गेलको गुनासो छ।
    ठोरी गापाको वडा नं ३ मा पर्ने ब्रह्मनगर, बुद्धनगर क्षेत्रमा हरेक वर्ष किसानले खुर्सानीखेती गर्ने गरेका छन्। यहाँका किसानको मुख्य नगदेबाली खुर्सानी र सुर्ती हो। अघिल्लो वर्षसम्म व्यापारीले खेतबाटै प्रतिकिलो एक सय रुपैयाँसम्म तिरेर खुर्सानी लगेका थिए। यो वर्ष अधिकांश किसानको खुर्सानी बिक्री भएको छैन। केही किसानले आसपास वडाका व्यापारीलाई प्रतिकिलो रु २० भन्दा कम मूल्यमा बिक्री गरेका ब्रह्मनगरका शिक्षक भुपाल जोशी बताउँछन्। वीरगंज र चितवनको नारायणघाट बजारमा प्रतिकिलो ६० देखि ८० रुपैयाँमा हरियो खुर्सानी बिक्री भइरहेको छ। वीरगंज र नारायणघाट दुवैतर्फबाट ठोरी करीब ६५ किलोमिटरको दूरीमा भएपनि वर्षात्को समयमा भरपर्दो सडक सुविधा नभएका कारण स्वदेशी व्यापारीहरू ठोरी पुगेका छैनन्।  
    ब्रह्मनगरका अधिकंश किसानले खुर्सानी बिक्री गर्न नपाएर श्रम र लगानी खेर फाल्न विवश भएको उनले सुनाए। अघिल्ला वर्षहरूमा खुर्सानीखेतीबाट यहाँका साना किसानहरूले खर्च कटाएर ३० हजारदेखि ५० हजारसम्म र ठूला तथा मध्यम किसानहरूले १ लाखदेखि ३ लाख रुपैयाँसम्म आम्दानी गरेका शिक्षक जोशी बताउँछन्।
    मेहनत पुगे र बजार पाएमा खुर्सानीबाट प्रतिकट्ठा रु २५ हजारदेखि ३० हजारसम्म खुद मुनाफा हुने ब्रह्मनगरका किसान चन्द्र श्रेष्ठ बताउँछन्। श्रेष्ठका अनुसार खुर्सानीखेतीमा प्रतिकट्ठा ५ हजार रुपैयाँसम्म खर्च हुन्छ। यस वर्ष वडा नं ३ मा मात्रै १५ बिघाभन्दा बढी क्षेत्रफलमा खुर्सानीखेती भएको स्थानीय कृषकहरूको भनाइ छ।

फरक समाचार

Find us