Thursday, December 5, 2019

गढीमाई मेला बलि व्यवस्थापनका संयोजकसहित तीनजना पक्राउ

प्रस, वीरगंज, १९ मङ्सिर/
    बाराका प्रमुख जिल्ला अधिकारी फणिन्द्रमणि पोेखरेलले गढीमाई मेलामा बलि व्यवस्थापन समितिका अध्यक्षसहित तीनजनालाई राँगा व्यवस्थापनमा लापरवाही गरेको कसूरमा पक्राउ गरेको समाचार छ ।
    बलि व्यवस्थापन उपसमितिका संयोजक रवीन्द्र महतोसहित तीनजनालाई तीन घण्टा नियन्त्रणमा लिएर प्रजिअ पोखरेलले छाडेका हुन ।
    बलि व्यवस्थापन उपसमितिले राँगा बलिको क्रममा चरम लापरवाही गरी राँगाको लगत नराखेको, छालासहित बलि दिएका राँगाहरू लुटाएको आरोपमा प्रजिअले महतोलगायत तीनजनालाई नियन्त्रणमा लिएका थिए ।
    उपसमितिले राँगाको लगत राखेर बलि दिएको प्रमाण पेश गरेपछि उनीहरूलाई रिहा गरिएको थियो । प्रत्येक गढीमाई मेलामा दलित समुदायले राँगाको सिनो नउठाउने निर्णय गर्ने र पछि बलि भएलगत्तै सिनो लुटेर लैजाने परम्परा यसपटक पनि जारी रह्यो । यसपटक राँगाको छाला पनि नहटाएर सिनो लुटिएको छ ।
    मङ्सिर १७ गते राँगाको बलि दिइएको थियो । बलि शुरू भएपछि बारा र पर्साका दलित समुदायसँगै यसपटक बाराको जीतपुरसिमरा उपमहानगर, कलैया उपमहानगर, कोल्हवी नगरपालिका, निजगढ नगरपालिका र छिमेकी भारतसमेतबाट अन्य समुदायका मानिसहरूले पनि राँगाको सिनो लुटेर लगेको प्रेस संयोजन उपसमितिका संयोजक मुकेश यादवले बताए । उनले पञ्चवर्षीय गढीमाई मेलामा यसपटक पहिलोचोटि छालासहितको राँगाको सिनो लुटेर लगेको बताए । उनले बलिकै दिन करीब १४ हजारको सङ्ख्यामा राँगाको सिनो लुटिएको घटना पनि प्रथमपटक भएको बताए । यसैबीच, पशुबलिको लागि विश्वमैं विख्यात गढीमाई मेलामा ४ लाख सङ्ख्याको हाराहारीमा बोकाको बलि दिएको प्रेस संयोजक यादवले बताए ।
    चार किल्ला तोकिएको स्थानभित्र सो परिमाणमा बलि दिएको अनुमान गरिएको उनले दाबी गरे । बोका बलिको सङ्ख्या पुष्टि गर्ने आधार अहिलेसम्म गढीमाई मेलाले बनाउन सकेको छैन । अनुमानको आधारमा दाबी गर्ने पुरानो परम्परालाई अहिले पनि कायम गरिएको छ ।
    यसैगरी हाँस, कुखुराको लगत पनि छैन । परेवा व्यवस्थापनका लागि यसपटक परेवा संरक्षण समिति निर्माण गरिएको थियो । पशु कल्याण सङ्घले एउटा गैरसरकारी संस्थालाई परेवा संरक्षणका लागि ६ लाख रुपैयाँ खर्च गरी जिम्मा सुम्पेको थियो । तर समिति र संस्थाबीच रकमको कुरालाई लिएर विवाद भयो र परेवाको संरक्षणमा लापरवाही गरिंदा आधाभन्दा बढी परेवा मरेका छन् भने थुप्रै परेवा लुटिएका पनि छन् । परेवा लुटेराले प्रतिजोडा रु ५ सयसम्ममा बिक्री गरेको पाइएको थियो ।
    वीरगंजमा बलिको दिनसम्म परेवा प्रतिजोडी रु १ हजार थियो भने कलैयादेखि बरियारपुरसम्म रु ८ सयमा बिक्री भइरहेको थियो । गढीमाई मेला शुरू भएको मङ्सिर १ गतेदेखि हालसम्म करीब सवा करोड मानिसले मेला अवलोकन गरिसकेको प्रेस संयोजक यादवले दाबी गरेका छन् ।

SHARE THIS

Author: Prateek Daily

वीरगंजबाट प्रकाशित राष्ट्रिय “क” वर्गको दैनिक पत्रिका

0 comments:

Find us