Monday, January 13, 2020

पर्साका १४ स्थानीय तहमध्ये ठोरी, धोबिनी र जीराभवानीबाहेक सबैमा चारचक्के सवारीसाधन

प्रस, वीरगंज, २८ पुस/
    पर्सा जिल्लाका १४ स्थानीय तहमध्ये तीनवटाबाहेक ११ वटाले चारचक्के सवारीसाधनको प्रयोग गर्दै आएका छन् ।
    स्थानीय तह गठन भएको तीन वर्ष  पुग्न लाग्दा ११ वटा स्थानीय तहले सरकारी सेवासुविधामा चारचक्के सवारीसाधन खरीद गरेका छन् भने भाडामा समेत लिएर प्रयोग गर्दै आएका छन् । वीरगंज महानगरपालिकाका प्रमुख विजयकुमार सरावगी, उपप्रमुख शान्ति कार्की, प्रमुख प्रशासकीय अधिकृत उमेश बस्नेतसमेतले चारचक्के गाडी प्रयोग गर्दै आएका छन् ।
    यसअलावा महानगरका विभिन्न महाशाखा प्रमुखहरूले पनि चारचक्के सवारीसाधन प्रयोग गरिरहेका छन्। नगरप्रमुख सरावगीले डेढ करोड रुपैयाँको सवारीसाधन प्रयोग गरिरहेका छन् भने उपप्रमुख शान्ति कार्कीले पनि लाखौं मूल्य पर्ने विदेशी गाडी प्रयोग गरिरहेकी छन् । महानगरका प्रमुख, उपप्रमुखको लागि सवारीसाधन पर्याप्त रहे पनि मझौला शहर एकीकृत वातावरणीय सुधार योजना अन्तर्गतका तीनवटा सवारीसाधन अहिले महानगरपालिकाले आप्mनो कब्जामा लिएर महाशाखाका प्रमुखहरूलाई उपलब्ध गराएको छ ।
    आयोजनाका कर्मचारीहरू भने दुईचक्के सवारीसाधनमा काम गरिरहेका छन् । चारचक्के सवारीसाधनका अलावा मनपाले ३२ वटै वडामा मोटरसाइकल उपलब्ध गराएको छ । वडाध्यक्षहरूलाई मासिक १० लिटर पेट्रोलको सुविधा उपलब्ध गराइएको छ । नगरप्रमुखले २ सय लिटर तथा उपप्रमुखले पनि सोही हाराहारीमा इन्धन सुविधा लिंदै आएका छन् । पर्सा जिल्लाका स्थानीय तहमा सबैभन्दा पहिले छिपहरमाई गाउँपालिकाले स्कार्पियो गाडी खरीद गरेको थियो । गापा अध्यक्ष मनोज गुप्ताले निजी चारचक्के सवारीसाधन भएर पनि गापाको बजेटबाट पचास लाख मूल्य पर्ने स्कार्पियो गाडी खरीद गरेपछि पर्सा जिल्लाका स्थानीय निकायमा चारचक्के सवारीसाधन खरीद गर्ने, भाडामा चढ्ने होडबाजी शुरू भएको हो । यो होडबाजीमा अहिले पर्सागढी, बहुदरमाई, पोखरिया नपाका साथै कालिकामाई, सखुवाप्रसौनी, पटेर्वासुगौली, जगरनाथपुर, पकाहामैनपुर, बिन्दवासिनी, छिपहरमाई गापाहरूले चारचक्के सवारीसाधन प्रमुख, उपप्रमुख र प्रशासकीय अधिकृतको लागि खरीद गरेको तथा भाडामा लिएर प्रयोग गरिरहेका छन् ।
    अहिलेसम्म चारचक्के सवारीसाधन प्रयोग नगर्ने स्थानीय तहमा ठोरी र धोबिनी गापा मात्र छन् । जीराभवानी गापामा अध्यक्ष र उपाध्यक्षले चारचक्के सवारीसाधन प्रयोग नगरे पनि प्रमुख प्रशासकीय अधिकृत कुलोत्तम पोखरेलले भाडाको चारचक्के सवारीसाधन प्रयोग गरिरहेका छन् । यो गापामा मन्त्रालयले चारचक्के सवारीसाधन उपलब्ध गराएको थियो तर सो गाडी मरम्मतमा बढी पैसा खर्च भइरहेको कारण वीरगंज आउनजानको लागि प्रमुख प्रशासकीय अधिकृत पोखरेललाई भाडाको चारचक्के सवारीसाधन उपलब्ध गराइएको गापा अध्यक्ष रामप्रीत महतो चौधरीले बताए ।
    प्रमुख प्रशासकीय अधिकृत, उपाध्यक्ष र वडाध्यक्षहरूले गापाको सेवासुविधामा चारचक्के र दुईचक्के सवारीसाधनको प्रयोग गर्दै आए पनि गापा अध्यक्ष स्वयम्ले भने आप्mनो पुरानो मोटरसाइकल नै प्रयोग गरिरहेका छन् । अध्यक्ष चौधरीले सरकारी गाडीको प्रयोग नगर्नुको कारण बेला–कुबेला सवारीसाधन चलाउनुपर्ने र सरकारी सवारीसाधनको दुरुपयोग नहोस् भनेर आपूmले निजी सवारीसाधन चलाउँदै आएको बताए । उनले निजी सवारीसाधनमा  गापाबाट इन्धन सुविधा मात्र लिएको बताए ।
    जीराभवानीसरह ठोरी गापाका अध्यक्ष पद्मलाल श्रेष्ठले पनि निजी मोटरसाइकलको बढी प्रयोग गरिरहेका छन् । महँगा चारचक्के सवारीसाधन खरीद गर्दा गापाका अन्य विकास निर्माण कार्य प्रभावित हुने हुँदा गापालाई आवश्यक एक्साभेटर, ट्याक्टर आदि खरीद गरेको अध्यक्ष श्रेष्ठले बताए । गापाका जनप्रतिनिधि र प्रमुख प्रशासकीय अधिकृतले भने दुईचक्के सवारीसाधन मात्र प्रयोग गरेर इन्धन सुविधा लिइरहेको अध्यक्ष श्रेष्ठले बताए । उनले सरकारी कामबाहेक निजी काममा निजी मोटरसाइकलकै प्रयोग गर्दै आएको उनले बताए।
    धोबिनी गापाका अध्यक्ष सुरेश कुर्मीले पनि चारचक्के सवारीसाधनको प्रयोग गरेका छैनन् । उनको गापामा पनि सबै जनप्रतिनिधि र प्रमुख प्रशासकीय अधिकृतले मोटरसाइकल नै प्रयोग गरिरहेका छन् भने इन्धन सुविधा पनि लिइरहेका छन् ।
    पर्सा जिल्लाका स्थानीय तहमा वीरगंज महानगरपालिकाका प्रमुख सरावगी, बहुदरमाई नपाका प्रमुख नितेन्द्र साह, छिपहरमाई गापाका अध्यक्ष मनोज गुप्ता, पटेर्वासुगौली गापाका अध्यक्ष हरिनारायण चौधरी, पकाहामैनपुर गापाका अध्यक्ष विजय चौरसिया, जगरनाथपुर गापाका अध्यक्ष जालीम मियाँ र कालिकामाई गापाका उपाध्यक्ष राजेश चौरसियासँग निजी चारचक्के सवारीसाधन छन् तर पनि उनीहरूले आआप्mनो नपा, गापाबाट सरकारी सुविधामा चारचक्के गाडी र इन्धनको प्रयोग गर्दै आएका छन् । चारचक्के सवारीसाधन भएको स्थानीय तहमा प्रमुखहरूले अधिकतम दुई सय लिटरसम्म र उपप्रमुखहरूले अधिकतम डेढ सय लिटरसम्म इन्धन प्रयोग गर्दै आएका छन् । वार्षिक लाखौं रुपैयाँ इन्धनमा मात्र खर्च हुन्छ । दुईचक्के सवारीसाधनको प्रयोग गर्दा यो खर्चमा आधा कटौती हुने एकजना प्रमुख प्रशासकीय अधिकृतले बताए । तर स्थानीय तहमा चारचक्केको मोह बढ्दै गएको कारण गापा अध्यक्ष, उपाध्यक्ष, प्रमुख प्रशासकीय अधिकृतहरूले चारचक्के सवारीसाधन खरीद गर्ने र खरीद नगरेका स्थानीय तहले महँगो मूल्यमा भाडामा चारचक्के सवारीसाधनको प्रयोग गर्दै आएको पाइएको छ ।
    मासिक रु ८० हजारदेखि १ लाखसम्म गाडी भाडा, इन्धनका साथै सवारीचालकको खर्च पनि स्थानीय तहले बेहोर्दा भाडाका गाडीहरू झनै महँगो परिरहेका छन् ।
    जीराभवानी गापाका अध्यक्ष चौधरीले प्रमुख प्रशासकीय अधिकृतलाई भाडामा चारचक्के सवारीसाधन उपलब्ध गराएर इन्धन र चालकको खर्च जोगाएको दाबी गर्छन् । उनले गापाले चारचक्के सवारीसाधन प्रयोग गर्दा चालक राख्नुपर्ने, इन्धन दिनुपर्ने जस्ता खर्च बढ्ने हुनाले भाडाको सवारीसाधन उपलब्ध गराएर सो रकम जोगाएको दाबी गरे ।

SHARE THIS

Author: Prateek Daily

वीरगंजबाट प्रकाशित राष्ट्रिय “क” वर्गको दैनिक पत्रिका

0 comments:

Find us